Máskeýlik asqaq ónerdi baǵalaýshylar «Astana Opera» trýppasyna ystyq yqylastaryn bildirip, shynaıy iltıpattaryn kórsetti. Lyq toly zal tik tura ártisterge toqtamastan qol soǵyp, olardyń árbir kórsetken taǵzymdaryna «Bravo!» dep ún qatty.
Qoıylymnan keıin ataqty ımpresarıo Roberto Djovanardı óz áserimen bólisti.
- Bir sózben aıtqanda, ǵajaıyp trýppa, A.Asylmuratova keremet jumys atqarǵan. Ártister tipten tamasha, qoıylym óte joǵary deńgeıde jasalǵan. Olardyń Italııadaǵy óner kórsetýlerine qýana-qýana bardyq. Italıandyqtar qazaqstandyq trýppany jaqsy biledi, olardyń bizdegi gastroli kezinde, bári mindetti túrde sizderdiń ártisterińizdi kórýge asyǵady, jetekshi solıst Baqtııar Adamjandy tanıdy. Jaqynda ol Rımde óner kórsetti. Osy qysta trýppanyń oryndaýynda P.Chaıkovskııdiń «Shelkýnchık», «Aqqý kóli» baletterin tamashaladyq. Olardyń jańa qoıylymyna kelý – úlken qýanysh, óner kórsetýleri aıryqsha boldy!
Gala-keshke áıgili balet jáne teatr synshylary da keldi.
«Mýzykalnaıa jızn» jýrnalynyń ataqty ári qurmetti teatr synshysy Aleksandr Fırer «Astana Opera» teatrynyń trýppasy keremet kúıde ekenin atap ótti.
- «Sheherazada» baleti keremet jetkizilgen, solısteri óte tamasha. Ásirese, álemdik deńgeıdegi premer Baqtııar Adamjan men jas ártis Anastasııa Zaklınskaıa – óte súıkimdi qyz, ol tartymdy, albyrt, mýzykaǵa qabiletti, ıkemdi. Tamasha spektakl, trýppa ony óte jaqsy oryndady. Olardyń búgingi jasaǵany, qalaı bılegeni, barlyǵy shyn máninde ǵajap boldy. Bári jaqsy daıyndalǵan. Kórkemdik jetekshisi Altynaı Asylmuratova orasan zor jumys atqarǵan. Árıne, osy balettiń qoıýshy baletmeısteri Andrıs Lıepa da qajyrly eńbek etken. Sizderdi osy sahnadaǵy óner kórsetýlerińizben quttyqtaýǵa bolady.
Álemdegi eń kóp – úsh jarym mıllıon taralymy bar «Moskovskıı komsomoles» gazetiniń teatr salasyndaǵy synshysy Pavel Iаshenko da «Astana Opera» ónerine eń joǵary baǵa berdi.
- Tańǵaldyratyn áser. Bárimiz Altynaı Asylmuratovany bilemiz – ol álemdik balettiń ańyzy. Men sholýshy retinde álemde ne bolyp jatqanyn, atap aıtqanda, qazaq baletiniń jaı-kúıin baqylap otyramyn. Altynaı Asylmuratovanyń arqasynda «Astana Opera» jetekshi teatrlar qataryna qadam basyp kele jatqanyn baıqaımyn. Bizdiń búgingi kórgenimiz – shyn máninde tańǵajaıyp jasalǵan.
Bes halyqaralyq balet baıqaýynyń laýreaty ári Kelvın Koý stıpendııasynyń ıegeri Djýlıan Makkeı, sondaı-aq, Vengrııa ulttyq opera teatrynyń prımasy Tatıana Melnık jáne gala-baǵdarlamanyń basqa da qatysýshylary kásibı pikirlerin bildirgen, olardyń oılary bir arnaǵa tolysqan – «Astana Opera» trýppasynyń keleshegi jarqyn, ártisterdiń árqaısysynyń úlken daryny bar, olardyń asqaq ónerdiń shyńyna qol jetkizeri sózsiz.
