21 naýryz kúni «102» operatoryna Atyraý qalasyndaǵy ortalyq kópirden belgisiz azamatshanyń ózenge sekirgendigi jaıly habarlama túsken. Oqıǵa ornyna alǵashqy bolyp jetken Atyraý qalasynyń polısııa basqarmasynyń patrýldik polıseıi polısııa serjanty Aqymǵalıev Shalqar Kóshkimbaıuly, azamatshany qutqarý úshin oılanbastan muzdaı sýǵa túsken. О́zgeniń ómirin qutqaramyn dep óz ómirin qıǵan jas polıseı azamatshany qutqarý barysynda ózi erlikpen qaza tapty.
Erligi eshqashan umytylmaıtyn erlerdi ulyqtaý bizdiń azamattyq paryzymyz.
Osy oraıda búgingi «Erlik sabaǵynda» qyzylordalyq tártip saqshylary antyna adal, eline, Otanyna qyzmet jasaýda óziniń ómirin qııý arqyly erlik jasaǵan Shalqar Aqymǵalıevty bir mınýt únsizdikpen eske aldy.
Sonan soń polısııa serjanty Aqymǵalıev Shalqar Kóshkimbaıuly týraly qysqasha beınerolık qyzmetkerler nazaryna usynyldy.
Qyzylorda oblysy Polısııa departamenti óz kezeginde qaza bolǵan Shalqar Aqymǵalıevtyń otbasyna materıaldyq kómek berý usynysyn biraýyzdan qoldady. Búgingi kúni Qyzylorda oblysy polısııa departamenti boıynsha 1 800 000 /bir mıllıon segis júz myń/ teńge kóleminde aqshalaı qarajatty Shalqar Aqymǵalıevtyń anasy Muhanova Lázzat Májenqyzynyń esep shotyna aýdarý jumystary júrgizilýde.
Erlik eshqashan umytylmaıdy. Jyldar ótse de, Shalqar Aqymǵalıevtyń beıbit ómirde jasaǵan erligi, ekiniń birine berile bermeıtin batyldyǵy men batyrlyǵy halyqtyń jadynda máńgi jańǵyryp turmaq, óskeleń urpaqqa, qazirgi tańda ishki ister organdary salasynda qyzmet etip júrgen qyzmetkerlerge úlgi bolyp qalmaq.
Azamattardyń qaýipsizdigin qamtamasyz etýdi ómirlik paryzy etip, jas ta bolsa kózsiz erlik kórsetken Shalqar Otan aldyndaǵy Antyna máńgi berik ekendigin dáleldedi.
