Syrtqy sypa sıpaty, qyrmasaqal azamattardan da shıraq bolmys, qaıratty shashyna aq kirse de býryl tartpaǵan bitim, tipti de kelgen jasyn tap basýǵa múmkindik bermeıdi. Baspasóz ardageri qaıratty tulǵasymen, salamatshyl saltymen de barshaǵa úlgi. Aıtalyq, Qudaı bergen qýat – densaýlyqqa jiti mán beretin Iekeń velosıped tebýdiń sheberi. Alyp megapolıs Almatyda ótetin velosherýlerdiń belsendi qatysýshylarynyń biri. Bul – osy jasta ekiniń biri táýekel ete bermeıtin daǵdy.
«Zamannyń qas-qabaǵyn baǵyp óttiń, áıteýir biri bolmaı taǵy kóptiń. Táýelsiz qazaq eli sózin aıtyp, baıraǵyn tik kóterdiń ádilettiń» dep kórnekti aqyn inisi Ǵalym Jaılybaı jyrǵa qosqandaı, I.Qarymsaquly otandyq baspasózde kenje qalǵan quqyqtyq jýrnalıstıkaǵa qan júgirtti. Qııadaǵyny qapysyz shalyp, adam quqyǵyn qorǵaýda qabyrǵaly dúnıeler tolǵady. Dúnıege kelgen Syr óńiri – Aqmeshitinen bastap, Torǵaı men Jezqazǵan óńirlerinde talaı izi saırap jatyr. Aıtalyq, eńbek jolyn 1958 jyly Qyzylorda oblystyq «Lenın joly» (qazirgi «Syr boıy») gazetinde bastap, hat bóliminde oqyrmandarmen tyǵyz baılanys ornatty. Jazýǵa qushtarlyq ásker qataryna boryshyn óteýge attanǵanda da úzilmedi. «Krasnyı boes» áskerı gazetiniń shtattan tys tilshisi boldy. Keıin týǵan eldegi qyzmetin qaıta jalǵastyryp, taǵy biraz jyl Torǵaı oblystyq «Torǵaı tańy», Jezqazǵan oblystyq «Jezqazǵan týy» gazetterinde jaýapty qyzmetter atqardy. Sekseninshi jyldardyń orta sheninde Qyzylorda qalalyq keńesi atqarý komıtetiniń jalpy bóliminiń meńgerýshisi boldy. Jarty ǵasyr ǵumyryn arnaǵan aǵamyzǵa óńirlik jýrnalıstıkanyń ókpesi joq shyǵar. Al quqyq salasynda qalam silteýi Qyzylordada «Prokýratýra tynysy» gazetin turaqty shyǵaryp turýdan bastaldy. Baspasózdegi tyń taqyryptardyń birine balanatyn quqyq qorǵaý salasynyń qyr-syryn meńgergen ol toqsanynshy jyldardyń ortasynan aýa prokýratýra organdarynda baspasóz qyzmetiniń qurylýy men nyǵaıýyna belsene atsalysty. Quqyqtyq-tanymdyq maqsatta «Prokýratýra habarshysy» gazetin shyǵarýdy uıymdastyrdy ári redaksııalyq keńestiń múshesi boldy.
Shyny kerek, kóp jaǵdaıda aǵa býyn ókilderi jastardyń shyǵarmashylyǵymen jiti tanys bola bermeıdi. Al oıy bıik, ózi kishik Iten aǵamyz qaıbir jyly bas basylymnyń sol kezdegi Qyzylorda oblysyndaǵy tilshisi Erjan Baıtilestiń «Pende men perde» jáne Kendi Altaı óńirinde eńbek etip júrgen meniń «Áýlet» atty jınaqtarymyzǵa aǵalyq jyly sózin arnap, keıingi býynǵa degen iltıpatyn kórsetti.
«Tulaboıy qarapaıymdylyqtan quıyla salǵan Iekeńniń týyndylary ómirdiń ózindeı órnekti, ónegeli» dep belgili pýblısıst Qalı Sársenbaı aıtqandaı, ár jyldarda jaryq kórgen «Adamdar. Jyldar. Taǵdyrlar», «Qońyr qalam», «Júrek jazbalary», «Jaqsynyń jaryǵy» syndy kitaptaryn jáne «Jasa, jaryq kún!» poezııalyq jınaǵyn paraqtasańyz, avtordyń alǵyr azamattardyń aıtýly isteriniń jarshysy, ómirden ótkenderiniń joqshysy bolyp júrgenin ańǵarý qıyn emes. Bul kisiliktiń, adamı qasıettiń aramyzda áli bar ekeniniń aıǵaǵy bolsa kerek. Máselen, ol kezinde «Sosıalıstik Qazaqstan» gazetin basqarǵan Uzaq Baǵaevtyń kúndelikterine den qoıady. Bas basylymdy órge súıregen Bekbolat Ádetovtiń álemine boılaıdy. Basqa da qazaq baspasóziniń ókilderin, el men jerge qyzmet etip júrgen qarymdy qaıratkerlerdiń portretin bederlegen jazbalarynyń bári oqyrmanǵa oı salarlyq olja. «Jaqsyny isinen tany» degen osy.
