Osylardyń ishinde kópshilik nazaryn aıyryqsha aýdarǵan buıym – Kenen atamyzdyń kemer beldigi. Bul jádiger munda Jambyl oblysy Qordaı aýdandyq K.Ázirbaev atyndaǵy ádebı-memorıaldyq mýzeı qorynan jetkizilgen eken.
Kemer beldiktiń tarıhy tereńde kórinedi. Jyrshy atamyzdyń urpaǵy Baqytjan Kenenulynyń aıtýyna qaraǵanda, 1912 jyly qyrǵyz eliniń ataqty batyr manaby, patshadan shen alǵan Shábden Jantaıulyna as berilipti. Osyǵan baılanysty Alataýdyń teriskeı qaptalyn jaılap jatqan ıisi qazaqqa saýyn aıtylady.
Mundaı jıynǵa el jaqsylary salyp uryp jetip barmaıdy. Arysqa túser jigiti men aıtysqa túser aqynyn saılaıdy. Topty jaryp án shyrqaıtyn bulbul úndi jyrshylaryn ertedi. Osy asqa Qordaı eliniń ataqty adamy Erkebaı Bazarov óz eliniń jas óreni Kenendi aparmaqqa sheshim qabyldap, ony shaqyryp alyp astyna jaqsy at mingizedi, ústine oqaly shapan kıgizedi, qysqasy jasy otyzdyń jıegine endi ilinip kele jatqan Kenekeńdi jutyndyryp asqa alyp barady.
Qazaq mýzyka óneriniń zertteýshisi, kórnekti ǵalym Ahmet Jubanov óziniń «Zamana bulbuldary» atty zertteý eńbeginde: «Qoıshy Kenenniń boıyndaǵy talantty ónerdi tanyǵan – Erkebaı Bazarov. Onyń ózi de qyran qus, alǵyr tazy ustaǵan ónerpaz. Osy Erkebaı qyrǵyz manaby Shábdenniń asyna Kenendi alyp barady. Buryn-sońdy mundaı toıdy kórmegen ári ataqty tókpe aqyndardan keıin kezek alǵan Kenen eki dúrkin umsynǵanda aýzyna sóz túspeı, óleń aıta almapty. Jınalǵan jurt «Er kezegi úshke deıin, taǵy bir kórsin» dep shýlaıdy. Sonda jas jigittiń keýdesinen óleń-jyr jaryp shyǵyp, «Kópshilik, tyńda ánimdi» deıtin jańa tolǵaýyn oryndap, syılyqqa kemer beldik alypty» dep jazady.
Biz sóz etip otyrǵan jádiger osy. Demek bul muraǵa da kóp jyl bolǵany anyq. Joǵarydaǵy Baqytjan aǵamyzdyń sózine sensek, kemer beldiktiń bes eli bylǵary qaıysy tozǵandyqtan bertinde jańalanypty. Al beldiktiń múıiz-gúldi, órnekti bederli basy men ilgegi óziniki. Qaıys beldikti kemerlete kómkergen qos balǵaly gúldi oıý men jıegi órkeshtengen qaqpa pishindes kúmis buıymdar tym áriden kele jatqan dúnıeler eken.
