Grek-rım balýandary bir altynnan úmitti
Beısenbi, 21 maýsym 2012 7:42
Dúbir
Olımpıadaǵa 36 kún qaldy
Qazaqstannan London Olımpıadasyna baratyn sportshylardyń etek-jeńi jınaqtaldy. Sońǵy daıyndyqtar júrip jatyr. Onsyz da kóńili kúpti bolyp júrgen sportshylardy alańdatýǵa bolmaıdy. Sondyqtan da olımpıadashylardyń esigi jabyq. Jaqynda bizdi grek-rım balýandarynyń kezekti jattyǵýyna shaqyrdy. Suhbattasýǵa múmkindik berildi. Kóńilde júrgen saýaldarǵa jaýap aldyq.
Beısenbi, 21 maýsym 2012 7:42
Dúbir
Olımpıadaǵa 36 kún qaldy
Qazaqstannan London Olımpıadasyna baratyn sportshylardyń etek-jeńi jınaqtaldy. Sońǵy daıyndyqtar júrip jatyr. Onsyz da kóńili kúpti bolyp júrgen sportshylardy alańdatýǵa bolmaıdy. Sondyqtan da olımpıadashylardyń esigi jabyq. Jaqynda bizdi grek-rım balýandarynyń kezekti jattyǵýyna shaqyrdy. Suhbattasýǵa múmkindik berildi. Kóńilde júrgen saýaldarǵa jaýap aldyq.
Daıyndyqtyń sońǵy kezegine óttik
Londonǵa joldama alǵan bes balýanymyz jaıly kóp áńgime aıtýǵa bolady. Máselen, Almat Kebisbaevty alsaq, óte daryndy jigit. Máskeýde ótken álem chempıonatynda úshinshi oryn alǵan, Ystambulda ótken álem chempıonatynda fınalǵa shyqty. Iаǵnı, ósý ústinde. Onyń eń basty ereksheligi-qarsylasynyń ataq-dańqynan qaımyqpaıdy. Tik turǵanda da, parterde de óte jaqsy kúresedi. Tehnıkalyq arsenaly baı, fızıkalyq daıyndyǵy kúshti.
Osyndaı baǵalaýdy Darhan Baıahmetovke de qaratyp aıtýǵa bolady. Tájirıbeli balýan, álemdegi myqty sanattaǵy balýandardyń ózi Baıahmetovtiń parterde qursaýyna túsip qalsa, shyǵyp ketýi qıyn. Sál qateligin keshirmeıdi, upaı oljalap ketedi.
Al Ashat Dilmuhamedov pen Danıal Gadjıev – olımpıadashylar úshin jumbaq kúsh ıeleri. Bulardyń ádis-aılalarymen kóp sportshylar syrminez emes. Kilemde kóbi jolyqpaǵan. Danıal Gadjıev – Reseıde úshtikke kirmegen balýan. Alǵashynda bir salmaq tómen kúrestirip kórdik, Qazaqstan balýandarynyń ishinde ózin kórsete almady. Salmaǵyn bir satyǵa ósirip edik, Astanada ótken lısenzııalyq jarysta bárin túrip shyqty. Ekeýi de taısalmaı kúresedi. Eń aýyr salmaqtaǵy beldesetin bas balýanymyz Nurmahan Tinálıevke Qazaqstan baıraǵyn Londonda kóterip shyǵý senimi bildirildi. Nurmahan ondaı senimge laıyq. Sońǵy eki álem chempıonatynda tańdaýly úshtikke kirdi. Kýba, Reseı, Iran jáne basqa memleketterdegi tańdaýly balýandarmen terezesi teń, deńgeıleri birdeı. Sondyqtan, kesip-piship áldeńe aıtý qıyn. Biraq, biz Nurmahanǵa senemiz. Sparrıng-partner jaǵy qıyn boldy. Almaty oblystyq ákimdigi men Sport jáne dene tárbıesi isteri jónindegi agenttiginiń kúsh salýymen Grýzııa jáne Qyrǵyzstannan qos balýan aldyrdyq. Olardyń jol shyǵyny, tamaǵy, qonaq úıi, qylaıaǵy qaltasyna beriletin syıaqynyń ózin “Samuryq-Qazyna” ál-aýqat qory kóterip otyr.
– Nurmahan Tinálıev pen Áset Mámbetov Marat Turlyhanovtyń bapkerligimen Reseı quramasynda jattyǵyp edi. Áset Beıjińde ótken Olımpııa oıyndarynda úshtikke kirdi. Nurmahan da osy ýaqyt aralyǵynda jaqsy ósken sııaqty.
