Kórmeniń ashylý saltanatyna QR Ulttyq mýzeıiniń dırektory A. Nurazhan, О́zbekstandaǵy Qazaqstannyń Tótenshe jáne ókiletti elshisi D. Satybaldy, О́zbekstan Respýblıkasy mádenıet vıse-mınıstri K. Akılova, О́zbekstan Memlekettik óner mýzeıiniń dırektory V. Faızıeva qatysty.
Kórme ashylar aldynda buqaralyq aqparat quraldary ókilderi úshin eki memlekettiń resmı ókilderiniń qatysýymen baspasóz otyrysy uıymdastyryldy.
Sharada Qazaqstan men О́zbekstan arasyndaǵy yntymaqtastyq qarym-qatynasty nyǵaıtý maqsatynda mýzeılerdiń mádenı baılanysynyń mańyzy týraly jan-jaqty sóz qozǵaldy.
«Uly Dala: tarıh jáne mádenıet» kórmesiniń maqsaty — Qazaqstannyń tarıhı-mádenı baı murasymen turǵyndardy tanystyrý.
Bul kórme jobasy Belarýs, Ázerbaıjan, Reseı, Qytaı, Polsha, Ońtústik Koreıa, Tatarstan Respýblıkasy sekildi elderde tabysty ótkizilgen. «Altyn adam» kórmesin atalǵan elderde mıllıonnan astam kórermen tamashalady. Joba úsh jyl ishinde iske asyrylady, 2020 jyldyń sońyna deıin kórme álemniń 20 jýyq elinde ótkiziledi. Atalǵan kórme bıyl Malaızııa, Italııa, Túrkııa jáne Grýzııa mýzeılerinde uıymdastyrylmaq. Al keler jyly AQSh, Avstrııa, Fransııa, Shveısarııa men Germanııanyń mýzeılerinde ótkiziledi.
Kórmeniń saltanatty ashylýynda QR Ulttyq mýzeıiniń dırektory Almaz Nurazhan qazaqstandyqtardy shaqyrtyp, ystyq yqylaspen qabyldaǵan О́zbekstan Memlekettik óner mýzeıiniń ujymyna alǵysyn bildirdi.
«Altyn adamnyń álem mýzeılerine sherýi» kórme jobasy Tuńǵysh Prezıdent – Elbasy N. Nazarbaevtyń “Rýhanı jańǵyrý” baǵdarlamasy aıasynda qolǵa alynǵan bolatyn. Búgin, mine, jetinshi memleketke taban tiredik. О́zbekstandyqtar bizge jat emes, tarıh, mádenıet, salt-dástúr, dinı uǵymdarymyz ortaq qalyptasqandyqtan, búgingi kórme sizdergi qyzyqty bolady dep oılaımyn», — dedi A. Nurazhan.
О́zbekstan Memlekettik óner mýzeıindegi kórmege kıimi altyn, al bas kıimi jebe, qar barysy, arqar, jylqy jáne qus beınesindegi altynmen áshekeılengen «Altyn adamnyń» rekonstrýksııasy usynylyp otyr. Sonymen qatar atalǵan kórmeden saq jaýyngerimen (arheologtardyń pikirleri boıynsha 17-18 jastar shamasynda) birge jerlengen erte temir ǵasyrynyń (b.d.d V-IV ǵǵ.) arheologııalyq oljalarynyń kolleksııasyn tamashalaýǵa bolady.
Kórmede sol sııaqty Taqsaı (Batys Qazaqstan oblysy), Taldy-2 (Qaraǵandy oblysy) jáne Berel (Shyǵys Qazaqstan oblysy) syndy saq qorǵandarynan tabylǵan arheologııalyq biregeı oljalar da kórsetildi. Esik qorǵanynan tabylǵan zattar arasynda ejelgi jazba eskertkishteriniń biri rýna jazýmen jazylǵan jazbasy bar kúmis tostaǵannyń ekspozısııadan alar orny erekshe.
Kórmege Qazaqstan Respýblıkasy Ulttyq mýzeıiniń qorlarynan barlyǵy 127 zat usynyldy. Kórmege usynylǵan Qazaqstannyń ejelgi jáne ortaǵasyrlyq óneriniń jaýharlary — bul Eýrazııa dala mádenıeti murasynyń ózindik ereksheligin kórsetetin, burynǵy dáýirdiń esimderi belgisiz sheberleri jasaǵan ǵajap týyndylardyń az ǵana bóligi.
