«Áleýmettik qamqorlyq» baǵdarlamasy jańa áleýmettik tapsyrmalardy usynyp otyr. Osyǵan baılanysty úsh baǵytta jumys istep jatyrmyz. Alǵashqysy, kúnkóris deńgeıi tómen otbasylar men otbasy múshelerine kórsetiler kómek. Ekinshisi, densaýlyq saqtaý salasyndaǵy qyzmetterdiń sapasyn arttyrý. Sonymen qatar turǵyndardy baspanamen qamtý máselesi basty nazarǵa alynýda. Úshinshi baǵyt – óńirlerdi damytý. Bıyl úlken tarıhı ózgeristerdiń kýási bolyp otyrmyz. Oń ózgeristerdiń barlyǵy halyqtyń ıgiligi úshin atqarylyp jatyr. 20 jyl buryn Shymkent qalasyna issaparmen kelgenimde jaryq saǵattap ǵana beriletin edi. Múgedekter úıinde azamattardyń jylýsyz, jaryqsyz, aýlada qazan asyp jatqany áli kóz aldymnan ketpeıdi. Qazir elimizde halyqtyń ál-aýqaty jaqsardy. Shaharda ońdy ózgeristerdi kórip, tanystyq. Endigi maqsat – áleýmettik baǵytta qarastyrylǵan memlekettik kómekti shyn muqtaj jandarǵa jetkizýge birlesip jumys isteý», dedi G.Ábdiqalyqova.
Eńbek jáne halyqty áleýmettik qorǵaý mınıstri Berdibek Saparbaev vedomstvonyń halyqtyń tabysyn arttyrý jáne az qamtamasyz etilgen otbasylardy qoldaý boıynsha qabyldaǵan sharalary týraly aıtyp ótti.
«Men úshin ońtústik óńirdiń, onyń ishinde Shymkenttiń orny bólek. Elbasynyń táýelsizdik jyldaryndaǵy eldi daǵdarys jaǵdaıynan qalaı alyp shyqqany barlyǵymyzdyń sanamyzda saırap tur. Tuńǵysh Prezıdentimizdiń memlekettik deńgeıdegi ár isiniń, bastamalarynyń artynda eldiń áleýmettik jaǵdaıyn jaqsartý turdy. Ýaqyt tegershigin keıin shegerip qarar bolsańyzdar, sol tapsyrmalardyń qalaı oryndalyp jatqanyna kóz jetkizesizder. Mine, munyń dáleli jaqynda ǵana jetekshi partııanyń kezekti sezindegi Elbasynyń Úkimetke, jergilikti bılik ókilderine bergen tapsyrmasy halyqtyń jaǵdaıyn jaqsartyp, kórsetiletin qyzmettiń sapasyn arttyrý boldy. Bıýdjettik sala qyzmetkerleriniń jalaqysyn 15-30 paıyzǵa, muǵalimderdiń eńbekaqysy maýsymǵa deıin 79 myń teńge bolsa, endi 96 myń teńgege eselenbek. Tárbıeshilerdiń jalaqysy 68 myńnan 88 myńǵa, dárigerlerdiń aılyǵy 108 myńnan 141 myńǵa deıin ósedi. Munyń barlyǵy qyzmet ótili men biliktilik deńgeıine qaraı esepteledi», dedi B.Saparbaev.
Mınıstr Shymkent qalasynyń 77725 turǵyny az qamtylǵan kóp balaly otbasylarǵa arnalǵan áleýmettik kómekti alatynyn aıtty.
Atalǵan kómekke muqtaj otbasylardy anyqtaý úshin jergilikti bılikpen birlesip áleýmettik karta ázirlenip jatyr. Osy oraıda ol shymkenttik kásipkerlerge úıde otyrǵan analarǵa kómek qolyn sozyp, kásip kózin ashýyna yntalandyrýǵa shaqyrdy.
Shymkenttiktermen kezdesýde jańa daǵdylar men quzyrettilikti talap etetin zamanaýı jaǵdaılarda sapaly bilim berý máselesi erekshe mańyzǵa ıe ekenine Bilim jáne ǵylym mınıstri Kúlásh Shámshıdınova bilim berý salasyndaǵy reformalar boıynsha óz oıyn ortaǵa saldy.
