«Dana – nemis tuqymdas asyl tekti ovcharka, bylaısha aıtqanda, «arıstokratka». Minezi jýas, salmaqty, tilalǵysh, iz kesýde aldyna qara salmaıdy. Bos ýaqytynda asyr salyp oınaǵannan góri jalǵyz qydyrǵandy táýir kóredi. Túrine qarasań, oılanyp júretin syqyldy». Bul – Dananyń ıesi, ınspektor-kınolog Ádilbek Qojahmetovtyń bergen minezdemesi.
Dana irikteý kezeńinde-aq birden kózge túsken. Shópke shashyp tastalǵan 20 túıir azyqtyń bárin taýyp, «5» degen eń joǵary baǵaǵa ıe bolǵan.Til alý daǵdysyn úıretetin daıyndyqtan da esh múdirmegen. Astanadaǵy kınologııalyq ortalyqta «mamandyǵyn jetildirip» kelgennen keıin iz kesý quramyna qabyldanǵan.
«Dana ıisterdi taldap jumys jasaıtyn, sondyqtan, taptalǵan izderdiń ózin adaspaı, esh qıyndyqsyz tabatyn», deıdi Ádilbek Qojahmetov.
Iisshil ıttiń kómegimen 8 adam óltirý, 14 tonaý jáne 500-deı urlyq áshkerelengen. 9 jyl qyzmet etý – ıt úshin úlken merzim, Ony «zeınetke» shyǵarý sheshimi qabyldanyp, ornyn «Alma» atty ovcharka almastyrdy.
Jyl basynan beri óńirde iz alýǵa úıretilgen ıtter 288 ret paıdalanylyp, 183 qylmysty ashylǵan.
