Muhıt TURSYNBAEV: “Úsh altyn alýǵa qabiletti sańlaqtarymyz bar”
Seısenbi, 19 maýsym 2012 7:39
Dúbir
Olımpıadaǵa 38 kún qaldy
Almaty oblystyq sport jáne dene tárbıesi basqarmasynyń bastyǵy Muhıt Tursynbaev kóńildi. Kóńildi bolatyndaı jaǵdaıy bar. Máskeýden qýanyshty habar kelgen. Jeńil atlet Sholpan Qojahmetova Máskeýde ótken halyqaralyq jarysta sporttyq júristen aıdarynan jel esip, Olımpııa oıyndaryna joldama alǵan. Osyndaı kóńildi sátinde biz de Muhıt TURSYNBAEVPEN áńgimelesip qalýǵa umtylǵan edik.
Seısenbi, 19 maýsym 2012 7:39
Dúbir
Olımpıadaǵa 38 kún qaldy
Almaty oblystyq sport jáne dene tárbıesi basqarmasynyń bastyǵy Muhıt Tursynbaev kóńildi. Kóńildi bolatyndaı jaǵdaıy bar. Máskeýden qýanyshty habar kelgen. Jeńil atlet Sholpan Qojahmetova Máskeýde ótken halyqaralyq jarysta sporttyq júristen aıdarynan jel esip, Olımpııa oıyndaryna joldama alǵan. Osyndaı kóńildi sátinde biz de Muhıt TURSYNBAEVPEN áńgimelesip qalýǵa umtylǵan edik.
– Búginde oblysymyzdyń qorjynynda 8 joldama bar.
– Osy sporttyq júristen Azııa chempıonatynyń 2011 jylǵy qola júldegeri Aıman Qojahmetova men Sholpan Qojahmetova aǵaıyndylar-aý.
– Aǵaıyndylardan da jaqyn. Ekeýi egiz. Aıman bıyl aqpanda Reseıde ótken ashyq chempıonatta 20 shaqyrymdy 1:30,55 sekýndta júrip ótip, Londonǵa joldama alǵan bolatyn. Endi Sholpan jarysqa túskende qasynan qalmaı jigerlendirip júgirip otyrypty.
– Dzıýdoda Aıman men Sholpan Qalıeva degen keremet balýan qyzdar boldy. Talaı halyqaralyq jarystarda qarsylastaryn qamyrsha ılep, jeńimpaz da bolǵan. Tek, Olımpııa oıyndarynda sáttilik jetispedi. Al Aıman men Sholpan Qojahmetovalardyń Londonda joly ońǵarylsyn dep tileıik.
– Qazaq qyzdarynyń Olımpııa oıyndaryna sporttyń osy túrinen barýynyń ózi – tarıhı oqıǵa. Áý basta oblys jeńil atletıkasynyń bas bapkeri Marat Jórgenbaev “qarjy máselesin sheship berseńiz, 3 joldama alýǵa múmkindigimiz bar” degende, maqul, qarjy tabaıyq. Bir joldama ala alsaq ta razymyn degenmin. Olımpıadaǵa qatysýǵa ruqsat alýdyń qıyn ekenin bilesiz. Keıde tańdaýly sportshylardyń ózi joldama ala almaı qalatyn jaǵdaılar kezdesedi. Kópsaıystan Atlanta Olımpıadasynyń chempıony Aleksandr Parygın keıin shetelde jattyqsa da, Qazaqstan bar keregine qyrýar qarjy quısa da joldama ala almaǵan. Álemde mundaı oqıǵalar kóp. Al Jórgenbaev sózinde turdy. Aıman, Sholpannan bólek Artem Kosınov degen jeńil atletimiz de Londonǵa barady.
– Muhıt, Qazaqstan aýyr atletteri quramasynyń bas bapkeri Alekseı Nı bir suhbatynda “Londonda úsh altynǵa talasamyz” dep qaldy. Úsh altyn medal alamyz degendi de aıtqan. Árıne, osynshama altyndy dúnıe júziniń aýyr atletteri Qazaqstanǵa kózi qıyp, berip jiberedi degenge sený qıyn. Afına Olımpıadasyna tórt altyn alamyz dep baryp, jalqy altynmen qaıttyq. Onda da Olımpıadaǵa joldamany eń sońǵy kezeginde alǵan Baqtııar Artaevtyń janqııarlyqpen julyp ápergen altyny ókinishti ahýaldan qutqarǵany este bolǵan soń aıtyp jatyrmyz. Aryq aıtyp semiz shyq degendik qoı bizdiki. Jalpy, Qazaqstan aýyr atletter quramasynda altyn medalǵa talasatyn bes atlet bolsa, sonyń úsheýi Almaty oblysynan eken.
– Zúlfııa Chınshanlo, Maııa Maneza jáne Svetlana Podobedovany aıtyp otyrsyz ǵoı.
– Árıne, Taldyqorǵandaǵy “Jastar” sport saraıynda ótken el chempıonatyna arnaıy bardyq. Myq shegedeı Zúlfııa bolmasa, Maııa men Svetlana el ishindegi jarystyń ózinde kóńildi qobaljytty. Ekeýi de serpe kóterýdiń has sheberi. Al julqı kóterýge kelgende Maııa Irına Nekrasovadan baqandaı 6 kelige qalyp ketti…
– Irınańyz da ońaı adam emes qoı. Beıjiń Olımpıadasynyń kúmis júldegeri. Jan-tánimizben qansha qalaǵanymyzben, sportta pálen dep aldyn ala boljam jasaý qıyn. Bir kezderi Olımpııa oıyndary, álem chempıonattarynda bas júldeni kúrep alatyn Túrkııa aýyr atletteri búginde júldesiz qalatyn boldy. Qyzdarymyzǵa sáttilik tileıik. Maııa men Svetlana óz isiniń has sheberleri. Qudaı kesirinen saqtasa, ekeýiniń de altynǵa talasýǵa kúshi jetedi. Ekeýi de eki dúrkin álem chempıony.
