1967 jyly QazMý-di támamdap, Ádil Dúısenbek ekeýmiz jumysqa turý úshin «Sosıalıstik Qazaqstan» gazetine joldama aldyq. Ol kezde bas redaktor Uzaq Baǵaev, birinshi orynbasary Balǵabek Qydyrbekuly bolatyn. Ortalyq Komıtettiń gazeti sanalatyn «SQ»-ǵa qoıylatyn talap kúshti, ujym arasyndaǵy tártip óte qatań edi. Ádebı qyzmetker bolǵannan keıin QazTAG-tan túsetin materıaldardy men baqylap, qadaǵalaıtynmyn. Uzaq Baǵaev «Eger «Kazahstanskaıa pravdada» memleket basshylary týraly málimet berilip jatsa, sen túnniń bir ýaǵy bolsa da dereý menimen habarlas. Aqyldasqannan keıin ony biz de gazetimizdiń birinshi betine salaıyq», – dep únemi eskertip otyratyn.
Ol kezdegi talap sondaı boldy. «Kazahstanskaıa pravdanyń» birinshi betinde jaryq kórgen maqala «Sosıalıstik Qazaqstanǵa» shyqpaı qalsa, ujymnyń basyna qater tónetin.
Ol kezderi túngi kezekshilikti eki adam atqaratyn. KSRO-ny basqarǵan Nıkıta Sergeevıch Hrýshev pen Leonıd Ilıch Brejnevtiń baıandamalarynan bir jol da qysqartýǵa bolmaıtyn. Baspahanada túndeletip, qatty sharshaıtynbyz. Sol kezderi tyńkóz bolyp jumys istegen Asylbaev, Sháripova, Daırabaevanyń eńbekterin erekshe atap ótýge bolady.
Keı ýaqyttarda tyńkóz bolyp, tań atqansha korrektorlardan keıin betterdi oqıtynmyn. Talaı ret bir bettegi 3-4 joldy qorǵasyndy basqa betterge salyp, ornyn aýystyrǵan ýaqytta baspahananyń lınotıpısterin shaqyrtyp, betterdi túzetip gazetti osylaı shyǵarý meniń kezegimde eki-úsh ret bolǵan. Eger 3-4 jol qorǵasyndy ár bettiń óz ornyna qoımaı, gazet shyǵyp ketse, jumysyńmen qoshtasa ber.
Tyńdaýshy, tyńkóz, korrektor mamandyqtary ártúrli bolǵanymen árqaısynyń óziniń qıynshylyqtary bolady. Sol qıynshylyqtardy jeńe bilgen adam ǵana jýrnalıstıkanyń naǵyz mamany bolyp qalyptasady.
Men osy sátti paıdalana otyryp, ózimniń qarashańyraǵym – «Egemen Qazaqstan» gazetin ǵasyr mereıtoıymen quttyqtap, ujymǵa zor densaýlyq jáne shyǵarmashylyq tabys tileımin.
Ǵalym QURASh
