Lańkestik árekettiń joly kesildi
Beısenbi, 29 naýryz 2012 7:11
Qazaqstan Respýblıkasynyń Bas prokýratýrasy elimizdiń Ulttyq qaýipsizdik komıteti 2012 jylǵy 24 naýryzda Almaty qalasynyń aýmaǵynda daıyndalý satysyndaǵy lańkestik aktilerdiń aldyn alǵandyǵy týraly habarlaıdy.
Josparlanǵan teraktilerdiń uıymdastyrýshysy 2009 jyldan bastap qazaqstandyq quqyq qorǵaý organdarynan shetelde jasyrynyp júrgen, 1975 jyly týǵan Aleksandr Vladımırovıch Pavlov bolyp tabylady.
Beısenbi, 29 naýryz 2012 7:11
Qazaqstan Respýblıkasynyń Bas prokýratýrasy elimizdiń Ulttyq qaýipsizdik komıteti 2012 jylǵy 24 naýryzda Almaty qalasynyń aýmaǵynda daıyndalý satysyndaǵy lańkestik aktilerdiń aldyn alǵandyǵy týraly habarlaıdy.
Josparlanǵan teraktilerdiń uıymdastyrýshysy 2009 jyldan bastap qazaqstandyq quqyq qorǵaý organdarynan shetelde jasyrynyp júrgen, 1975 jyly týǵan Aleksandr Vladımırovıch Pavlov bolyp tabylady.
Pavlov Qazaqstannyń quqyq qorǵaý organdary tarapynan izdeý salynǵan BTA Banktiń burynǵy basshysy Muhtar Ábilázovtiń jeke kúzetin basqarady, onyń jeke qupııa tapsyrmalaryn oryndaýmen aınalysady.
Atap aıtqanda, Aleksandr Pavlov M.Ábilázovke BTA Banktiń qarjysyn asa iri kólemde urlaýǵa kómek kórsetken, al 2009 jylǵy aqpanda Ábilázovtiń jeke muraǵatyn jáne BTA Banktiń Korporatıvtik bıznes basqarmasynyń kompıýterlerinen qatty dıskilerdi kóshirýdi uıymdastyrǵan, sodan soń ózi de Ulybrıtanııaǵa ketip, búgingi kúnge deıin Qazaqstanǵa kirmegen.
2010 jylǵy sáýirde Pavlovqa qatysty bireýdiń senip tapsyrylǵan múlkin ıelenip alý nemese ysyrap etý faktisi boıynsha qylmystyq is qozǵalǵan, al 2010 jylǵy tamyzda oǵan izdeý jarııalanǵan.
Onymen sóz baılasa otyryp «Alǵa» tirkelmegen partııasy basshylarynyń biri, M.Ábilázovtiń eń jaqyn senimdi serikteriniń biri bolyp tabylatyn jáne shetelde turaqty turatyn Muratbek Ketebaev áreket etken.
Terrorızm jáne ekstremızm aktilerin uıymdastyrý jóninde josparlardy olar 2011 jylǵy qyrkúıekten beri oılastyryp kelgen.
2012 jylǵy naýryzdyń basynda olar ózderiniń sybaılastaryna Almaty qalasynyń qoǵamdyq oryndarynda, onyń ishinde saıabaqtar aımaǵynda jáne ákimshilik ǵımarattarynyń janynda jarylystar jasaýdy tapsyrǵan.
Atap aıtqanda, Pavlov oryndaýshyǵa Áýezov aýdanyndaǵy «Saryarqa» kınoteatrynyń artyndaǵy «Femelı» saıabaǵynda jarylysty uıymdastyrýdy, sondaı-aq jarylǵysh zattardy Ál-Farabı dańǵylyndaǵy jaıaý júrginshiler ótpelerinde ornalastyrýdy tapsyrǵan.
Lańkestik sharalaryn uıymdastyrý úshin Pavlov 25 myń AQSh dollary kóleminde aqshalaı qarajat bólgen, onyń 15 myń dollary oryndaýshyǵa berilgen. Qalǵan 10 myń dollaryn teraktiler jasalǵannan keıin berý josparlanǵan.
Jedel-tergeý sharalarynyń barysynda lańkestik sharanyń negizgi maqsaty retinde halyqty qorqytý, alasapyran men dúrbeleń jaǵdaıyn týdyrý, eldegi qoǵamdyq-saıası jaǵdaıdy turaqsyzdandyrý bolǵandyǵy anyqtaldy.
Atalǵan fakti boıynsha Qazaqstan Respýblıkasy Qylmystyq kodeksi 233-babynyń 1-tarmaǵy («Terrorızm») boıynsha qylmystyq is qozǵalyp, tergelýde.
Tergeý aıasynda quqyq qorǵaý organdaryna joǵaryda atalǵan tulǵalardyń sheteldikterdi qosa alǵanda radıkaldy ustanymdaǵy dinı toptardyń ókilderimen Qazaqstanda terrorıstik aktilerdi birlesip jasaý, sondaı-aq dinaralyq jáne ultaralyq turǵyda qaqtyǵystar týdyrý maqsatynda baılanys ornatý áreketteri týraly aqparat kelip tústi.
Tergeý júrgizilýde. Birqatar tulǵalar qazirgi kezde ustaldy jáne kinálaryn moıyndap, aıǵaq berýde.
Munan ózge aqparat tergeýdiń múddesine baılanysty jarııalanbaıdy, dep habarlady Bas prokýratýranyń baspasóz qyzmeti.
