Tańdaýlylar sapqa turdy
Seısenbi, 20 qarasha 2012 7:08
Aqmola oblystyq keden departamentiniń tabysty qyzmeti jurtshylyq nazarynda ekendigin bilemiz. Munda belgilengen jospar-tapsyrmalar artyǵymen oryndalady. Bul sala qyzmetkerleriniń kásibı biliktilik dárejesiniń bıiktigin kórsetedi. Ony departamenttiń quqyq qorǵaý salasyna jatatyn qyzmetkerlerin kezekten tys attestattaýdyń qorytyndy kezeńine qatysý barysynda ózimiz de aıqyn ańǵardyq.
Seısenbi, 20 qarasha 2012 7:08
Aqmola oblystyq keden departamentiniń tabysty qyzmeti jurtshylyq nazarynda ekendigin bilemiz. Munda belgilengen jospar-tapsyrmalar artyǵymen oryndalady. Bul sala qyzmetkerleriniń kásibı biliktilik dárejesiniń bıiktigin kórsetedi. Ony departamenttiń quqyq qorǵaý salasyna jatatyn qyzmetkerlerin kezekten tys attestattaýdyń qorytyndy kezeńine qatysý barysynda ózimiz de aıqyn ańǵardyq.
Bólmege birinshi bolyp ishki qaýipsizdik basqarmasyna qarasty jedel-qyzmet bóliminiń bas mamany Mıhaıl Garaja enip, áskerı tártippen raport berdi. Ol buǵan deıin test synaǵynan júz paıyzdyq kórsetkishti ıemdenip, dene shynyqtyrý daıyndyǵyn «jaqsy» baǵaǵa tapsyrǵan eken. Ujym ardageri ákimshilik, tártiptik jazaǵa tartylmaǵan. Onyń salmaqty baıandaýlarynan oılaý bolmysynyń keńdigi kórinip turdy.
Jalpy, búgingi synaqta Garaja sııaqty óz isine berilgen azamattar kóp bolyp shyqty. Olar attestattaý komıssııasynyń suraqtaryna dálme-dál jaýap qaıtaryp, qabyldanǵan zańdar men normatıvti qujattardyń qoldanylý aıasyn ashyp áńgimeledi. Bul sanattaǵy 18 qyzmetkerdiń ishindegi jalǵyz qyz bala Ásel Muhaevanyń daıyndyǵy da tyńǵylyqty eken. Qarjy polısııasy akademııasyn byltyr bitirgen ol araǵa kóp ýaqyt salmaı kontrabandamen kúres basqarmasynyń aǵa ınspektory dárejesine kóterilip, ujym abyroıyna bólengen. Sondaı-aq, áskerı boryshyn ótegen kapıtan Temirhan Qanafınniń suraqtarǵa múdirmeı jaýap bergenin atap kórsetken jón. Kezek aǵa maman-kınolog Anatolıı Bocharevke kelgende bólme ishinde jyly jelpinis paıda boldy. Respýblıkaǵa tanymal mamannyń erligi men ónegeli isterin talaı maqalaǵa arqaý etken biz onyń aqtyq synnan oıdaǵydaı ótkenine qýandyq.
Biraq, attestattaý – kóńil aýanyna, qyzmetkerdiń jumys ótiline, tipti, jınaqtaǵan abyroı-bedeline qaramaıtyn qatal syn. Osydan bolsa kerek, keıbir qyzmetkerlerdiń bilgenin umytqanyn, birqatarynyń qarapaıym suraqtardan jańylǵanyn, endi biriniń daıyndalmaı kelgenin de kórdik. Komıssııa ıini jumsaryp ıilýdi, kózjumbaılyqtan ada, ádildigimen baqylaýshy retinde qatysqan bizdiń de kóńilimizden shyqty.
Attestattaý komıssııasynyń tóraǵasy, oblystyq kedendik baqylaý departamenti bastyǵynyń orynbasary Jambyl Balǵabaev 14 kedenshiniń atqaryp júrgen qyzmetine sáıkestigin, bir adamnyń joǵary laýazymǵa usynylatyndyǵyn málimdedi. Al eki qyzmetker qazirgi laýazymynan bosatylyp, quqyq qorǵaý salasyna jatpaıtyn ózge býyndarǵa aýysatyn boldy. Sondaı-aq, ózge saladaǵy qyzmetkerler de synaqtan bosatylmaıdy. Olar úsh jylda bir ret ótip turady. Bul shara keden qyzmetiniń sapynda tańdaýlylar ǵana qalatynyna sendiredi.
Baqbergen AMALBEK,
«Egemen Qazaqstan».
Aqmola oblysy.
