Mine, qalada birneshe jyl boıy «Shóp tamyry» atty áleýmettik joba qolǵa alynǵan. Kúnshyǵys eli 11 mektepke qarjylaı kómegin jasap, esik-terezelerin jańartyp berdi. Japonııanyń Qazaqstandaǵy Tótenshe jáne О́kiletti elshisi Tasýhıko Kasaı ákimmen kezdesýden keıin qaladaǵy úsh mektepti aralady. «Shóp tamyry» jobasy boıynsha Japonııa eli Semeıdegi №23 mektepte 195 tereze jaqtaýyn jańalap berdi. Al № 25 mektepte 209, №3 mektepte 241 tereze jaqtaýy jańadan ornatyldy.
- Biz Qazaq elin qatty qurmetteımiz, jaqsy kóremiz, - dedi elshi Tasýhıko Kasaı, - 22 jyldyq áriptestigimizde «Shóp tamyry» jobasy boıynsha Qazaqstanda 100 áleýmettik jobany qolǵa alyp, oryndap shyqtyq. Onyń ishinde 24 joba - ShQO-da. Al Semeı árqashan bizdiń nazarymyzda bolmaq.
Qalalyq Bilim bóliminiń bastyǵy Natalııa Fesenkonyń aıtýynsha, «Shóp tamyrynyń» bir jobasyna kirgen №3 jalpy orta bilim beretin mektep-kesheniniń qabyrǵasy 1977 jyly qalanyp, paıdalanýǵa berilgen. Sodan beri terezeleri kúrdeli jóndeýdi qajet etti. Qazirgi tańda 820 oqýshy bilim alyp, tárbıelenýde.
Budan keıin qurmetti qonaq Tasýhıko Kasaı myrzaǵa bastaýysh synyp oqýshylary ózderiniń ustazdarymen birge jasaǵan qolóner eńbekterin kórsetti. Al joǵary synyp oqýshylary IT tehnologııa men robototehnıkany qanshalyqty meńgergendikterin aıtyp, bilimderin pash etti. Elshi myrza barlyǵy da bolashaǵynan zor úmit kúttiretin jastar dep, árqaısysynyń qoldaryn qysty. №3 mektep dırektorynyń oqý-tárbıe isi jónindegi orynbasary Aıgúl Sembaeva Japon elshisine Alǵys hat tabystap, terezeden keletin jaryq pen jylýdyń nátıjesinde bıyl balalardyń da densaýlyǵy jaqsarǵandyǵyn atap aıtty.
Mektep dırektorynyń ádistemelik jumys jónindegi orynbasary Svetlana Ospanova bıyl júrgizilgen monıtorıng boıynsha oqýshylardyń oqýǵa degen, eńbek, tehnologııa, sýret sabaqtaryna degen qyzyǵýshylyǵy artqandyǵyn atap ótip, Japon halqy sózge berik, iske adal eken dep razylyǵyn bildirdi. Jáne oqýshylardyń qolóner týyndylarynan jasalǵan kórmeni tanystyrdy. №3 mektep dırektorynyń oqý isi jónindegi orynbasary Almagúl Amantaıqyzynyń jetekshiligimen bastaýysh synyp oqýshylary qazaqtyń ulttyq bılerinen, ánderinen kórinis kórsetip, kishkentaı sábılerdiń barlyǵy elshi myrzamen birge estelik sýretke tústi.
Raýshan NUǴMANBEKOVA,
«Egemen Qazaqstan»
