Jármeńkege Almatydaǵy 50 qurylys kompanııasy qatyspaq. Olar kelgen azamattarǵa qolda bar turǵyn úı týraly, baǵasy men ony «7-20-25» baǵdarlamasy arqyly satyp alý múmkindigi týraly tolyq aqparat beredi. Sonymen qatar, ekinshi deńgeıdegi bankterdiń ókilderi men «Baspana» ıpotekalyq uıymynyń mamandary keńes bermek.
«Biz Qazaqstannyń iri qalalarynda ótip júrgen páter jármeńkelerine ekinshi jyl qatysyp otyrmyz. Jármeńkeler óziniń tıimdiligin dáleldedi, olar satýshylardyń, satyp alýshylardyń jáne bankterdiń bir alańda bas qosýyna jaqsy múmkindik beredi. Eger ótken jyly Almaty qalasyndaǵy jármeńkege 35 qurylys kompanııasy qatyssa, bıyl olardyń sany 50-den asyp otyr. Qurylysshylardyń «7-20-25» baǵdarlamasyna degen qyzyǵýshylyǵy artyp otyrǵanyn eskersek, endi turǵyn úı keshenderiniń derekqoryn júıeli túrde jańartyp otyrý qajettiligi týyndaıdy. Osy turǵydan mamandandyrylǵan ınternet-servısterdiń úlken qoldaýyn sezinemiz», – dedi «Baspana» ıpotekalyq uıymynyń basshysy Qaırat Altynbekov.
Eki kún ishinde jármeńkege Almatynyń 6 myńnan astam turǵyny men qonaqtary qatysady dep kútilýde. «7-20-25» baǵdarlamasy boıynsha Almatyda páter alǵysy keletinderge bul óte jaqsy múmkindik ekenin de eskerte keteıik.
