Esterińizge sala keteıik, Elızabet Tursynbaeva jaqynda Japonııanyń Saıtama qalasynda ótken mánerlep syrǵanaýdan álem chempıonatynda kúmis júldeger atandy. Bul - elimizde atalmysh sport túrinen qyzdar arasynda qol jetken eń joǵary tabys.
Sondaı-aq, qazaqstandyq mánerlep syrǵanaýshy álemdik tarıhta birinshi ret tórt aınalymdyq salhovty qatesiz oryndady. Japon jerinen júldemen qaıtqan sańlaq óziniń atamekeni - Syr óńirine arnaıy keldi. Ol búgin óziniń júldesine arnalǵan respýblıkalyq týrnırge qatysady.
Elızabet Reseı astanasy - Máskeý qalasynda dúnıege kelgen. Onyń ákesi - Baıtaq Qyzylorda oblysynyń týmasy. Sondyqtan Elızabet halyqaralyq jarystarda elimizdiń atynan synǵa túsip, Syr óńiriniń dańqyn aspandatyp keledi.
Muz aıdynda myń burala bıleıtin sportshyǵa jergilikti basshylyq qarjylaı qoldaý jasap júrgeni belgili. Qyzylorda oblysynyń ákimi Qyrymbek Kósherbaev Syr óńirine arnaıy kelgen halyqaralyq dárejedegi sport sheberi Elızabet Tursynbaevamen kezdesti. Ony álem chempıonatyndaǵy tolaǵaı tabysymen quttyqtady.
«Biz biraz jyl buryn muz aıdyny sport keshenin saldyq. Qazir ol oryn Syr jastarynyń erekshe yqylaspen baratyn mekenine aınaldy. Men osy ortalyqta bolashaqta elimizdiń namysyn halyqaralyq arenalarda qorǵaıtyn daryndy sportshylar ósedi dep senemin. Aımaǵymyzda egemen elimizdiń ataǵyn álemge áıgili etetin mánerlep syrǵanaýshy-chempıondardyń tutas shoǵyry bolsyn! Elızabet, seniń esimiń búkil álemge tanymal bolýyna tilektespin», dedi aımaq basshysy.
О́ńirdiń sport salasynyń damýyna qosqan eleýli úlesi úshin Elızabet Qyzylorda oblysynyń Qurmet gramotasymen marapattalyp, oǵan 2 mln teńgeniń sertıfıkaty tabystaldy. О́z kezeginde Elızabettiń ata-anasy oblys ákimine jáne Syr jurtshylyǵyna qyzdaryna qoldaý kórsetkeni úshin alǵys aıtty.
«Men úshin ata-anam men jattyqtyrýshylarymnyń kómegi erekshe ról atqardy. Árıne, maǵan kórsetken Sizdiń qoldaýyńyz ben jerlesterimniń senimi óte mańyzdy. Sizderge zor alǵys aıtamyn, bul - bizdiń ortaq jeńisimiz», dedi Elızabet Tursynbaeva.
Búgin Qyzylordada «Muz aıdyny» kesheninde Elızabet Tursynbaevanyń júldesi úshin alǵashqy «Kóktem juldyzdary» respýblıkalyq ashyq jasóspirimder týrnıri bastalady. Týrnırdiń ashylý saltanatynda Elızabet te óner kórsetedi. Aldaǵy ýaqytta «Kóktem juldyzdary» týrnıri jyl saıyn ótkiziledi dep josparlanyp otyr.
