«Túrki ıntegrasııasynyń arhıtektory» kitabynda Qazaqstan Respýblıkasynyń Tuńǵysh Prezıdenti – Elbasy N.Á.Nazarbaevtyń túrki álemindegi rólin tolyqtaı ashatyn birqatar memleket basshylarynyń, tanymal saıasattanýshylar men sarapshylardyń, ǵalymdar men zııaly qaýym ókilderiniń paıymdy pikirleri men oramdy oılary toptastyrylǵan.
«Elorda epopeıasy» basylymy el táýelsizdiginiń nyshany – Qazaqstannyń elordasynyń 20-jyldyǵyna oraı shyǵarylǵan. Bul kitapqa «Egemen Qazaqstan» respýblıkalyq gazetiniń ár jyldardaǵy sanynda Nur-Sultan qalasynyń qalyptasýyn Qazaqstan men shet eldiń kórneki saıası jáne qoǵam qaıratkerleriniń kózimen aıshyqtaǵan jarııalanymdar engizildi.
Is-sharaǵa Qazaqstan Respýblıkasy Aqparat jáne qoǵamdyq damý mınıstri Dáýren Abaev, Qazaqstan halqy Assambleıasy Tóraǵasynyń orynbasary Janseıit Túımebaev, Qazaqstan Respýblıkasynyń Tuńǵysh Prezıdenti – Elbasy kitaphanasynyń dırektory Ámirhan Rahymjanov, Halyqaralyq Túrki akademııasynyń prezıdenti, «Egemen Qazaqstan» Respýblıkalyq gazeti» AQ Basqarma tóraǵasy Darhan Qydyráli, Qazaqstan Respýblıkasy Parlamenti Májilisiniń depýtaty Fahrıddın Qarataev, Ázirbaıjan Respýblıkasynyń Qazaqstan Respýblıkasyndaǵy Tótenshe jáne О́kiletti Elshisi Rashad Mammadov, Qyrǵyz Respýblıkasynyń Qazaqstan Respýblıkasyndaǵy Tótenshe jáne О́kiletti Elshisi Jeenbek Qýlýbaev, belgili memleket jáne qoǵam qaıratkerleri, otandyq jáne sheteldik ǵalymdar, memlekettik organdar men sarapshylyq qoǵamdastyq ókilderi qatysty.
Tusaý keser barysynda «Túrki ıntegrasııasynyń arhıtektory» beınefılmi kórsetildi.
- Jaqsy kitap – jannyń azyǵy. Eki týyndynyń da bizder úshin de, keleshek urpaq úshin de mańyzy erekshe. «Túrki ıntegrasııasynyń arhıtektory» basylymynda Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń túbi bir túrki halyqtaryn ózara jaqyndastyrýdaǵy yqpaly týraly mol maǵlumat bar. Elbasynyń kóshbasshylyq qasıetteri men mańyzdy qadamdarǵa barýdaǵy danalyq qyry tolyq ashylǵan. ... Al «Elorda epopeıasy» basylymynda qazaq eliniń bas shahary, jaqynda ǵana ataýy Nur-Sultan bolyp ózgergen astanamyz týraly kóptegen memleket jáne qoǵam qaıratkerleriniń, kórneki sarapshylar men kásibı mamandardyń júrekjardy pikirleri toptastyrylǵan. Elbasymyz «Astana – otanymyzdyń júregi, táýelsizdigimizdiń tiregi», - deıdi. Sondyqtan, elordamyzdy qansha nasıhattasaq ta – jarasymdy, - dedi D.Abaev.
- Túrki ıntegrasııasy týraly sóz qozǵasaq, eń aldymen, saıası turǵyda – túrki dúnıesiniń birligi, yntymaǵy, áleýmettik-ekonomıkalyq salada birlese jumys isteı alýy týraly aıtamyz. Al, zııaly qaýym úshin atalǵan taqyrypqa jaýapty búgin tusaýy kesiletin «Túrki ıntegrasııasynyń arhıtektory» týyndysy bereri sózsiz. Alashordashyl arystarymyzdyń Túrkistan Respýblıkasyn qurý týraly qııal-armany - Elbasymyzdyń úlken bastamasynyń arqasynda júzege asty. Onyń shynaıylyǵyna - barlyǵymyz kýámiz, - dedi óz sózinde J.Túımebaev.