– Dáýlet Turlyhanov aǵamyz Reseı grek-rım kúresi federasııasynyń prezıdenti Mıhaıl Mamıashvılımen syralǵy dos. KSRO quramasynda birge bolǵan. Sondyqtan, qos balýanymyzdy qurama sapyna qosqan. Kil myqtylarmen beldesýdiń mańyzy úlken. Ekeýi de sheberlikterin arttyrdy. Biraq, sportta memleketaralyq báseke degen bolady jáne oǵan túsinistikpen qaraýymyz kerek. Qazir bar memleketter olımpıadashylarynyń esigi jabyq, eshkimdi kirgizbeıdi. Biz de sondaı prınsıptemiz. Ár quramanyń óz daıyndyq jumysy, Olımpıadadaǵy qarsylastaryna jeke daıyndap jatqan “qarýy” bar, syryńdy aldyryp qoısań, sporttyń eń úlken dodasyna qatysyp ne kerek?!
– Erkin kúres quramasy 7 joldama aldy. Biz medal kútip úırengen grek-rım balýandarynyń qorjynynda 5 joldama. Qońyltaqsyp júrgen joqsyzdar ma?
– Eń jeńil salmaqta Ashat Qudaıbergenov pen Marat Kárishalovqa tańdaý túsken. Jeke-dara kezdesýde Ashat basym túskendikten joldama alý jarysyna kóbirek qatysýǵa múmkindik berdik. Ekeýi de ala almady. Al, osy salmaqtaǵy álemniń 5 dúrkin chempıony Hamıt Sorıannyń joldamaǵa Astanada ótken lısenzııalyq jarysta ǵana qoly jetkenin eskersek, eshbir jeńistiń ońaı kelmegeni kórinedi.
96 kılo salmaqta kúmánsiz sengen balýanymyz Áset Mámbetov bolatyn. Oń aıaǵyna eki, sol aıaǵyna bir operasııa jasatty.
Jaraqaty jazylýy kesheýildegen soń Marǵulan Ásembekovti qostyq. Joldama alý onyń qolynan kelmedi. Eki aıaǵyn da kúres kileminde jaraqattaǵan Ásetke el bolyp alǵys aıtýymyz kerek. Ol elimizdiń namysy úshin qolynan kelgeniniń bárin jasady. Kilemmen qoshtasty.
– Bizdiń balýandarymyzdyń basty qarsylastarynyń kúresi týraly beınetaspalar bar shyǵar. Kimmen qalaı kúresý kerektigi jóninde bapkerler keńesinde talqylana ma? Eshkimge kórsetpeı daıyndalǵan jeke ádister de pysyqtala ma?
– Bul bizdiń qupııamyz bolyp qalsyn, siz aıtqan jumystardyń bári júrip jatyr.
Dáýlet Bolatuly FILA-dan kóp beınetaspa ákeldi. Jarys barysynda ózimizdiń bapkerler, balýandar túsirgen taspalar bar. Qaraketsiz emespiz.
– Mynaý bas báıge oljalaıdy dep eshkimdi kesip aıtpadyńyz. Josparda bir «altyn» bary anyq qoı?
– Sonaý Jaqsylyq Úshkempirov, Shámil Serikovtiń jeńisti jyldarynan keıin birde-bir qazaq balasy Olımp taýynyń shyńyna shyqpaǵany bárimizdiń de qabyrǵamyzǵa aıazdaı batady. Seýlde Dáýlet Turlyhanovtyń jeńisi urlanǵanyn bilesiz. Balýandarymyzdy bóle-jarǵym kelmeıdi. «Altynǵa» Ashat ta, Darhan da, Nurmahan da talasýǵa qabiletti. Eń aýyr salmaqta Olımpııa oıyndarynda kúresken balýanymyz bolǵan joq. Kúsh atasy Qajymuqannyń izbasary, Qazaq baıraǵyn kóterip bara jatqan Nurmahannan kútetinimiz kóp.
– Inshalla , sol úmit aqtalǵaı.
Muratbek Qasymqanov,
grek-rım kúresinen Qazaqstan quramasynyń bas bapkeri:
Almat Kebisbaev: «Júlde alýǵa baramyz»
Almat sporttaǵy “dıagnozdy” dál qoıdy. Árqaısysy bólek-bólek jarystar sekildi kóringenimen Olımpııa oıyndary baǵdarlamasyna kirgen sport túrleri úshin basty nysana – Olımp bıigi.