«Elbasynyń partııa sezindegi tapsyrmasyna oraı muǵalim mártebesi kóterilip, olardyń áleýmettik jaǵdaıynda da jaqsy ózgerister oryn aldy. Eńbekaqylaryna 30 paıyzdyq ústemeaqy qosyldy. Balalardyń sapaly bilim alýy ustazdardyń biliktiligine baılanysty. Osy baǵytta 3 jyldyń ishinde 104 myńnan asa muǵalim biliktiligin arttyrý boıynsha arnaıy kýrstan ótedi. Endi elimizdegi úsh aýysymdy mektepterdiń máselesin sheshýdi qolǵa alamyz. Táýelsizdik jyldarynan beri jergilikti jáne respýblıkalyq bıýdjet esebinen 1672 mektep salyndy. Sonyń 521-i ońtústik óńirde, onyń ishinde Shymkentte turǵyzylǵan. «100 mektep, 100 aýrýhana» baǵdarlamasy boıynsha 34 mektep osy óńirde salyndy. Nege bul óńirde bilim uıalary kóptep salyndy? Sebebi, bul óńirde urpaǵym bilimdi, bilikti azamat bolsyn degen altyn qursaq kóp balaly analar bar. Endi taǵy 190 mektep salamyz dep josparlap otyrmyz. Onyń 89-y úsh aýysymdy mektepterdiń máselesin sheshedi. 13-i apatty jaǵdaıdaǵy mekteptiń ornyna salynady», dedi mınıstr.
Jumys tobynyń qalalyqtarmen kezdesýinde densaýlyq saqtaý júıesiniń basym baǵyttary da sóz boldy. Densaýlyq saqtaý vıse-mınıstri Lázzat Aqtaeva medısınalyq qamsyzdandyrý, turǵyndarǵa yńǵaıly medısınalyq kómek kórsetý týraly áńgimelese, Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetovtiń aıtýynsha, muqtaj jandar úshin baspana máselesi kezeń-kezeńimen sheshim tappaq.
Shymkent qalasy ákiminiń orynbasary Gúljan Qurmanbekova Elbasynyń «Áleýmettik qamqorlyq» bastamasyn júzege asyrý aıasynda ázirlengen áleýmettik jobalar týraly habardar etti.
«2019 jyly qalalyq bıýdjette birneshe ınvestısııalyq jobalardy iske asyrý josparlanǵan. Atalǵan jobalardy iske asyrý arqyly 22 myńnan astam jumys oryndaryn ashý kútilýde. Aldaǵy ýaqytta «Meyirim.kz» qaıyrymdylyq jáne «El-kómek» elektrondy áleýmettik portaly, «Belsendi uzaq ómir súrý», «Shapaǵat» múgedekterge arnalǵan ortalyqtary ashylady. «Áıelder jáne jastar kásipkerligin damytýdyń 2019-2021 jyldarǵa arnalǵan «Men kásipker bolamyn» atty jol kartasy ázirlendi. Jobany iske asyrý úshin qalalyq bıýdjet esebinen 600 mln teńge qaraldy. Búginge 540 páterli 10 turǵyn úıdiń qurylysy daıyn, mamyr aıynda beriledi. Onyń ishinde 177 páter kóp balaly analarǵa beriledi. Nátıjesinde bıyl 1368 áleýmettik jaǵynan álsiz sanattaǵy jáne jas otbasylar (342 páter) baspanaly bolady. Qazir qalada 100 myńnan astam azamatqa áleýmettik kómek kórsetilýde. Onyń ishinde 62 myńnan astam adamǵa mindetti áleýmettik kómek kórsetilýde», dedi G.Qurmanbekova.
Kezdesýdi qorytyndylaı kele, Premer-Mınıstrdiń orynbasary G.Ábdiqalyqova 11 kóp balaly otbasyna memlekettik turǵyn úı baǵdarlamasy aıasynda salynǵan jańa páterlerdiń kiltterin tapsyrdy.
ShYMKENT
