– Bizdiń saıası uıym Elbasy anyqtap bergen jańǵyrý jumystary men elimizdiń qazirgi damý qarqynynyń ári qaraı saqtalýy úshin jumys isteıdi. Tuńǵysh Prezıdentimizdiń tikeleı bastamasymen qolǵa alynǵan aýqymdy ekonomıkalyq, áleýmettik, saıası jáne rýhanı jańǵyrýlar partııa men memleketimizdiń aldaǵy jumys baǵyttarynyń negizgi basymdyǵy bolyp qala beredi, – dedi oblys ákimi, Nur Otan partııasy oblystyq fılıalynyń tóraǵasy Arhımed Muhambetov.
Konferensııada partııa músheleri A.Baıtursynov atyndaǵy Qostanaı memlekettik ýnıversıtetiniń rektory, oblystyq máslıhat depýtaty Alma Dosjanova, partııanyń Sokolov-Sarybaı ken óndirý birlestigi aýdandyq fılıaly tóraǵasynyń orynbasary Aleksandr Makarenko sóz sóıledi. Máselen, A.Makarenko elimiz óndirisiniń kóshin bastaıtyn Sokolov-Sarybaı ken óndirý birlestiginiń úlken ujymy Memleket basshysy Qasym-Jomart Toqaevtyń der ýaqytyndaǵy sheshimin qyzý qoldap otyrǵanyn aıtty.
Nur Otan partııasynyń HVIII sezinde partııa Tóraǵasy Nursultan Nazarbaev tapsyrǵan «Halyqqa kómek», «Baqytty otbasy», «Aýyl – el besigi», «Qutty meken» jobalary óńirlerdi áleýmettik-ekonomıkalyq damytýdyń tetigi. «Qutty meken» jobasy boıynsha bıyl oblys óńirinde jergilikti mańyzy bar 531 shaqyrym jol jóndeýden ótedi. Munda joldardy negizinen orta jóndeýge basymdyq beriledi. Osy jumystardyń 50 paıyzy respýblıkalyq, 50 paıyzy jergilikti bıýdjetten qarjylandyrylady.
– Aýyldyq jerlerdi aýyz sýmen qamtamasyz etý joba boıynsha qolǵa alatyn óte mańyzdy jumys bolyp otyr. Oblysta barlyǵy 548 aýyldyq eldi meken bar. Sonyń 172-i ǵana ortalyqtandyrylǵan aýyz sý qubyrymen qamtamasyz etilgen. 376 eldi meken ortalyqtandyrylmaǵan aýyz sýdy paıdalanady jáne tasyp beriledi. 2020 jylǵa deıin eldi mekenderdi aýyz sýmen qamtý úshin 22 joba júzege asyrylady, oǵan bıyl 7,8 mıllıard teńge qarjy bólindi. Bıyl 19 aýylǵa ortalyqtandyrylǵan aýyz sý qubyry tartylatyn bolady, – dedi partııanyń oblystyq fılıalynyń tóraǵasy, oblys ákimi Arhımed Muhambetov.
