Synaqqa syn alda
Beısenbi, 10 mamyr 2012 7:32
«Toıdyń bolǵanynan boladysy qyzyq» degendeı, kópten jyrlanyp asyǵa kútken kún de taıap qaldy. Endi quqyq qorǵaý organdary qyzmetkerleriniń arasyndaǵy shyn mánindegi adal adamdar anyqtalatyn bolady. Elbasynyń alǵa qoıyp otyrǵan talaby sondaı. Ol talapty Joǵary attestattaý komıssııasy júzege asyrmaq. Demek, el-jurtty aldap, bılikti jerge qaratyp júrgen aramtamaq ozbyrlar men ekijúzdiler, ar-uıatyn satqandar, qolyn paraǵa bylǵap ózin de, otbasyn da aram aspen toıyndyrǵandar aradan alastatylmaq. Al ondaılardyń az emes ekenin eskersek, saralaýǵa túsetin 110 myń adamnyń birazy qyzmetimen qoshtasatyny anyq.
Beısenbi, 10 mamyr 2012 7:32
«Toıdyń bolǵanynan boladysy qyzyq» degendeı, kópten jyrlanyp asyǵa kútken kún de taıap qaldy. Endi quqyq qorǵaý organdary qyzmetkerleriniń arasyndaǵy shyn mánindegi adal adamdar anyqtalatyn bolady. Elbasynyń alǵa qoıyp otyrǵan talaby sondaı. Ol talapty Joǵary attestattaý komıssııasy júzege asyrmaq. Demek, el-jurtty aldap, bılikti jerge qaratyp júrgen aramtamaq ozbyrlar men ekijúzdiler, ar-uıatyn satqandar, qolyn paraǵa bylǵap ózin de, otbasyn da aram aspen toıyndyrǵandar aradan alastatylmaq. Al ondaılardyń az emes ekenin eskersek, saralaýǵa túsetin 110 myń adamnyń birazy qyzmetimen qoshtasatyny anyq. Soǵan oraı quqyq qorǵaý organdary qatary, Prezıdent Joldaýynda aıtylǵandaı, minsiz qyzmetkerlermen tolyǵyp, budan bylaı árqaısymyz da tek zańdy quqymyzdyń qorǵalatynyna bek senimdi bolatynymyz sózsiz.
Memleket basshysynyń Joldaýyndaǵy quqyq qorǵaý organdary qyzmetkerlerin kadrlyq jańǵyrtý týraly tapsyrmalary men olardy kezekten tys attestattaý týraly Jarlyǵy tekke jarııalanbaǵanyn qazir jurttyń bári biledi. Halyqtyń quqyq qorǵaý organdarynyń qyzmetine senimi azaıyp barady. Olardyń birqatary jurttyń quqyn qorǵaýmen emes, ózderiniń qulqyn qamyn qamdap ketti. Sóıtip talaıy ustaldy, isti boldy, sottaldy. Prezıdent Ákimshiliginiń basshysy Aslan Mýsın óziniń «Quqyq qorǵaý organdarynyń jańa beınesi: Tıimdilik, transparenttilik jáne kásibılik» atty jarııalanymynda: «Búginde quqyq qorǵaý organdarynyń qyzmeti sapaly jańǵyrtýdy talap etedi. Bul salada memlekettiń quqyqtyq damýyna tejeý keltiretin birqatar obektıvti sebepter bar. Birinshiden, kóbine-kóp qoǵam quqyq tártibi organdaryn kúshtik ınstıtýttar retinde qabyldaıdy. Olardyń jumysyndaǵy profılaktıka kóp jaǵdaıda ekinshi kezekte qalyp jatady. Ekinshiden, quqyq qorǵaý organdary sybaılas jemqorlyqqa beıim. 2011 jyly sybaılas jemqorlyq quqyq buzýshylyq bárinen de ishki ister organdarynda jıi tirkelgen…», dep kemshilikterdi atap-atap kórsetti.
Al endi mundaı kórsetkish adamdy qýanta qoıatyndaı jaǵymdy jáıt emes ekeni belgili. Munyń astarynda tek jeke quramnyń qylmysy ǵana emes, osyǵan jol berip otyrǵan, muny baqylaýǵa alýǵa tıisti basshylyqtyń aıyby barlyǵy aıdan anyq kórinedi. Bılikti osynshama jerge qaratqan ondaı respýblıkalyq, oblystyq, aýdandyq deńgeıdegi basshy quramdaǵy birqatar shendilerdiń sheninen aıyrylyp, jazasyn tartatyn sáttiń kelgen kezi osy. Jeke quramnyń, joǵary oqaly kıimdilerdiń mundaı qylmysqa barýyna úlkendi-kishili basshylyqtyń kinási joq dep eshkim aıta almas. Endeshe sol basshylyq attestattaýdan ótkende túgel demeı-aq qoıalyq, ár jerde qyltıǵan bir taldaı qatary sırep qalatyndyǵyna kámil senemiz. Áıtpese, Elbasy, halyq osynshama mán berip, úlken úmit kútip otyrǵan attestattaýdan ne qaıyr bolmaq?
Sondyqtan qara qyldan attaǵan, ádildikti arym dep saqtamaǵan, ar-uıatty taptap talaıdyń jazyqsyz kóz jasyna qalǵan jandar bolsa ózi biletin ádiletsiz isteri úshin attestattaýdan buryn-aq qyzmetten óz erikterimen ketkenderi jón-aý deımiz. Joǵary attestattaý komıssııasynan quqyq qorǵaý organdarynyń basshylyǵy qalaı ótedi, tómengi jaq ta tap sol úrdispen jalǵasyn tabatyny anyq. Para alǵan nemese jazyqsyz jandy naqaq qaralaǵan qyzmetker attestattaýda eskertý estip, qaıta oryntaǵyna jantaıatyn bolsa, onda bizdiń elimizde eshýaqytta sybaılastyq syrqaty joıylmaıdy. Sondyqtan bul kezekten tys jáne alǵashqy attestattaý eken, endeshe alaıaqtar men jemqorlarǵa, biliksizder men topastarǵa qasıetti quqyq qorǵaý organdary qatarynda oryn joq ekenin birden kesip bildirý qajet. Bul qatarǵa jańadan qosylatyn jany taza qyzmetker úshin de úlken kómek. Demek, erteńgi kúni eshkim de ar-uıatyn jıyp qoıyp, bılikti teris paıdalanýǵa bara qoımaıdy. Al eger sol erteńgi kúni attestattaýdan ótken qyzmetkerler qaıtadan burynǵy ánine basatyn bolsa, onda el-jurtty shýlatqan myna isimizben kim kimdi aldaǵan bolyp shyǵamyz?
Sondyqtan Elbasynyń Jarlyǵy múltiksiz jáne eń bıik talap deńgeıinde oryndalýǵa tıis dep bilemiz. Al onyń oryndalýy quqyq qorǵaý organdarynyń erteńgi kúni halyq aldyndaǵy saýatty da salamatty atqarylǵan jumys nátıjesinen kórinbek. Demek, bul synaqqa syn áli alda. Sony osy bastan esten shyǵarmaǵan jón-aý.
Aleksandr TASBOLATOV.
