Resmı ashylýdan keıin belgili óner qaıratkerleri shyǵarmashylyqpen aınalysatyn jastarmen kezdesti. Sharaǵa akademııanyń ónerpaz stýdentterimen qatar, búginde qazaq estradasynda ózindik orny bar «Estradalyq óner» fakýltetiniń magıstranttary Dınara Sultan, Aıqyn Tólepbergen, sondaı-aq osy fakýltettiń stýdenti Ernar Aıdar kelgenderdiń aldynda óner kórsetti.
Júrgenov atyndaǵy Qazaq ulttyq óner akademııasynda dástúrli «Ashyq esik kúni» aıasyndaǵy sharaǵa Qazaqstannyń eńbek sińirgen qaıratkeri, «Azııanyń úzdik aktrısasy» Samal Eslıamova qurmetti qonaq retinde qatysyp, quttyqtap sóz sóıledi. «Ashyq esik kúni» jarııalanǵan eń jaǵymdy jańalyq – aldaǵy jańa oqý jylynda «Ulttyq óner» fakýltetiniń ishinen «Aıtysker aqyn» mamandyǵy ashylady. «Aıtysker aqyn» mamandyǵy boıynsha kýrsqa qabyldaýǵa belgili aqyn, búgingi aıtys óneriniń aqtańgeri, Qazaqstannyń eńbek sińirgen qaıratkeri Júrsin Erman arnaıy shaqyryldy. Akademııa rektory Ashat Maemırov Mádenıet jáne sport mınıstrligi, T.Júrgenov atyndaǵy Qazaq ulttyq óner akademııasy akademııalyq ǵylymı keńesiniń sheshimimen Erman Júrsin Moldashulyna «Qurmetti professor» ataǵy berilgendigin habarlap, kýáligin tabystady. Júrsin Erman óz sózinde: «Bir kezderi ózimiz tálim alǵan Qazaq ulttyq óner akademııasy ǵımaratyna kelip, osyndaı qutty kúni tosyn syıǵa ıe bolyp turmyn. Bul meniń uzaq jylǵy eńbegime jasalǵan qoshemet dep oılaımyn. Qazir ǵana jańadan ashylyp jatqan «Aıtysker aqyn» mamandyǵyna oqýǵa túskisi keletin talapkerlerdi tyńdap jatyrmyz. El ishi – altyn qazyna. Árıne, talantty balalar bar. Qazylar alqasy atynan osy jastardyń arasynan qazaq óneriniń týyn kókke kóterer talanttardyń shyǵatynyna kámil senemiz. Elden kelgen balalar ónerin tanytyp jatyr. Ashyq esik kúninde akademııa tabaldyryǵyn attaǵysy keletin talapkerlerdiń barlyǵyna tabys tileımin. Bizdiń bolashaǵymyz sizderdiń qoldaryńyzda, jeńiske jete berińizder!», dep aǵalyq yqylasyn bildirdi.
