«9 sáýir kúni Prezıdent Qasym-Jomart Toqaev kezekten tys Prezıdent saılaýyn ótkizý týraly jarlyqqa qol qoıdy. Bul saıası oqıǵanyń ár qazaqstandyq úshin mańyzy zor. Táýelsizdik jyldary Tuǵysh Prezıdent Nursultan Nazarbaevtyń basqarýymen Qazaqstannyń ekonomıkalyq-áleýmettik qarqyndy damyǵanyn búkil álem bilip otyr. Endigi jerde elimizdegi osy ekonomıkalyq damý yrǵaǵy tómendemeý úshin, halyqtyń áleýmettik jaǵdaıy nasharlamaý úshin, syrtqy ishki saıasat turaqty bolýy tıis. Sol úshin halyq kópke sozbaı eldiń Prezıdentin tańdap, saılap alýy tıis» dedi Alma Irgebaıqyzy.
«Dóńgelek ústel» otyrysyndaǵy pikirlesýge qatysqandardyń barlyǵy da elimizdegi saıası ózgeristerdi, kezekten tys prezıdent saılaýynyń ótetinin joǵary baǵalady. Memleket óziniń basshysyn ashyq, demokratııalyq negizde saılap alýy saıası naýqannyń ár qazaqstandyqtan úlken jaýapkershilikti talap etetinin de ortaǵa saldy. Ol úshin qazir túsindirý jumystary júrgizilýi tıis.
«Azamattyq qoǵamnyń mindeti ne? Bir jaǵynan 9 maýsymǵa belgilengen kezekten tys prezıdent saılaýyn qoldaıtyndyqtaryn barlyǵy da aıtyp jatyr. Al oǵan árkim óz úlesin qosýy tıis, áńgime sonda. Ol úshin 9 maýsym kúni saılaýǵa barlyǵymyz bir adamdaı qatysyp, óz tańdaýymyzdy jasaýymyz kerek. Bul eldiń bolashaǵy úshin qajet saıası mindet» dedi ýnıversıtettiń Gýmanıtarlyq-áleýmettik fakýlteti zań mamandyǵy kafedrasynyń meńgerýshisi Álimjan Bekmaǵambetov.
Basqosýda sóz alǵandardyń barlyǵy da memlekettiń bolashaǵyna kepil bolatyn osyndaı saıası naýqan kezinde elimizdegi tatýlyq, birlik ǵana syrt kóz qyzyǵatyndaı mańyzdy iske jumyldyratynyn aıtty. Olar azamattyq qoǵam men jergilikti atqarýshy bıliktiń birlesýi, birin biri tolyqtyrýy elimizde talaı ıgi isterdiń atqarylýynan, osyǵan deıingi prezıdent saılaýlarynan kórinis tapqanyn da tilge tıek etti. Aldaǵy prezıdent saılaýynan da judyryqtaı jumylǵan birliktiń kórinis tabatynyna senim bildirdi.
