Bıznesti damytýdaǵy keden kómegi
Senbi, 30 maýsym 2012 7:55
Búgingi tańda keden salasynda júzege asyrylyp jatqan keshendi ózgeristerdiń basty baǵyty kedendik rásimderdi ońtaılandyrý jáne jedeldetý, ákimshilik kedergilerdi joıýǵa baǵyttalǵan keden qyzmeti men kásipkerlik arasyndaǵy ózara árekettesýdiń tolyqqandy júıesin damytý bolyp tabylady. Bul baǵytta talaı ıgi sharalar júzege asyp jatyr. Sonyń biri dep keden salasynda kásipkerler úshin qajetti ýákiletti ekonomıkalyq operator degen jańa ońtaılandyrý jolyn aıta alamyz. Degenmen, osy másele boıynsha bizge habarlasyp jatqan kásipkerler de az emes.
Senbi, 30 maýsym 2012 7:55
Búgingi tańda keden salasynda júzege asyrylyp jatqan keshendi ózgeristerdiń basty baǵyty kedendik rásimderdi ońtaılandyrý jáne jedeldetý, ákimshilik kedergilerdi joıýǵa baǵyttalǵan keden qyzmeti men kásipkerlik arasyndaǵy ózara árekettesýdiń tolyqqandy júıesin damytý bolyp tabylady. Bul baǵytta talaı ıgi sharalar júzege asyp jatyr. Sonyń biri dep keden salasynda kásipkerler úshin qajetti ýákiletti ekonomıkalyq operator degen jańa ońtaılandyrý jolyn aıta alamyz. Degenmen, osy másele boıynsha bizge habarlasyp jatqan kásipkerler de az emes. Jalpy, búginde “Ýákiletti ekonomıkalyq operator” mártebesindegi syrtqy ekonomıkalyq qyzmet qatysýshylary taýarlar men kólik quraldaryn belgili bir keden resimderine málimdeý men kedendik tazartýda artyqshylyqtardy paıdalanýda. Atalmysh mártebeni alý jáne bıznesti damytýda ony tıimdi paıdalaný joldary týraly bizge Qarjy mınıstrligi Kedendik baqylaý komıtetiniń mamany Gaýhar Aqbasova jan-jaqty aıtyp berdi.
Onyń áńgimeleýine qaraǵanda, ýákiletti ekonomıkalyq operator bul arnaıy ońtaılandyrylǵan resimderdi tájirıbe júzinde qoldanýyna múmkindik beriletin tulǵalar sanaty bolyp tabylady. Arnaıy kedendik ońtaılandyrýlardy paıdalaný kedendik operasııalardy júzege asyrýda qarjylyq jáne ýaqyt shyǵyndaryn azaıtyp, logıstıkalyq toraptardy jetildirýge jol ashady.
Ýákiletti ekonomıkalyq operator mártebesi zańdy tulǵaǵa ókiletti ekonomıkalyq operatorlar tizimine engizý týraly kýálik berilý arqyly júzege asyrylady. Ýákiletti ekonomıkalyq operatorlar ınstıtýty uǵymy – kedendik rásimderdi ońtaılandyrý jáne birizdendirý týraly Halyqaralyq konvensııa jáne qaýipsizdik pen álemdik saýdany jeńildetý standarttarynyń usynysyna sáıkes, Otandyq keden zańnamasyna engizilgen jańalyq bolyp tabylady. Atalmysh uǵymnyń bolýy jáne syrtqy ekonomıkalyq qyzmet qatysýshylaryna bul mártebeni berý keden qyzmeti men bıznes-qoǵamdastyǵy arasyndaǵy áriptestiktiń negizgi nyshany ekeni anyq.
Qazirgi ýaqytta Qazaqstanda mundaı mártebe 18 zańdy tulǵaǵa, ıaǵnı telekommýnıkasııaǵa qyzmet kórsetý qural-jabdyqtaryn, qurylys materıaldaryn, shına, farmasevtıkalyq taýarlardy, azyq-túlik, qaǵaz ónimderin shetelden ákeletin iri jáne orta kásipkerlik sýbektilerine berilgen. Osy kásipkerlerdiń pikirinshe, mundaı mártebeniń bolýy olardyń syrtqy ekonomıkalyq qyzmetterin aıtarlyqtaı jeńildetedi. Bıýdjet túsimderiniń ulǵaıýy memleket úshin de paıdaly, ári keden men bıznes arasyndaǵy ózara tıimdi áriptestikti nyǵaıta túsedi.
Sonymen qatar, atalǵan mártebeni alý arqyly beriletin jeńildikter de bar ekenin kásipkerler jasyrmaıdy. Atap aıtqanda, kedendik deklarasııany usynýǵa deıin taýarlardy jiberý, ýaqytsha saqtaý quqyǵy jáne operatordyń jeke aýmaǵynda taýarlardy jiberýge baılanysty kedendik operasııalardy júzege asyrý múmkindigi, kedendik tranzıt kezinde kedendik baj jáne salyqtardy tóleýdi qamtamasyz etý qajettiginiń bolmaýy deıdi. Kedendegi mundaı jeńildikterdiń bızneske bereri kóp.
Bul – kedendik shekarany ótý rásimin jedeldetý, qarjylyq shyǵyndardy azaıtý, taýarlardy taýarlar deklarasııasyn usynýǵa deıin paıdalaný, aldyn ala jáne elektrondy deklarasııalaý rásimin qoldaný múmkindigi, júkterdiń saqtalýyn qamtamasyz etý, qujat aınalymyn qysqartý, qujattar jıyntyǵynyń azdyǵy jáne eń bastysy, kedendik baj jáne salyqtardy tóleý merziminiń 40 kúnge deıin uzartylýy. О́tinish jáne atalmysh qujattardy usynǵannan keıin Komıtet ókiletti ekonomıkalyq operatorlar tizimine tulǵany engizý týraly kýálikti berý boıynsha nemese sebebin túsindirý arqyly atalmysh kýálikti berýden bas tartý týraly sheshim shyǵarady.
Aleksandr TASBOLATOV,
«Egemen Qazaqstan».
