Aqyndar, sýretshiler, jazýshylar, ánshi-kúıshiler shyǵarmashylyǵyn jıyp qoıyp, «qara qazan, sary balanyń» qamyn ǵana kúıttep ketti. Sondaı qıyn kezdiń ózinde Elbasy Nursultan Nazarbaev 2000 jyldy Mádenıet jyly dep jarııalady. Osyǵan oraı oblystyń sol kezdegi ákimi О́mirzaq Shókeev qostanaılyqtardyń esinde kópke deıin qalatyn eki ıgi is jasap edi. Aldymen Qostanaı óńirinde jutap turǵan ulttyq ónerdiń boıyna qan júgirtip, qazaq drama teatryn ashty. Ekinshiden, óner men mádenıet salasy qyzmetkerlerine áleýmettik qoldaý kórsetý maqsatynda «Oblys ákiminiń syılyǵyn» taǵaıyndady. Artynsha ony ózi «Mesenattar syılyǵy» dep ózgertti. Sodan beri áleýmettik salany qoldaýdyń ádemi kórinisi men úlgisine aınalǵan osy syılyq úzilgen emes, qaıta jandanyp, túrlenip, qanatyn keńge jaıdy. Keıinirek ol «Mesenattar klýby» degen atpen uıym bolyp qurylyp, ony belgili bıznesmen Vasılıı Rozınov úzilissiz basqaryp keledi.
Qostanaıda jyldaǵy dástúrmen «Mesenattar klýbynyń» 19-shy ret syılyq tapsyrý saltanaty bıyl oblys ortalyǵyn kóriktendirip turatyn ásem ǵımarattar qataryna qosylǵan Jastar saraıynyń atshaptyrym konsert zalynda ótti. 19 jyldan beri 248 mıllıon teńgeni quraǵan 477 syılyq belgilenip, ony oblys óńirindegi óner, mádenıet, ǵylym, jýrnalıstıka, taǵy basqa áleýmettik salalardaǵy 498 talant pen úzdik 41 ujym alypty. Syılyq alǵandardyń arasynda kóziniń tirisinde belgili satırık jazýshy, etnograf Seıit Kenjeahmetov bar edi. Sonymen qatar aıtysker aqyn Ásııa Berkenova, tarıhshy ǵalym Amanjol Kúzembaıuly, aqyn Aqylbek Shaıahmet, ólketanýshy Shóptibaı Baıdildın, kompozıtorlar Qalıbek Derbsaldın, Baqytjan Sáýekenov, sýretshiler Georgıı Sokov, Nıkolaı Torshın, taǵy basqalar bolyp jalǵasa beredi.
– «Mesenattar klýbynyń» qyzmeti búginde «Rýhanı jańǵyrý» baǵdarlamasyn júzege asyrýdaǵy «Týǵan jer» jobasynyń aıasynda tereń mazmunmen baıı tústi. Osy bedeldi saltanatty shara ótkizilip otyrǵan Jastar saraıy da demeýshilerdiń kómegimen salynǵan bolatyn. Mesenattar áleýmettik jaǵynan áljýaz kóptegen otbasylarǵa, jetim balalarǵa kómektesti. Bıyldyń ózinde birneshe kóp balaly otbasyna baspana alyp berdi. Qysqasy, «Mesenattar klýby» qazir Qostanaı oblysynyń atyn asqaqtatatyn aıdarly isteriniń birine aınaldy, – dedi óńir basshysy Arhımed Muhambetov.
Bıyl «Mesenattar klýbynyń» «Qazyna» jáne jastarǵa arnalǵan «Shabyt» syılyǵy 13 atalym boıynsha ıelerin tapty. Onyń ishinde «Teatr», «Ádebıet», «Ǵylym», «Vokal», «Mýzyka», «Horeografııa», «Jıvopıs», «Aýyl janashyry», «Mádenı mura», «Bilim», «Jýrnalıstıka» sııaqty atalymdar bar. Mysaly, «Mesenattar klýbynyń» arnaıy syılyǵyn elimizdegi saýsaqpen sanarlyqtaı satırık áıelderdiń biri Kúlásh Baıdaly da aldy. Ol bul syılyqqa ádebıet pen jýrnalıstıkada etken kóp jylǵy eńbeginiń syrtynda, jaqynda ǵana jaryq kórgen «Ury oı» atty kitaby úshin ıe boldy.
