2018 jyldyń maýsym aıynda kásipkerlerdi qoldaý jóninde keıbir zań aktilerine ózgerister engizilip, qurylys salasyndaǵy atqarylyp jatqan jumystardyń sapasyn tekserý boıynsha birqatar quzyrettilikter qysqartylǵany belgili boldy. Oblys ákiminiń tikeleı tapsyrmasyna sáıkes, óńirdegi qurylys nysandaryna baqylaýdy kúsheıtý maqsatynda «Zańsyz, negizgi qujattarsyz jáne sapasyz qurylystardy boldyrmaý is-sharalar jospary» ázirlenip, bekitildi. 2018 jyly qurylys sapasyna qatysty 168 ákimshilik is qozǵalǵan bolsa (aıyppul somasy 18,1 mıllıon teńge), onyń 114-i nemese 68 paıyzy (aıyppul somasy 12 mıllıon teńge) atalǵan is-shara nátıjesinde anyqtalǵan. Aǵymdaǵy jyldyń alǵashqy toqsanynyń ózinde 89 is qaralsa (aıyppul somasy 9,2 mıllıon teńge), onyń 74-i nemese 83 paıyzy (aıyppul somasy 8 mıllıon teńge) is-shara nátıjesinde belgili bolǵan.
Jambyl oblystyq memlekettik sáýlet-qurylys baqylaý basqarmasy tarapynan oblys aýmaǵyndaǵy lısenzıattardyń elektrondy derekter bazasy qurylyp, lısenzıattar boıynsha barlyq málimetter engizilýde. Nátıjesinde oblysta tirkelgen 1500 lısenzıattyń 700-i qysqartyldy. Iаǵnı, búgingi kúni Jambyl oblysyndaǵy qurylys salasyndaǵy lısenzıattardyń sany 800-di qurap otyr. Atalǵan derekter bazasy qurylys salasyndaǵy aty bar da zaty joq mekemelerdiń lısenzııa alýyna shekteý qoıýǵa múmkindik berip otyr. Al, bul óz kezeginde qurylys sapasynyń artýyna septigin tıgizeri sózsiz.
Jıynda oblys ákiminiń tapsyrmasyna sáıkes qurylyp, qoldanysqa engizilip jatqan óńirdegi «Qurylys nysandarynyń elektrondy derekter bazasynyń» tıimdiligi, paıdaly tustary keńinen sóz boldy. Derekter bazasy monıtorıng júrgizýdi, qyzyl syzyqtyń saqtalýyn, qurylys mádenıetin, zańdylyǵyn, sapasyn qamtamasyz etip, qurylys nysandarynyń bastalǵan kúninen paıdalanýǵa berilgenge deıingi aralyqta baqylaýǵa, qurylys kólemin anyqtaýǵa, zań buzýshylyqtardyń aldyn alýǵa tolyq múmkindik beredi. Sonymen qatar, Asqar Myrzahmetov júrgizilip jatqan árbir qurylystyń sapaly atqarylýy adam ómiriniń qaýipsizdigimen baılanysty ekenin basa aıtyp, bul baǵyttaǵy jumystar qashanda nazardan túspeý kerektigin eskertti. Ákim merdigerlerdiń qurylys jumystaryn baqylaý sharalaryna tapsyrys berýshilermen qatar aýyldyq okrýg ákimderi de barynsha atsalysý kerektigin tilge aıtty. Sonymen qatar, qurylysy aıaqtalyp, paıdalanýǵa tapsyrylǵan nysandardyń kepildik merzimi aralyǵynda paıdalaný kezindegi sapasyna da júıeli túrde monıtorıng júrgizýdi tapsyrdy.