Sondyqtan da bolar, daǵystandyq balýan, erkin kúresten álemniń bes dúrkin chempıony Álı Álıevtiń “osy bar altynymdy esh oılanbastan Olımpııa oıyndarynyń bir medaliniń bodaýyna berer edim” degendigi. Iаǵnı, Azııada alda bol, Eýropada erle, álemdik tuǵyrdyń eń úlken basqyshyna kóteril, báribir Olımpıadanyń jóni bólek.
AQSh sportynyń maıyn ezip ishken, ártúrli jylnamalardy qarap janarynyń nury qashqan, júldegerler men jeńimpazdardyń ár jarystaǵy jetistikterin sanamalap tisi sarǵaıǵan beldi aqparattyq-taldaý ortalyǵy grek-rım kúresinen Londonda chempıon bolatyndardy qulaǵynan tizip jazypty. Boljam ǵoı.
Sol tizimde, Almat Kebisbaev óz salmaǵy boıynsha chempıon, al Nurmahan Tinálıev pen Darhan Baıahmetovtiń tusyna qola medal jazylǵan. Taldaý ortalyǵynyń jigitteri jeti qat jer astyndaǵy qupııany biletin, ańyzǵa shyqqan Nostradamýs sekildi kóripkel emes, degenmen júregimiz erip qoıa bergen. Qajymuqandaı alyby bar, týymysynan jekpe-jek ónerine jaqyn jaýynger halyq uldarynyń kúres túrlerinen Olımp bıigine kóterilmegenine otyz jyldan asypty. Qazaqtyń shıregine kelmeıtin, sany az halyqtardyń ózi alyp jatqan altynnan salym salmaıtyndaı bizdiń jigitter nesibesiz emes edi ǵoı.
Qýanyshymyzdy Ashatqa aıttyq. Eki álem chempıonatynan qola men kúmis arqalap qaıtqan baýyrymyzdyń endigi júldesi altyn ekendigin aıttyq.
– Qudaı buıyrtsa, – dedi ol. – О́zimiz úshin de, elimiz úshin de osy maqsatta ter tógip júrmiz. Olımpıadada mynaý qalaı, mynaý tiske jumsaq balýan degen bolmaıdy. Árqaısysy óz eliniń chempıondary, halyqaralyq jarystarda betke ustary, eliniń súıinishi. Men úshin bári basty qarsylas.
– Bapkeriń seniń boıyńnan bir kinárat tappady. Qara kúshke myǵym ekendigińdi baıqap otyrmyz. Álginde qarsylasyńdy qapsyra qushaqtap, keýdeńnen asyra laqtyrdyń. Olımpıada da mundaı múmkindik bere bermeıdi. Kóńiliń tolmaıtyn tusyń bar ma?
– Parterde kóp jumys jasaýym kerek. О́zińiz bilesiz, tik turyp kúreskende árbir balýan saqsynyp, ádis jasaýǵa bara bermeıdi. Qarsylasy qateligin paıdalanyp ketpes úshin. Parterge senedi. Parterde jer baýyrlap jatqan balýannyń belinen alyp, yńǵaıly jaǵyna aýdaryp tastaý ár balýannyń armany. Ábjildik te, qaıyspaı kóterip keterdeı qara kúsh te kerek. Sondyqtan, ár ádisti pysyqtap jatyrmyz. Qudaı qoldap, memleketimizdiń mereıin kóterip jatsaq, bizge artqan senimdi aqtaǵanymyz. Basqa ne deıin…
Darhan Baıahmetov: “abaı jolyn” qaıta oqyp jatyrmyn
Darhannyń beldesýin Beıjińde kórdik. Gýanchjoýda ótken Azııa oıyndarynda fınalǵa shyǵyp, jeńip turyp jeńilip qaldy.
– Onda ózimnen boldy, – dedi ol. – Kúshimdi tolyq esepteı almappyn. Áıtpese, jeńiletin beldesý emes edi.
– Kóńilińe kelse keshir. Sol joly kózińnen ushqyn kóre almadyq. Beıjiń Olımpıadasyndaǵy qaısar jigit babynan aıyrylyp jatqandaı kórindi.