– Iá, Olımpıada chempıony Taner Sagırdiń Beıjińde “baranka” alǵanyn kózimiz kórdi. El birinshiliginde Olımpıada chempıony, eresekter arasynda 3 ret, jastar men jasóspirimder arasynda 2 ret álem chempıony bolǵan ataqty Ilıa Ilınnen julqı kóterýde 7 keli artyq kótergen álem chempıony Vladımır Sedov serpe kóterýde 217 kelini úsh kezek ala almaı ketti ǵoı. Janyńa batqan shyǵar?
– Janyńa batty degen jáı sóz. Ashýymyz terimizge syımaı ketti degen jeńilirek shyǵar. Aýyr atletter jattyǵyp jatqan Tekelige jıi baramyn. Sonda Sedov serpe kóterýde 220 kelini erkin baǵyndyryp júrgen. Jattyqtyrýshysy Donnyń da arqasynan taspa tildim. Jaýyngerlik rýh jetpeıdi eken ulymyzda. Al Qyzylorda mektebiniń túlegi Almas О́teshovtiń tabysyna shyn qýandym. 220 kelini birinshi kezeginde ala almaǵan ol 225 keli kóterdi-aý. Azamat eken.
– Kúres túrlerinen de altyn kútip otyrǵanymyz belgili. Máselen, Grek-rım kúresinen astanalyq Almat Kebisbaev pen Almaty oblysynyń balýany Nurmahan Tinálıev. Azııa oıyndarynyń jeńimpazy, Máskeý men Ystambulda ótken álem chempıonattarynyń qola júldegeri Nurmahan Tinálıevten jankúıerlerimiz altyn medal kútip júr…
– Máskeýde Sıdneı Olımpıadasynyń chempıony, álem chempıonattarynda asyǵy alshysynan túsip júrgen Hasan Baroevty aýnatyp ketken Nurmahan qaı qurmetke de laıyq. Sonymen qatar, erkin kúresten álem chempıonatynyń qola júldegeri Dáýren Jumaǵazıevten de (60 kg) kúterimiz mol. Jeńimpaz bolmady dep talap qoıý qıyn, júldeger bolyp jatsa, aq túıeniń qarny jarylǵany.
– Olımpııa oıyndarynda olja salady degen sportshylarǵa taldaý jasap otyrsaq, altyn alady degenniń deni Almaty oblysy sportynyń órenderi eken. Jas shybyqqa sý quımasań, tamyr almaıdy. Sol sııaqty myqty sportshylarǵa jaǵdaı jasamasań, jarystarǵa, em-domyna qajet qarjyny ýaqytynda taýyp bermeseń, nátıje kútý qıyn. Almaty oblysy bul jaǵynan sportshylardy renjitpeıtinin bilemiz.
– Durys baıqaǵansyz. Agenttikten, Ulttyq olımpıada komıtetinen alyp jatqan kómekterin esepke alǵan emespiz. Buryn Almaty oblysy myqty sportshylarymen maqtana almaıtyn. Serik Úmbetov aǵamyz oblys ákimi bolyp turǵan kezderden bastap óner adamdary men sportshylarǵa aıtarlyqtaı kómek kórsetilip keledi. Bıyl oblys ákimi Ańsar Musahanov Nurmahan Tinálıev pen Ashat Dilmuhamedovke Qaskeleń qalasynan eki bólmeli páter bóldi. Jattyǵýlaryn alańsyz jasaý úshin. Eki balýanymyz álem chempıonatynan oljaly oralǵanda Taldyqorǵannan da páter berilgen. Endi Dáýlet Jumaǵazıev úıli boldy. Osy úsh balýandy Eńbekshiqazaq, Kerbulaq jáne Qarasaı aýdandarynyń ákimdigi bólip alyp, aı saıyn 500 myń teńge beredi. Onyń syrtynda oblys ákiminiń 150 myń teńge stıpendııasy bar. Sportshylar memleketimizdiń, elimizdiń namysy úshin jattyǵý zaldarynda teńizdeı ter tógip júr. Olardyń eńbegi laıyqty baǵalanýy kerek.
Talantty sportshylarymyzdyń Almaty oblysynda kóbeıip kele jatqandyǵynyń bir ushyǵy osynda jatqan shyǵar. Al, London olımpıadasy oıyndarynda altyn alyp jatsaq, tórt jylǵy eńbektiń óteýi bolmaq, Qazaqstannyń aty dúnıe júzine máshhúr bolady. Qazir bos qarjy joq. Elimizdiń sportyn órkendetý úshin bar jaǵdaıdy týǵyzyp otyrǵan Elbasyǵa sportshylarymyzdyń atynan rahmetimizdi aıtqymyz keledi.
Nurmahan Tinálıev bapkeri Muratbek Qasymhanovpen jáne Kúres túrleri federasııasynyń qurmetti prezıdentti Dáýlet Turlyhanovpen birge.
Svetlana Podobedova.
Almas О́teshov.
Áńgimelesken Baqtııar TAIJAN,
«Egemen Qazaqstan».
Almaty oblysy.
