Osy oqıǵaǵa oraı aýdan ortalyǵynda ananyń 90 jyldyǵy, Bıkamal ájeniń shópshegi Bekarystyń tusaýkeseri ótti. Aýdandyq máslıhattyń hatshysy Dáýlet Ydyryshev ustazǵa ata dástúrimen ıyǵyna qamzol jaýyp, «Aýdannyń qurmetti azamaty» ataǵynyń kýáligin tabys etti. Kesh bolsa da eńbegi elenip, qurmetke kenelgen ana jerlesterine, aýdan basshylaryna alǵysyn bildirdi.
Iá, bul keıingi tolqyn urpaqqa sabaq bolarlyq, úırenetin úrdis. Ustaz eńbegi eskerýsiz qalmady. Keshte aýdan ónerpazdary án men kúıden shashý shashty. Bir jasqa tolǵan Bekarystyń tusaýyn Almatydan arnaıy kelgen qarı-qajy Qaırat Kókbaev kesip, batasyn berdi.
* * *
...Júzinen meıirim shýaǵy shashyp turatyn, osynaý bir qarapaıym ájeıdi kezdestirgen saıyn esime elýinshi jyldardyń sońy túsedi. Zaısan aýdanyndaǵy shaǵyn ǵana Sarjyra aýylyndaǵy segiz jyldyq mekteptiń tabaldyryǵyn attaǵanbyz. Bir kúni mektepke jańa muǵalim kelipti dep balalar shý ete qaldy. Mine, ulaǵatty ustaz Bıkamal Rahymbaevamen osylaı tanysqan edik. Ol sabyrly, zekimeıtin, sabaqty balalarǵa uǵynyqty túsindiretin muǵalim boldy. Biz de ustazdy erekshe syılaıtynbyz. Munyń aldynda Jambyl, Besjyldyq, Kaganovıch mektepterinde qyzmet etken, sosyn Daýal, Sarshı, Abaı, Oktıabrdiń 40 jyldyǵy atyndaǵy mektepterde shákirtterge dáris oqyǵan, myńdaǵan balanyń saýatyn ashqan ol ustazdyq jolda jarty ǵasyrǵa jýyq qyzmet etti. Uzaq jylǵy eńbegi baǵalanyp, san márte medaldarmen, oqý mınıstrliginiń qurmet gramotalarymen, alǵys hattarymen marapattaldy. «Kúmis alqa» medali asyl ananyń alty balany tárbıelep ósirgeni úshin berilgen baǵa. Al ustazdyń jubaıy, uzaq jyldar aýdannyń birneshe eldi mekenderinde basshylyq qyzmette bolǵan Zınabek aǵa ákemizben birge eńbek etti. Aǵanyń uzaq jylǵy eńbegi eskerýsiz qalǵan joq, kóptegen orden, medaldarǵa ıe boldy. Adam urpaǵymen ósip-ónedi demekshi, Zınabek aǵa men Bıkamal apaı 6 bala, onnan astam nemere, shóbere tárbıelep ósirdi. Balalarynyń barlyǵy joǵary bilim aldy, olardyń ishinde zootehnık, muǵalim, basqa da mamandyq ıeleri bar. 65 jyl ómirdiń qyzyǵy men shyjyǵyn birge kórgen Zınabek aǵa budan bes jyl buryn baqılyqqa attanyp kete bardy.
Budan birneshe jyl buryn Aınabulaq aýylyndaǵy mektepte uzaq jyl bastaýysh synyptarda ustaz bolǵan ardaqty ananyń «arnaýly synyby» ashylǵanda kýá bolǵan edik. Ustazdar qaýymy Bıkamal Rahymbaevanyń aýdan mektepterindegi qyzmeti, esimi elge keńinen tanymal shákirtteri jaıly sýretter men ómirbaıandaryn tizipti. Ájeniń balalary men nemereleri arnaýly synypty jıhazben, ınteraktıvti taqtamen jabdyqtap berdi. Qazir bul synypta ozat oqýshylarǵa qurmet kórsetiledi. Bıkamal ájeni Aınabulaq aýylyndaǵy mekteptiń ustazdary ózderine jıi shaqyryp, aqyldasyp, túrli jıyndardan qalys qaldyrmaıdy.
Ustaz bolý – júrektiń batyrlyǵy,
Ustaz bolý – sezimniń batyldyǵy.
Ustaz bolý – ómirdiń kún shýaǵy,
Azbaıtuǵyn adamnyń altyndyǵy, – degen jyr joldary ustaz uǵymynyń ulylyǵyn aıqyndaıdy. Jas urpaqqa sapaly bilim, sanaly tárbıe bergen ustaz baqyty osy bolsa kerek.
Ońdasyn ELÝBAI,
«Egemen Qazaqstannyń» ardager jýrnalısi
Shyǵys Qazaqstan oblysy,
Zaısan aýdany