– “Shyǵasyǵa ıesi basshy” degen bar ǵoı. Olımpıadada fınalǵa shyǵatyndaı múmkindigim bar edi. Fınalǵa joldama berer tusta qatelik jiberdim. Qola medaldiń ózi qýanyshtaı kóringen. Sol kezde oılanbappyn, keıin júregim aýyrdy. Olımpıada oıyndarynyń chempıony bolam ba, bir Allanyń qolynda ǵoı, biraq, sál aqyldyraq kúreskenimde fınalǵa shyǵatynym sózsiz edi.
– Olımpıadaǵa joldamany jeńip alǵanyńmen Baıahmetov kúshti me, basqalar kúshti me degen pikir bapkerler aýzynan estildi…
Olımpıadaǵa daıyndyq barysynda syralǵy qarsylastaryń Qońyratov, Eńsehanov jáne Nuǵymanovtar kórinbeıdi.
– Adam bolǵan iske kináni ózinen izdeý kerek. Álem chempıonatynda bestikke kirgennen keıin ózime talapty álsiretip aldym. Qazaqstan Kýbogy úshin ótetin jarysqa qatysatynymdy aıtty. Ras aıtsam, kútpegen edim. Eldar Qaıratovtan utyldym. Sodan soń Baıahmetovtiń Londonǵa barý, barmaý máselesi kóterildi. Biraq, báribir tańdaý maǵan jasalyndy. Qazaqstandaǵy qarsylastarymnyń ishinde Darhanǵa artyqshylyq jaǵdaı jasalady dep aıtqandary baryn estip qaldym. Ne deýge bolady.
Men eshkimniń ornyn tartyp alǵan joqpyn. Joldamany jeńip aldym. Al, siz ataǵan myqty balýandar quramany daıyndaý jattyǵýyna kelmeı jatsa, ol olardyń jáne bapkerlerdiń jumysy. Al, meniń olımpıadaǵa qatysý múmkindigim bolmaǵanda da bapkerler shaqyrsa kelgen bolar edim. Elińniń, memleketińniń namysyn qorǵaýǵa bara jatqan balýannyń oıdaǵydaı daıyndaýyna septigińdi tıgizip jatsań, ol seniń azamattyǵyń, dostyǵyń ǵana emes, Otan aldyndaǵy abyroıly boryshyń. О́zim osylaı túsinemin.
– Qazaq mektebinde oqydyń. Kitappen dos shyǵarsyń? Qazir qandaı kitap oqyp jatyrsyń?
– Qazir qol tıe bermeıdi. Negizinde tarıhı kitaptardy jaqsy kóremin. Oqyǵym keledi, ınternet degen de bále boldy, ishine enseń shyrmalyp qalasyń. Mende “Abaı jolynyń” qos tomdyǵy bar. 1-tomyn oqyp jatyrmyn. Abaıy bar qazaq baqytty ǵoı. Janyńda joǵyńnyń bárin tabasyń. Qazaq jastary Abaıdy túsinip oqysa, batystyń beıádep mádenıetinen tıylar edi dep oılaımyn. Mekemtas Myrzahmetov degen ǵalym aǵamyz Qoja Ahmet Iаssaýı, Abaıy men Shákárimi bar qazaq jahandanýǵa jutylmaıdy, ımanyn, aryn joǵaltpaıdy dep júr. Osyny jastarǵa uqtyrý ustazdardyń qabiletine, biliktiligine qatysty. Biri kelip, biri ketip jatatyn, reforma jasaǵysh mınıstrler osy jaǵyn álsiretip alǵan sekildi.
– Beıjińde ketken eseńdi Londonda qaıtarýǵa tyrysasyń ǵoı?
– Qudaı qos kórse. Dúnıejúziniń bar myqtysy olımpıadada jeńsem, jeńimpaz bolsam dep barady. Ishinde qazaqtyń Darhan Baıahmetov degen balasy da bar. Armanym árıne – jeńis!
Nurmahan Tinálıev: Baıraq kóterý – jaýapkershilikti eseleıdi
– Tolǵan sııaqtysyń. Salmaǵyń qansha?
– 130 kılo. Olımpıadaǵa 120 kılo jiberiledi. Kúnige eki mezgil jattyǵý jasap jatyrmyz. On-on bes kúnde artyq salmaqtan arylamyn ǵoı.
– Qazaqstanda saǵan qarsylas joq. Baıaǵyda Muhtarhan Dildabekovti Serik О́mirbekovteı myqty ósirip edi. Reseıge baratyn edińder, olar esigin qulyptap aldy.
