Is-sharaǵa Qazaqstan Respýblıkasynan Ishki ister, Syrtqy ister, Aýyl sharýashylyǵy mınıstrlikteriniń, Ulttyq qaýipsizdik komıteti Shekara qyzmetiniń, Almaty oblysy ákimdiginiń, «Qazseldenqorǵaý» MM, «Kazgıdro» JShS, «Bazıs konstrakshn» JShS basshylary men ókilderi qatysty.
Qytaı Halyq Respýblıkasynan Sý sharýashylyǵy, Syrtqy ister, Ekologııalyq orta mınıstrlikteriniń, Reformalar jáne damý ulttyq komıtettiń, Shyńjań óndiristik-qurylys korpýsynyń basshylyǵy men ókilderi qatysty.
Is-shara Ishki ister mınıstriniń orynbasary Iý.V. Ilınniń, QR Aýyl sharýashylyǵy vıse-mınıstri E.N. Nysanbaevtyń, Almaty oblysy ákiminiń birinshi orynbasary L.M. Turlashovtyń, sondaı-aq delegasııalar basshylary men QR Almaty oblysy ákimdigi, QHR Shyńjań óndiristik-qurylys korpýsy ókilderiniń quttyqtaý sózderimen bastaldy.
Budan ári eskertkish belgi salý túrindegi qurylystyń ashylý saltanatyna ulasty. Osylaısha, birlesken halyqaralyq jobanyń sel ustaıtyn bógetiniń qurylysy bastaldy.
Birlesken joba «Qorǵas» shekara mańy yntymaqtastyǵy halyqaralyq ortalyǵynyń (ShYHO) obektilerin, qolda bar ınfraqurylymdy jáne jaqyn mańdaǵy eldi mekenderdi sel jáne sý tasqyny qaýpinen qorǵaýǵa baǵyttalǵan.
Esterińizge sala keteıik, QR Tuńǵysh Prezıdenti N. Á. Nazarbaev 2012 jyly Almaty oblysyna jumys sapary barysynda 2013-2020 jyldar ishinde «Qorǵas-Shyǵys qaqpasy» erkin ekonomıkalyq aımaǵynyń «Qorǵas» ShYHO selden qorǵaý boıynsha sharalar keshenin júzege asyrýdy tapsyrdy.
Osyǵan baılanysty, 2 joba ázirlendi, bul ShYHO aýdanyndaǵy Qorǵas ózeninde qorǵaý qurylystaryn jáne «Qorǵas» (Qorǵas-1) kedeni ǵımarattarynyń qurylysyn salý; «Qorǵas» ShYHO ýchaskelerindegi Qorǵas ózeni boıynsha arnany qalyptastyratyn jáne qorǵaý qurylystaryn, «Qorǵas-Shyǵys qaqpasy» shekara mańy saýda-ekonomıkalyq aımaǵyn, Baskýnchı, Qorǵas kentterin jáne Almaty oblysynyń Panfılov aýdanyndaǵy (Qorǵas-2) shekara zastavalaryn salý.
Qorǵas-1 jobasy boıynsha 2013-2018 jyldar aralyǵynda jaǵany nyǵaıtý bógeti, tehnologııalyq jáne kirme joldar, patrýldik-traktorlyq jol, Qorǵas ózeniniń búıirindegi qurylystardy turaqtandyratyn qurylystar salyndy. Negizgi qurylys Qazaqstan Respýblıkasy men Qytaı Halyq Respýblıkasynyń aýmaǵynda ornalasqan «Shuqyrbulaq» (Almaly) sel ustaıtyn bógeti bolady. Al aǵymdaǵy jyly Qorǵas-2 jobasyn iske asyrý bastaldy.
2017 jylǵy 8 maýsymda Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasynda Qorǵas ózeninde «Shuqyrbulaq» (Almaly) birlesken sel ustaıtyn bógetin salýdaǵy yntymaqtastyq týraly kelisimge qol qoıyldy, ol 2018 jylǵy 29 maýsymda Qazaqstan Respýblıkasynyń zańynda ratıfıkasııalandy.
