2018 jyldyń qorytyndysy boıynsha shet memleketterde 250-den astam taqyryptyq is-shara, olardyń ishinde 130-dan asa kezdesý, 34 «dóńgelek ústel», 28 kitap jáne fotokórme, Qazaqstannyń tarıhy jáne mádenıeti týraly kınotýyndylardyń kórsetilimderi ótkizildi. Sheteldik BAQ-ta atalǵan taqyrypta 150 maqala jaryq kórdi.
Álemdik qaýymdastyqty Qazaqstannyń mádenı murasymen tanystyrý maqsatynda 2017-2018 jyldary mádenıet jáne óner máselelerimen aınalysatyn sheteldik jýrnalısterge arnalǵan úsh baspasóz týry uıymdastyryldy. 21 elden kelgen sheteldik BAQ-tyń 50-ge jýyq ókili Qazaqstan elordasynyń jáne Almaty qalasynyń mańyzdy mádenı nysandaryn aralap, Shymkent qalasynyń jáne Túrkistan men Mańǵystaý oblystarynyń kıeli jerlerinde boldy.
«Rýhanı jańǵyrý» taqyrybynda Syrtqy ister mınıstrliginiń apta saıyn basylyp shyǵatyn aǵylshyn tildi «Astana calling» aqparattyq bıýlleteninde detıisti materıaldar jaryq kórip turady.
Asa mańyzdy is-sharalardyń ishinde Qazaqstannyń 2018 jáne 2019 jyldary London kitap jármeńkesine qatysýyn atap ótýge bolady. Atalǵan is-sharalar barysynda álemdik aýdıtorııanyń nazaryna qazaq ádebıetiniń klassıkteri Muhtar Áýezovtyń «Qaraly sulý jáne basqa da áńgimeler», Oralhan Bókeevtiń «Kisi kıik jáne basqa da áńgimeler», Gerold Belgerdiń «Tańdaýly shyǵarmalary» jáne basqa týyndylar usynyldy.
Qazirgi tańda «Jahandaǵy zamanaýı qazaqstandyq mádenıet» jobasy aıasynda «Ulttyq aýdarma bıýrosy» qoǵamdyq qory Qazaqstannyń sheteldegi elshilikteriniń qoldaýymen qazaq ádebıetiniń eki tomdyq antologııasyn BUU alty resmı tiline aýdarý jumysyn júrgizýde.