– Grýzııa men qyrǵyz balýany maǵan kómektesip júr. Kelisimmen, árıne. Rasynda, ózińmen qaraılas úsh-tórt balýan bolsa arman joq eken. Sheberligiń tez ósedi. Georgıı Sýrsýmııa aǵamyz kúres kilemine men úshin shyǵyp júr. Sıdneı Olımpıadasynyń kúmis júldegerinde biz úırenetin tájirıbe jetedi.
– Pesheneńe Londonda qazaq baıraǵyn kóterý jazyldy.
– Qatty tolqyp júrmin. Jaýapkershilik úlken. Onsyz da jeńsem dep barasyń. Tý kótergen sportshynyń júgi eki eselenedi. Halqymyz seńgennen keıin barymyzdy salamyz.
– Eń aýyr salmaqta Olımpıada oıyndaryna tuńǵysh qatysqan qazaq ulanysyń. Munyń ózi tarıh. Qarsylastaryń da osal emes. Bárimen derlik kúrestiń…
– Reseı, Kýba, Túrkııa, Iran, Ázerbaıjannyń bas balýandary Londonda jeńimpaz bolsaq degen úmitte. Men de solardyń birimin. Ýaqytynda Qajymuqan atamyz eń aýyr salmaqta dúnıejúziniń bar myqty balýanyn jyqty. Ábilseıit Aıhanov aǵamyzdy Keńes saıasaty tusamaǵanda Olımpıadanyń altynyn áldeqashan alǵan bolar ma edik.
Aǵalarymyzdyń qoly jetpegen alamanǵa qatysý meniń pesheneme buıyrypty. Barymdy salarmyn.
Suhbattan soń zaldan kete qoımadym. Menshikti tilshi bolǵan jyldarda úlken sporttan qol úzińkirep qalyppyz. Kóp jáıttar sanada kúńgirttenedi. Osy televıdenıe degen de qyzyq-aı. Adam tappaǵandaı bir japyraq qyzdardy jibergen. Kúres erejesi murnyna barmaıtyn, balýandardyń aty-jónin shatastyryp júrgen shirkinder jattyǵý jasap jatqan balýandardy saýsaǵymen ilip shaqyryp, “altyn alasyń ba?” dep taqymdaıdy. Quddy, Londonda qazaq baýyrlardyń nesibesi dep altyn medaldardy biriniń ústine birin qalap qoıǵandaı.
Al, altyn kerek. Kúres túrlerinen altyn medal almaǵanymyzǵa 30 jyldan asa ýaqyt ótipti. Qazaq jastaryn aıtam.
Qaısynyń baǵy janar eken?! Anaý, qarsylasyn jerden salaqtata julyp alyp, shalqaıa bere laqtyrǵan Almat pa, álde mysyqtabandap tap bergen Darhan ba?! Parterde kilemge shegelep tastaǵandaı bylq etpeı jatqan Nurmahan ba?! Dinmuhamedov pen Gadjıevti de esten shyǵarýǵa bolmaıdy.
Úsh qatar tóselgen kúres kileminde qara terge túsken balýandar alapat aıqas salyp jatyr. Zalda ter ıisi ańqıdy. Bizdiń balýandardyń altyn teri. Endi az kúnnen keıin san ǵasyrda eskirmeıtin aıqasqa túsedi.
Tórt jyl boıy tógilgen terlerińniń óteýi London tórinde qaıtqaı. Joldaryń bolsynshy, batyr baýyrlarym-aı…
Baqtııar TAIJAN,
“Egemen Qazaqstan”.
Almaty.
Alaqaı! 107 joldama!!!
Sport jáne dene tárbıesi isteri jónindegi agenttiginiń Ulttyq shtattyq komandalar jáne sport rezervi dıreksııasy elimizden Olımpııa oıyndaryna joldama alǵan sportshylardyń sany 107-ge jetkenin habarlady.
Sóıtip, otandastarymyzdyń Olımpıadada sporttyń 25 túrinen qatysatyny belgili boldy.
Bıylǵy Olımpıadaǵa Qazaqstan tennıs, ashyq sýda júzý, qyzdar boksynan alǵash ret sportshy apara jatyr.
Tennısten áıelder arasynda álemniń 55-raketkasy Galına Voskoboeva men WTA reıtınginde 62-orynda turǵan Iаroslava Shvedova jáne erler arasynda Mıhaıl Kýkýshkın Londonǵa joldama aldy. Úsh tennısshimiz jekeleı jarysqa qatysady. Olardan basqa, Shvedova men Voskoboeva ekeýi juptyq básekeniń de júldesine kúsh synasady.