- Baqtııar Adamjannyń sheberligine tamsana qaraımyn. Alǵash ret ekeýmiz Rımde jolyqtyq, menińshe, ol synshylardyń pikirin qajet etpeıtin deńgeıge ıe. «Astana Opera» teatry týraly kóp estidim, fotosýretterden kórip, zaldarynyń ásemdigine tánti boldym, – dep atap ótti Djýlıan Makkeı.
Qazaqstannyń Tuńǵysh Prezıdenti, Elbasy Nursultan Nazarbaevtyń bastamasymen salynǵan «Astana Opera» teatry shyǵarmashylyq ujymdarǵa joǵary deńgeıdegi kórkemdik jobalardy júzege asyrýyna múmkindik berýde, buǵan balet trýppasynyń Kreml Saraıyndaǵy orasan zor jetistigi dálel bola alady.
Teatrdyń jetekshi solısi, Qazaqstannyń eńbek sińirgen qaıratkeri, qazaq baletiniń juldyzy Baqtııar Adamjan synshylar men áriptesteriniń ǵana emes, sondaı-aq kórermenderdiń de erekshe yqylasyn týǵyzdy. Bıshiniń bıik samǵaýlary, shyǵys plastıkasy, erekshe daryndylyǵy men ıntellektýaldyq múltkisiz pantomımalyq qozǵalystary balet synshylarynyń júregin jaýlap aldy. B.Adamjan partııany akterlik turǵydan keremet meńgergenin kórsete otyryp, rólge keremet tóseldi, ónerpazdy álemdik deńgeıdegi ártis dep kúmánsiz aıtýǵa bolady.
Onyń sahnadaǵy serigi – «Astana Operanyń» jas ári bitim-bolmysy kelisken solısi Anastasııa Zaklınskaıa Zobeıdanyń partııasyn somdady. Sezimtal, symbatty, jep-jeńil arýdyń sahnadaǵy qımyly kórkem edi. Ártis óz keıipkeriniń kóńil-kúıin ǵana emes, sonymen birge birtutas beıne qalyptastyryp, osy róldiń tereń psıhologızmi men dramatızmin jetkize bildi.
Shahrıar men Shahezman beınelerin suńǵaq, eńseli ónerpazdar Jánibek Imanqulov pen Ildar Shakırzıanov usyndy, ym-ısharalarynyń nanymdy shyqqany sonsha, zal olardyń emosııasyn áp-sátte ańǵaryp otyrdy. Bas belsizdiń rólinde keremet bıshi Oljas Mahanbetálıev óner kórsetti. Kúńder – Adelına Tólepova, Erkejan Júnisova, Aıman Tájibaeva, Belsizder – Rýslan Temirbekov, Oljas Ánýarbek.
«Astana Operanyń» gastroldik sapary atalmysh spektakldiń qoıýshy baletmeısteri, M.Lıepa atyndaǵy Qaıyrymdylyq qordyń negizin qalaýshy – Reseıdiń Halyq ártisi Andrıs Lıepanyń shaqyrtýy boıynsha ótkendigin atap ótken jón. Aıta keteıik, Andrıs Marısovıch keshtiń júrgizýshisi ári rejısseri boldy.
Andrıs Lıepanyń «Avtografy ı ımıdjı» jobasy aıasynda ótken «Vaslav Nıjınskıı. Bog tansa» gala-konsertiniń birinshi bóliminde álemdik balet juldyzdary óner kórsetti. Olardyń qatarynda: «Kovent-Garden» Koroldik teatrynyń premeri Vadım Mýntagırov jáne Darıa Klımentova, Iýlııa Mahalına (Marıın teatry), Tatıana Melnık (Vengrııa memlekettik opera teatry), Eleonora Sevenard (Reseıdiń Úlken teatry), Brýklın Mak (Vashıngton baleti), Ksander Parısh (Marıın teatry), Denıs Rodkın (Reseıdiń Úlken teatry) t.b. bar. Ártister «Qasıetti kóktem», «Petrýshka», «Uıqydaǵy arý», «Jızel», «Talısman» baletterinen úzindi qoıdy. Ekinshi bólim óz ónerimen máskeýlik kórermendi tánti etken qazaqstandyq trýppaǵa berildi.
