Qazaq mektebine zárýmiz deıdi balalaryn qazaq tilinde oqytqysy keletin ata-analar
Beısenbi, 9 tamyz 2012 5:27
Redaksııamyzǵa Almaty qalasyndaǵy Jetisý aýdanyna qarasty «Jumysshy aýyly» turǵyndary joldaǵan hat kelip tústi. Hatta turǵyndar qala ortasynda otyryp derbes qazaq mektebine zárý ekendikterin jetkizedi.
Beısenbi, 9 tamyz 2012 5:27
Redaksııamyzǵa Almaty qalasyndaǵy Jetisý aýdanyna qarasty «Jumysshy aýyly» turǵyndary joldaǵan hat kelip tústi. Hatta turǵyndar qala ortasynda otyryp derbes qazaq mektebine zárý ekendikterin jetkizedi.
Aýyl turǵyndary óz aımaqtaryna jaqyn ornalasqan №109 orta mekteptiń eki tilde tálim beretin aralas mektep ekendigin aıta kelip, Elbasy N.Nazarbaevtyń tapsyrmasyna oraı «100 mektep, 100 aýrýhana» memlekettik baǵdarlamasy aıasynda tolyqtaı jóndeýden ótkizilip jatqan osy oqý ornyn qazaq tilinde bilim beretin gımnazııa etip jańalasa nur ústine nur bolar edi deıdi.
Turǵyndar muńǵa toly hatynda ózderi turatyn eldi mekende memlekettik tilde oqytatyn mekteptiń joqtyǵyn, qalanyń ózge aýdandaryndaǵy qazaq mektepterine qatynaý úshin balalarynyń Raıymbek dańǵylyna deıin bir jarym shaqyrym jaıaýlap jetetindigin aıtýda. Bul ásirese, ekinshi aýysymda oqıtyn oqýshylar úshin úlken qıyndyqtar týǵyzýda. О́ıtkeni, olar qysty kúnderi sabaqtan óte kesh shyǵady.
El aýzynda «Jumysshy aýyly» atanyp ketken bul meken qalanyń kúre tamyry Raıymbek dańǵylyna jaqyn ornalasqan. Degenmen de, turǵyndarynyń negizi qazaq otbasylary bola tursa da kúni búginge deıin memlekettik tilde bala tárbıeleıtin kıeli shańyraqqa qol jetkize almaı keledi. Baýyr eti balasy qazaq tilinde bilim alsa eken deıtin ata-ana bul kúnde qalanyń basqa aýdandarynda tirkelýge májbúr. О́z otbasynan jyraqtaǵy mektepke qatynaýmen ata-ana da, oqýshy da qajyǵan.
«El ekonomıkasyna úles qosýda Almaty qalasynyń alar orny aıryqsha ekendigi belgili» dep jazady hat ıeleri, «mektepter men aýrýhanalarǵa, bala tárbıesi men memlekettik tilge qamqorlyq jasalyp otyrǵan myna zamanda aralas tilde bala tárbıelep otyrǵan №109 orta mektepti taza qazaq tilindegi gımnazııa etip qaıta jasaqtaýdy suraımyz».
Qalaı bolǵanda da, qala ortasynda otyryp, qazaq mektebine qoly jetpeý degen kóńilge kirbiń uıalatar is. Talaı taǵdyrdy oń jolǵa salǵan memlekettik baǵdarlamalar aıasynda bálkim, osy «Jumysshy aýylynyń» máselesi de oń sheshimin taýyp qalar degen úmittemiz.
Qanat ESKENDIR,
«Egemen Qazaqstan».
Almaty.