– Mesenattarǵa rahmet! Shyǵarmashylyqpen aınalysqan adamdardyń qaltasy eshqashan qalyń bolǵan emes. Áleýmettik jaǵynan qoldaýdy kerek etetinimiz ras. Meniń qolyma tıetin qarjyǵa bolashaq kitabymdy shaǵaramyn, densaýlyǵymdy túzeımin. Jaqsy emes pe? – deıdi K. Baıdaly qýanyshyn jasyra almaı. Sonymen qatar qýanysh ıeleriniń qatarynda jas ǵalym Indıra Beıisheva, teatr rejısseri Álııa Sadyqova, qobyzshy Nazgúl Moldahmetova, pedagog-horeograf Iýlııa Pınjenına, estelik kitaby úshin Uly Otan soǵysynyń ardageri Pavel Dasenko, aldynan talaı mýzykant túlep ushqan qart pedagog Erkin Qojahmetov, jas jýrnalıs-qalamgerler Qýanysh Esqabylov, Asylan Qanǵojın, taǵy basqalar bar.
Belgili jazýshy Ǵumar Ahmetchın «Mesenattar klýby» qazylar alqasynyń 2000-jyldardan beri turaqty múshesiniń biri.
– Mesenattyq – tarıhta bar dástúr. Bizdiń halqymyz tarıhynda da onyń tamasha mysaldary bolǵan. Muny bir jaǵynan rýhanı saladaǵy taza eńbektiń tarazysy da der edim. Mysaly, bıyl «Qazyna» syılyǵyn alǵan aýdarmashy Abdirahman Dosty men talantty qalamgerler qataryna qosamyn, respýblıkadaǵy qarymdy aýdarmashylardyń biri. Ol jaqynda óziniń eki tomdyq aýdarmalaryn jaryqqa shyǵardy. A.Dos kóptegen qazaq aqyny men jazýshysyn orys oqyrmandaryna tanystyrdy. Qazylar alqasy onyń «Qazyna» syılyǵyn alýyn biraýyzdan qoldady. «Qazyna» syılyǵy 1 mıllıon 600 myń teńge boldy, – deıdi Ǵumar Ǵarıfuly.
«Mesenattar klýby» músheleriniń qatary jyldan-jylǵa tolyǵyp keledi. Bıyldyń ózinde oǵan on kásipker múshelikke ótti. «Mesenattar klýbynyń» syılyǵyn tapsyrý saltanatyna Atymtaı-jomarttardyń ózderi de qatysady, qýanyshty birge tamashalaıdy. «Jaqsynyń jaqsylyǵyn aıt – nury tasysyn» degen ǵoı, Arhımed Begejanuly osy saltanatta jyl basynan beri 22 otbasyn baspanaly etken «Baqytty otbasy» jobasyna belsene qatysqan bıznes ókilderiniń jeke-jeke atyn atap, túsin tústep aıtty.
– Igi iske ketken aqsha – shyǵyn emes. Biz qaıyrymdylyq sharalaryna úzilissiz qatysyp kelemiz. Qostanaı qalasyndaǵy 8 balany jalǵyz asyrap otyrǵan Janat Shákirovaǵa jaqynda ǵana 3 bólmeli jańa páter syıladyq. Naýryz aıynda Taran aýdanyndaǵy 5 balasy bar Smırnovtardyń baspanasyn jańalap berdik, endi Qostanaı aýdanyndaǵy 5 bala tárbıelep otyrǵan Kımder otbasyna da úı salyp beremiz degen josparymyz bar, – deıdi «BK-Stroı» qurylys kompanııasynyń prezıdenti Igor Kım.
– Halqymyzda «jaqsylyq ekken alǵys orady» degen danalyq bar. Bizdiń kásipkerlerimiz ben bıznes-áriptesterimiz halyqtyń áljýaz toptaryn áleýmettik qoldaýǵa jáne týǵan jerdiń túleýi úshin qolǵa alynatyn basqa da ıgi isterge belsene qatysa beredi dep senemin, – dedi Arhımed Begejanuly saltanatta.
Jomarttyq ta eń jaqsy qasıetterdiń biri. «Mesenattar klýby» bul joly 40-qa jýyq syılyq tapsyryp, aqjarma qýanyshtarǵa kýá boldy. Saltanatty sharanyń sońy úlken konsertke ulasty.
QOSTANAI
