Kúıeýge shyqqan qyz
Senbi, 14 sáýir 2012 7:05
Ol qyzyqtan qur qala ma?
«Meniń qyzym anaý-mynaý emes, Eýropada bilim aldy…» dep, kýpede kúpinip otyrǵan kekseleý áıelge:
– Qyzyńyzdyń jasy neshede? – dep, tóteden saýal tastadym.
Kúıeýge shyqqan qyz
Senbi, 14 sáýir 2012 7:05
Ol qyzyqtan qur qala ma?
«Meniń qyzym anaý-mynaý emes, Eýropada bilim aldy…» dep, kýpede kúpinip otyrǵan kekseleý áıelge:
– Qyzyńyzdyń jasy neshede? – dep, tóteden saýal tastadym.
– Jıyrma beste.
– Turmysqa shyqty ma?
– Joǵa…
– Nege?
– Oıbaı-aý, kúıeý qaıda qashady, sonsha asyǵatyn ne bar, qyzym jas, áli de ómirdiń qyzyǵyn kórsin… oıyn-toıǵa barsyn, armansyz kúlip-oınasyn…
Sál oılanyp otyrdym da: «О́mirdiń qyzyǵy degen ne? Oınap-kúlsin deısiz, sonda ol qandaı qyzyq?» dep ádeıilep suraq qoıdym.
Kekse áıel sál tosylyńqyrap baryp: «О́mirdiń qyzyǵy degen… endi ártúrli nárseler ǵoı… Jer kórip, oınap-kúlip, mashına minip, jumys istep, sándi kıim kıip, degendeı…» dep sóziniń aıaǵyn jutyp qoıdy.
Men:
– Qyzyńyz sonda kúıeýge tımeı qandaı qyzyq kórý kerek? Kúıeýge tıgen qyz kúlip-oınaı almaı ma, álde sándi kıim kıe almaı ma, mashına mine almaı ma? Álde kúıeýge tıdiń dep astyndaǵy mashınasyn GAI tartyp ala ma? Turmysqa shyqqan qyz qandaı «qyzyqtan» qur qalýy múmkin? – dep bastyrmalata jóneldim.
Baıqaımyn, meniń sózderim kórshimniń júregine kilkigen maıdaı tıip otyr. Jaqtyrmaı qaldy. Uıqysynan oıanǵan aıdahar sııaqty maǵan yzbar shasha qarady. Júzine qarasam, ala jazdaı sary shirkeı uıalaǵan sary sýdyń túsindeı sazaryp alǵan…
– Elden attap shyqpaǵan sender ne bilesińder, qyzyqtyń bári shetelde ǵoı. Eshteńeden qur qalmaıdy. Kúıeý de sol jaqtan tabylady.
Osyny aıtty da kekse áıel kýpeden shyǵyp ketti. Men jaýtańdap, kórshi otyrǵan sarykidir kókeme qaradym. Kókem myńq etpeıdi. Álden keıin yńyranyp: «Meniń de qyzym shetelde oqıdy, kúıeý balam da sol jaqtan…» dedi. Men tynysh otyrmaı: «Qazaq shyǵar?», dedim. Kókem aldyndaǵy semiz qazydan bir kertip asap aldy da, maǵan ajyraıyp qarady. «Joq» dedi, «qazaq emes».
Al, aıtarǵa sóz tapshy! Poıyzdan túsip qalmasyń anyq. Ári qarap aýnap túsip, kókiregińdi ulytasyń-aý bir.
Ularbek NURǴALYMULY.
ASTANA.
