Rýhanı sharany uıymdastyrýshy ýnıversıtet rektory Altynbek Nýhulynyń aıtýynsha, jańa kitap «Folıant» baspasynan 2,5 myń danamen shyqqan.
Kitapta ǵalym Qanysh Sátbaev jaıly M.Sársekeniń ǵumyr boıy jınaǵan materıaldary men sońǵy ýaqyttarda ǵana belgili bolǵan derekteri jazylǵan.
Al, kitap oblys ákimi Bolat Baqaýov, Shyǵys Qazaqstan oblysynyń ákimi Danııal Ahmetovtik qoldaýymen basylyp shyqqan.
Jazýshy, «Qurmet» jáne «Parasat» ordenderiniń ıegeri 84 jasqa kelgen Medeý Sárseke aǵamyz ǵumyrynyń 60 jylǵa taıaý ýaqytyn Qanysh Sátbaevtyń ómirin zertteýge arnaǵan eken.
- Men de taý-ken salasy mamandyǵyna oqyp, bilim aldym. Biraq, ádebıetke qushtar boldym. Birneshe jyl óz mamandyǵym boıynsha óndiriste ınjener bolyp istedim. Bir kúni Álkeı Marǵulan aǵamyz meni kórgisi keledi degendi estidim. Almatyǵa baryp jolyqtym. Ol kisi meniń kitaptarymdy oqyǵanymdy aıtyp, baǵalaı kele, Qanysh aǵań týraly jaz dep ótinish bildirdi. Ol kezde Qanekeńniń ataǵyn estigenimiz bolmasa, júzin kórme-genmin. Júreksinip, qolymnan kelmeıdi dep edim, ursyp tastady. Eki-úsh kún oılanyp, Álekeńe qaıta baryp, tapsyrmasyn qabyldadym,-deıdi Medeý aǵa.
Sátbaev týraly kitaptardy jazyp bitirgen soń, qaıtadan taý-ken ınjeneri qyzmetine oralmaq bolady.
Biraq, ǵalym Qanyshtyń eńbegin, ómirin zertteý Medeý Sársekeniń ǵumyr boıǵy taqyrybyna aınalady.
Alǵashqy zertteý kitabyn 13 jyl jazyp, 1980 jyly Máskeýden «Jaısań jandar ómiri» («Jızn zamechatelnyh lıýdeı») serııasymen jaryqqa shyǵarady.
Jazýshy Q.Sátbaev týraly 18 kitap jazǵan, onyń 12-si - qazaq tilinde, altaýy - oryssha.
-«Qazaqtyń Qanyshy. Fenomen. The Phenomenon» kitabynyń jaryqqa shyǵýy - men úshin úlken qýanysh. Bárin eseptesem, 100 myń danamen shyqqandary bar, búginge deıin kitaptarym jalpy alǵanda 330 myń danamen jaryq kóripti,- degen Medeý Sárseke ýnıversıtet rektory Altynbek Nuhulyna alǵysyn bildirdi.
Shara barysynda jınalǵan jurtshylyq jazýshyǵa úlken qoshemet-qurmet kórsetti.
PAVLODAR
Sýretti túsirgen Janasyl Erken