Al ashyq sýda júzýden Iýrıı Kýdınov Londonǵa barady. Bul sport túrinen de Qazaqstan buryn-sońdy Olımpııa oıyndaryna qatyspaǵan.
Qyzdar boksynyń Olımpıada baǵdarlamasyna tuńǵysh ret engizilgeni belgili. Jaqynda joldama alǵan Saıda Hasenovamen birge Marına Volnovanyń da Londonǵa baratyny belgili boldy.
Olımpıaǵa baratyn sportshylardyń ishinde eń jasy – 17 jasar gımnastıka sheberi Móldir Ázimbaı. Al eń úlkeni – 42 jastaǵy mergen Olga Dovgýn.
Eń kóp joldamany jeńil atletter ıelendi – 18 lısenzııa. Londonǵa baratyn atletterdiń arasynda apaly-sińlili Aıman men Sholpan Qojahmetovalar bar.
Ázirge bizdiń qorjynda ústel tennısi, sadaq atý, badmınton, velotrek, at sportynan lısenzııa bolmaı tur.
Aldaǵy ýaqytta jeńil atletıka men júzýden taǵy da 10-nan astam joldama alýǵa múmkindik bar. Bul sport túrlerinen irikteý jarystary áli bitken joq.
Dastan KENJALIN,
«Egemen Qazaqstan».
Boks: Qaı eldiń úlesi qandaı?
Biz ótken joly Olımpıadanyń boks týrnırine qatysatyn bylǵary qolǵap sheberleriniń esimderi tolyq belgili bolǵany týraly aqparat jarııalaǵan edik. Búgin sol alaman jarysqa ár el boıynsha qansha boksshynyń qatysqaly turǵanyn naqtyly sıfr júzinde kestelep kórsetkeli otyrmyz. Osyǵan qarap qaı eldiń úles salmaǵy qanshalyqty ekenin de, búgingi tańda álemniń qaı elinde bokstyń damý barysy qalaı bolyp turǵanyn da paıymdaýǵa bolady. Bul turǵydan kelgende, Qazaqstan boksshylary jahandaǵy kósh bastaýshylardyń qatarynda tur.
Tómendegi kestede toptyń basyn Avstralııa quramasy bastaıdy. Biraq buǵan qarap osynaý alystaǵy araldy eldiń boksshylary álemde naǵyz sharshy alańnyń shandozdary bolyp otyr eken degen uǵym týmaýy tıis. Bul jerde bul el úshin irikteý týrnıriniń óte jeńil bolyp shyqqanyn aıtýymyz kerek. Bakýde bolǵan álem birinshiliginde júldeli oryndar turmaq, lısenzııa taratylatyn alǵashqy ondyqtyń da qatarynan tabylmaǵan avstralııalyqtar keıin Okeanııa aımaǵy boıynsha ótken irikteý týrnırinde ondaǵy 10 joldamany túgel jeńip aldy. Al básekelesteri qatarynda Fıdjı, Palaý, Batys Samao sekildi elderdiń judyryqshy jigitteri boldy. Mundaǵy bar jumbaq osy ǵana…
Qalǵan qurlyqtardyń bárinde kvota úshin talas asa tartysty jaǵdaıda ótti.
Jalpy, burynyraqtaǵy Olımpııalyq týrnırlerge Kýba, KSRO, AQSh, Germanııa, Anglııa, Vengrııa, Polsha syndy belgili boks derjavalary tolyq qurammen qatysýshy edi. Qazir ondaı jalpaqshesheıliktiń kúni ótken. Endi lısenzııalar jekelegen elderge emes, sol elderdiń jekelegen boksshylaryna beriledi. Sonymen qatar, boks túri nashar damyǵanyna qaramastan, Afrıka jáne Okeanııa aımaǵy elderi úshin aıtarlyqtaı mol mólsherde lısenzııa bólinedi. Bul negizinen osy óńirler boksshylary da úlken dodadan tys qalmasyn degen nıetten týǵan joba bolsa kerek.
Bárin aıt ta birin aıt, biz qazir Olımpıadaǵa qatysatyn boksshylarymyz sany kóptegen elderden (sonyń ishinde Kýba, Reseı sııaqty) artyq ekenin aıtyp maqtanyp otyrsaq, keıin sol týrnırden jeńimpaz bolyp oralǵan sańlaqtarymyzdyń kóptigimen marqaıatyn bolaıyq.
Damır QOJAMQUL.
