Taıaýda «Baldáýren» respýblıkalyq oqý-saýyqtyrý ortalyǵynyń bazasynda Jastar jyly sheńberinde «Dene shynyqtyrý pániniń úzdik muǵalimi-2019» IÚ respýblıkalyq baıqaýy ótkizildi. Birden aıta keteıik, baıqaýdyń negizgi maqsaty dene tárbıesi páni muǵalimderiniń kásibı biliktiligin jetildirý. Elimiz boıynsha pán muǵalimderiniń bilimi men biligi, kásibı sheberlikteri syn tezine túsken bul baıqaýdy Qazaqstan Respýblıkasy Bilim jáne ǵylym mınıstrliginiń qoldaýymen ulttyq dene tárbıesi ǵylymı-tájirıbelik ortalyǵy ótkizip otyr. Jastar jyly sheńberinde bolǵandyqtan, baıqaýǵa otyz jasqa deıingi talapkerler qatysty. Tek jasy ǵana emes, tájirıbesi de eskerilgen. Úmitkerlerdiń jalpy bilim beretin mektepterde óz páni boıynsha jumys istegen jeti jyldyq tájirıbesi bolýy shart.
Respýblıkalyq synaqqa óz óńirleri úkilep úmit artqan kil júırikter jınaldy. Olaı bolatyndyǵy, aldymen aýdandyq, oblystyq baıqaýlar uıymdastyrylyp, júzden júırik, myńnan tulpar shyqqandar syn tezinen ótkizilgen. Býrabaıdyń baýraıyndaǵy kórigi qyzǵan baıqaýǵa Nur-Sultan, Almaty qalalarymen qatar, elimizdiń 13 oblysynan jáne «Baldáýren», «Baldáýren-Shymkent» respýblıkalyq oqý-saýyqtyrý ortalyqtarynyń ókilderi qatysty.
Aldymen saltanatty ashylý rásimi ótkizildi. Kásibı biliktilikterin sarapqa salǵaly turǵandardyń aldynda «Baldáýren» ortalyǵynyń bas dırektory Muhıtdın Tólepbaı jáne baıqaýdyń bas tóreshisi, ulttyq dene tárbıesi ǵylymı-tájirıbelik ortalyǵynyń dırektory Sadyq Mustafaev sóz sóılep, atalmysh baıqaýdyń mán-mańyzyna tereńirek toqtalyp ótti. Sheshenderdiń aıtýyna qaraǵanda, mundaı jıyn ótkizýdiń paıdasy mol. Birinshiden, elimizdiń ár túkpirinen kelip otyrǵan úmitkerlerdiń boıyndaǵy kásibı bilim-biliktiligi arqyly ár aımaqta dene tárbıesi pániniń qanshalyqty damý ústinde ekendigin saraptaýǵa bolady. Ekinshiden, ózara baq synasqan pán muǵalimderi áriptesteriniń ozyq ádis-tásilderin, tálimdi tájirıbelerin tereńirek tanyp, boılaryna sińiredi. Aınalyp kelgende, úzdikke ilesý arqyly ortaq is alǵa jyljıdy.
Baıqaý barysynda biliktilikti saraptaý jáne jańashyl pedagog baǵyttary boıynsha talapkerlerdiń óresi tarazy basyna tartyldy. Alǵashqy synaqta pán muǵalimderi dene tárbıesi boıynsha 30 suraqtan turatyn saýalnamaǵa júz mınýttyń ishinde jaýap berse, 20 suraqtan turatyn pedagogıka jáne oqytý ádistemeleri oraıyndaǵy biliktilikteri bezbenbeldi. Sondaı-aq, osy baǵytta ár muǵalim basketbol, voleıbol tárizdi sport túrlerinen naqty is-qımyl úlgilerin kórsetti.
Baıqaýdyń ekinshi kezeńinde qatysýshylar óz mamandyqtaryna oraı ozyq oılarymen, ilkimdi isterimen, nátıjeli jumystarymen erekshelendi. Pándi oqytý barysyndaǵy tıimdiligi mol jańalyqtarymen bólisti.
Baıqaýdyń úshinshi, tórtinshi kezeńderi de qyzǵylyqty ári tartysty uıymdastyryldy. Ashyq sabaq ótkizildi. Mekteptegi sport sharalaryn uıymdastyrýdyń úzdik úlgileri sarapshylardyń nazaryna usynyldy. Máselen, 5-9 synyptarda bul pán bilim berý salasyndaǵy jańartylǵan baǵdarlama boıynsha ótkiziledi. Jarystyń bir ereksheligi, konkýrsqa qatysýshylar taqyryptardy ózderi tańdap aldy.
Qazylar alqasynyń sheshimimen bas júlde Batys Qazaqstan oblysynyń ókili Abzal Naýryzbaevqa buıyrsa, birinshi orynǵa Jambyl oblysynan Dmıtrıı Voronko, ekinshi orynǵa Mańǵystaý oblysynyń ókili Kóben Nursultan ıe boldy. Al, úshinshi oryn Aqtóbe oblysynan kelgen Samǵat Esqaraevqa buıyrdy.
Býrabaı aýdany,
Aqmola oblysy