- Eń bastysy, búgin tusaýy kesiletin eki kitaptyń basty keıipkeri – tek Qazaqstan úshin ǵana emes álemniń qazirgi tarıhyndaǵy kemeńger tulǵa Nursultan Nazarbaev. Búgin oqyrmandaryna jol tartqaly otyrǵan kitaptar Qazaqstan Kóshbasshysynyń kópqyrly qaıratkerliginiń eki baǵytyna arnalǵan. Onyń biri - Elbasymyzdyń barsha túrki halyqtarynyń basyn biriktirip, baýyrlas túrki elderimen qarym-qatynasty nyǵaıtýǵa sińirgen eren eńbegi bolsa, al ekinshisi – jalpy qazaqtyń tarıhynda alǵash ret memleketiniń astanasyn tańdap qana qoımaı, aýystyrý týraly sheshim qabyldanǵanymen, biraq onyń oryndalýyna sene qoımaǵan kóptiń kúmánin joqqa shyǵaryp, Saryarqaǵa táýelsiz elimizdiń qasıetti tóri, qutty mekeni, el tiregi – Nur-Sultandy salyp berýi, - dep atap ótti Qazaqstan Respýblıkasynyń Tuńǵysh Prezıdenti – Elbasy kitaphanasynyń dırektory, saıası ǵylymdarynyń doktory, professor Á.Rahymjanov.
Tusaýkeserde sóz sóılegen depýtat F.Qarataev, elshiler - R.Mamadov pen J.Kýlýbaevtar Elbasymyzdyń túrki áleminiń tanylǵan lıderi jáne túrki ıntegrasııasynyń naǵyz arhıtektory ekendigi týraly pikirleri, sondaı-aq N.Á.Nazarbaevtyń túrki elderiniń arasyndaǵy dostyq jáne baýyrlastyqty qurýdaǵy úlesine bergen joǵary baǵalary bir jerden shyqty.
- Byltyr Elordamyzdyń 20 jyldyǵyna oraı el gazeti «Egemende» 280-nen astam maqala, suhbat, saraptama, estelik jaryq kórgen edi. Olardyń qatarynda Elbasymen birge astananyń qadasyn qaǵysqan, elordanyń qalyptasýyna úles qosqan tulǵalarmen birge kóptegen shet eldik memleket qaıratkerleri de boldy. Búgingi Nur-Sultannyń dastanyn jazǵan bul maqalalardy «Elorda epopeıasy» dep toptastyrdyq. Al «Túrki ıntegrasııasynyń arhıtektory» dep atalatyn ekinshi kitabymyzǵa negizinen tamyrlas, baýyrlas el basshylary, kórnekti memleket qaıratkerleriniń arnaıy jazǵan maqalalary men estelikteri jınaqtaldy... Barshańyzǵa belgili, Túrki akademııasynyń uıytqy bolýymen, kásibı zertteý toby úsh jyldan beri túrkitildes memleketterde áleýmettik saýalnama júrgizip keledi. Osy zertteýlerde ártúrli elderdiń azamattary bir aýyzdan Elbasyn túrki dúnıesiniń eń tanymal tulǵasy retinde tanypty. Byltyr tanymal jýrnalıst Kúrshad Zorlý júrgizgen zertteýinde N.Á.Nazarbaevtyń Túrkııada ınternette eń kóp qaralǵan tulǵa ekenin anyqtaǵan. Bul zertteýlerdiń nátıjesi Elbasynyń túgel túrkiniń tutqasy ekenin áıgilep turǵany anyq!, - degen D.Qydyráli óz kezeginde mınıstr D.Abaevqa, barlyq avtorlarǵa jáne Á.Rahymjanov arqyly Elbasy kitaphanasynyń ujymyna kitapty basyp shyǵarýda qoldaý kórsetkenderi úshin rızashylyǵyn bildirdi.
Is-shara aıaqtalǵannan keıin qonaqtar úshin Elbasy kitaphanasy boıynsha ekskýrsııa júrgizildi.
