«О́ndiristiń ósimine et ónimderi, balyq ónimderi, sút ónimderi, astyqty tereńdete óńdeý, maıly daqyldardy óńdeý jáne qant óndirisi aıtarlyqtaı úlesin qosatyn bolady. Et óndirý ónerkásibin damytý 4 et kombınatyn jańǵyrtý jáne jyldyq qýattylyǵy 27 tonna bolatyn et óńdeıtin 3 jańa et kombınatyn salý esebinen qamtamasyz etiletin bolady, bul 8%-ǵa ósimdi qamtamasyz etedi», dedi S.Omarov.
Onyń aıtýynsha, 2019 jylǵy aqpanda Almaty oblysynda jyldyq qýattylyǵy 8 myń tonna bolatyn Empaır Fýd (Iran) et óńdeý kesheni paıdalanýǵa berildi.
«Bıyl jylyna 5 myń tonna et óńdeıtin «Erementaý Aqbas» JShS et óńdeý keshenin paıdalanýǵa berý josparlanýda. Qazir Taıson Fýd (AQSh), Danbıa (Ulybrıtanııa), Grand Farm (QHR), Baýmann (Germanııa), Inalka/Kremonını (Italııa), jáne Sedar Mıts (Avstralııa) sııaqty transulttyq kompanııalardy tartý boıynsha jumys júrgizilýde», dedi ol.
Mınıstrliktiń aqparatyna sáıkes, jıyntyq qýattylyǵy 23 myń tonna bolatyn 4 sút óńdeıtin kásiporyndy jańǵyrtý esebinen sút óńdeý kólemin arttyrý qamtamasyz etiledi.
«Olar qyshqyl sút ónimderin, sary maı men irimshiktiń túrlerin óndiretin «Emıl» JShS (ShQO), «Gormolzavod» JShS (Aqmola oblysy), «Dep» JShS (Qostanaı oblysy) jáne «Esil maı shaıqaý kombınaty» JShS (Aqmola oblysy), sondaı-aq Túrkistan oblysyndaǵy «Golden Camel Group» JShS bolyp tabylady, bul kásiporyndar aǵymdaǵy jyly óndiris kólemin 12%-ǵa ulǵaıtýǵa múmkindik beredi», dedi S.Omarov.
Budan soń, ol zamanaýı tehnologııalardy qoldana otyryp, krahmal, glıýten, glıýkazo-frýktoza shárbaty sııaqty astyq túrleriniń tereń óńdeletinin aıtty.
«О́tken jyly Soltústik Qazaqstan oblysynda bıdaıdy tereń óńdeıtin, 55 myń tonna krahmal, 5 myń tonna glıýten óndiretin qýattylyǵy táýligine 250 tonna shıkizat bolatyn «BıoOpereıshn» JShS-nyń ınnovasııalyq zaýyty iske qosyldy. Aǵymdaǵy jyldyń qorytyndylary boıynsha 1,2 myń tonna glıýten jáne 4 myń tonna krahmal óndirý josparlanýda. Sondaı-aq, Qostanaı oblysynda osyǵan uqsas BıoGreın jobasyn iske asyrý bastaldy», dedi mınıstr.
Onyń aıtýynsha, maıly daqyldar óndirisin arttyrýdy «Taıynsha Maı» JShS jáne «EFKO Almaty» JShS sııaqty transulttyq kompanııalardyń qatysýymen bolatyn jobalar qamtamasyz etetin bolady.
«О́simdik sharýashylyǵy ónimderin qaıta óńdeý salasynda, atap aıtqanda kartopty qaıta óńdeý boıynsha jyldyq qýattylyǵy 140 myń tonna bolatyn Farm Frıts (Nıderland) transulttyq kompanııasynyń qatysýymen iri ınvestısııalyq jobany iske asyrý josparlanyp otyr. Osy jobany iske asyrýǵa Almaty oblysy ákimdiginiń jaǵdaı jasaýyn suraımyz», dedi S.Omarov.
Atalǵan jumysty eksportqa baǵdarlanǵan salalardy damytýǵa bólingen qarajat sheńberinde qazirgi zamanǵy óńdeýshi óndiristerdi qarjylandyrý arqyly jalǵastyrý josparlanyp otyr.
«О́ńdeýshi qýattylyqtardy shıkizatpen qamtamasyz etý maqsatynda 2019 jyly agroónerkásiptik keshenniń basym baǵyttary boıynsha salalyq baǵdarlamalardy iske asyrý jalǵasatyn bolady. Mal sharýashylyǵynda aǵymdaǵy jyly etti baǵyttaǵy 2000 otbasylyq ferma qurý jáne sıyr etin óndirýdi 10%-ǵa arttyrý josparlanýda», dedi Aýyl sharýashylyǵy mınıstri.
Sondaı-aq ol qus ósiretin fabrıkalardy keńeıtý kerek ekenin aıtty.
«Qus ósirý boıynsha qoldanystaǵy 8 qus fabrıkasyn keńeıtý kútilýde, nátıjesinde qus etin óndirý 11%-ǵa artatyn bolady. Budan basqa, jalpy qýattylyǵy 18 myń bas bolatyn 19 óndiristik jáne 31 otbasylyq taýarlyq sút fermasy qurylady», dedi ol.
