Búgin, 15-sáýirde Atyraýda tuńǵysh ret kóshetterdiń jergilikti turǵyndarǵa tegin taratylý aksııasy ótti. «Arnaýlyavtobaza» JShS-niń aýmaǵynda saǵat 10-nan bastap turǵyndar kezekke turdy. Turǵyndarǵa aǵashtyń úsh túri usynyldy - úıeńki, sheten jáne qaraǵash.
- Aǵashtardy alý úshin turǵyndar ózderiniń telefon nómirin jáne meken-jaıyn qaldyrý kerek. 5 kóshet alyp, odan ári tıisti kútim men sýarýdy qamtamasyz etýi qajet. Arnaıy qurylǵan komıssııa turǵyndardyń is-áreketteriniń oryndalýyn baqylaıdy, - dedi qalalyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń óndiristik-tehnıkalyq sektorynyń jetekshisi Akesen Ibragımov.
Akesen Ibragımovtyń aıtýynsha, kóshetter Inder aýdanynan ákelingen, áleýmettik mekemelerde – balabaqshalar men mektepterde otyrǵyzylady.
Aıta keteıik, Atyraýda eki aılyq sanıtarlyq tazalaý jalǵasýda. Sáýir senbilikteriniń aıasynda oblys ortalyǵynda jasyl jelek otyrǵyzý josparlanǵan.
