Áleýmettik kómekke bólingen qarjy qomaqty

Jıynda Nur Otan qolǵa alǵan «Baqytty otbasy», «Qutty meken», «Halyqqa kómek», «Aýyl – el besigi» at­ty jo­ba­lardyń óńirde qalaı júzege asyrylyp jatqany sóz boldy. Oblystyq fılıal tóraǵasynyń birinshi orynbasary Ánýarbek Muhtarhanov «Halyqqa kómek» jobasy boıynsha 3000 adam partııaǵa júginip, 314 adamnyń máselesi sheshimin tapqanyn aıtty. «Baqytty otbasy» jobasy arqyly 38 myń turǵynǵa ataý­ly áleýmettik kómek kórsetý úshin 1,4 mlrd teńge bólinipti. «Qutty meken» jobasy aıasynda oblystyq jáne aýdandyq mańyzdaǵy joldardy jóndeý úshin qosymsha 1,5-2 mlrd teńge qarastyrylypty. «Halyqty sapaly aýyz sýmen qamtý úshin 60 joba qolǵa alynbaq. Al «Aýyl – el besigi» jobasynyń aıasynda 82 myń gektar sýarmaly jerdi ıgerý kózdelip otyr. 2022 jylǵa deıin syrttan 36 myń bas iri qara satyp ákeline­di. Osylaısha aýyldarymyz kórkeıe túsetin bolady», dedi Á.Muhtarhanov.

Jıynda sóz alǵan semeılik kóp balaly ana Sholpan Chege­lekova oblysymyzda analar men az qamtylǵan otbasylardy qoldaýǵa erekshe kóńil bólinip jatqanyna toqtaldy. «Kóp balaly otbasylar men arnaıy kútimdi qajet etetin balalar tegin balabaqshamen, tegin mektep formalarymen qamtamasyz etilip jatyr. Tuńǵysh Prezı­denti­miz Nursultan Nazar­baev­tyń arqasynda mektep túlek­teri kolledjderde aqysyz negizde alǵashqy tehnıkalyq bilim alý múmkindigine ıe bolǵanyn erekshe atap ótkim keledi. Mundaı ispen sanaýly memleketter ǵana maqtana alady. Men Semeı qalasyndaǵy medısınalyq ýnıversıtette memlekettik grant arqyly bilim alyp, MVA ǵyly­mı dárejesine ıe boldym. Qazir­gi tańda Phd doktorlyq jumy­symdy daıyndap jatyrmyn. О́z balalaryma tárbıe bere otyryp, kásibı baǵytta tolyq damý múmkindigim bar», deıdi ol.

Konferensııa barysynda Nur-Sultan qalasynda ótetin sezge Shyǵys Qazaqstan atynan baratyn 49 delegattyń esimderi de belgili boldy.

О́SKEMEN