Portýgalııa – tórttiktiń alǵashqysy

Senbi, 23 maýsym 2012 7:25

Maýsymnyń 21-i kúni Eýropa chempıonatynda 1/4 fınaldyń alǵashqy matchy oınaldy. Bul kúni Chehııa jáne Portýgalııa quramalary kezdesti. Onda 1:0 esebimen jeńiske jetken portýgaldar 1/2 fınal tórttiginiń birinshi ujymy bolyp tirkeldi.

Senbi, 23 maýsym 2012 7:25

Maýsymnyń 21-i kúni Eýropa chempıonatynda 1/4 fınaldyń alǵashqy matchy oınaldy. Bul kúni Chehııa jáne Portýgalııa quramalary kezdesti. Onda 1:0 esebimen jeńiske jetken portýgaldar 1/2 fınal tórttiginiń birinshi ujymy bolyp tirkeldi.

Matchqa deıin. Shırek fı­nal­dyq shaıqas aldynda Chehııa quramasynyń bas jattyqty­rý­shysy Mıhal Bılek qarsylastar quramynda Krıshtıaný Ronaldýdan basqa da kúshti oıynshylar kóp ekenin atap ótti. «Biz portýgaldardy bólip-jarmaı, bárine qarsy tura bilýimiz kerek, – dedi ol. – Birinshi matchta tym ashyq oınap edik, onyń jazasyn tez tarttyq. Bul bizge sabaq boldy. Endigi oıyn basqasha bolady». Al Portýgalııa quramasynyń bas jattyqtyrýshysy Paolý Bentý komandanyń óz stıline berik, ıaǵnı burynǵysynsha sha­býyldyń shashbaýyn kótere be­ret­inin málimdedi. «Tek tym alyp-ushpaı, salqynqandy jáne muqııat oınaýymyz kerek», – degendi de sol aıtty.

Derek. Bul komandalar bi­rin­shi ret budan týra 16 jyl buryn, 1996 jylǵy 23 maýsymda Eýropa birinshiliginde kezdesip edi. Sonda tumandy Albıon jerin­degi jan alyp, jan bergen shaı­qasta Karel Poborskı bastaǵan cheh oıynshylary 1:0 esebimen basym túsken. Munyń qarym­ta­syn «Selesaý» tek 2008 jyly 11 maýsymda ǵana 3:1 etip qaı­ta­ra aldy. Quramalar munda Eýropa birinshiliginiń toptyq saıy­sy­nyń ekinshi týrynda ushyrasqan.

Oıyn. Mıhal Bılektiń ji­gitteri ózderiniń burynǵy taktıkalaryn ózgerte qoımady. Ys­qy­ryq úni estilisimen alǵa um­tyl­ǵan olar alǵashqy sáttegi abyr-dabyrdy paıdalanyp qalý­ǵa tyrysty. Chehtardyń oń qap­taldan aıyp alańyna birneshe ret jetkizgen doptary shynynda biraz qaýip úıirdi. Portýgaldyń qorǵanys shebindegi Fabıý Koentraý bastaǵan sarbazdar shyr­ǵa­lańy kóp bul shabýyldarǵa bar­lyq ýaqytta birdeı laıyqty tosqaýyl qoıa almady. Jaǵdaıdy chehtardyń óz qatelikteri túzep ketip jatty. О́z kezeginde Bentý qyrandary qaıtarǵan qaýyrt jaýaptar budan da qaýipti bola tústi. Munda jankúıer jurt Krıshtıaný Ronaldýdyń kóp bel­sendiligine kýá boldy. Toptaǵy alǵashqy eki kezdesýdi onshama oralymdy ete qoımaǵan komanda kapıtanynyń Gollandııa qurama­symen matchta qanshalyqty orasan zor eńbek sińirgenin de mamandar qapysyz baıqady. Aldyn ala aıta keteıik, Krısh­tıa­nýdyń bul joly anyq tórt gol soǵýyna bolatyn edi. Sonyń eke­ýi taǵy da qaqpa baǵanynan qaıt­sa, bireýin forvardtyń ózi múlt jiberdi.

Oıynnyń ekinshi bóliginde chehtar qarsylastaryn qarsy shabýyl kezinde qapyda qaldyrý nıe­timen alańsyz artqa ketip tyndy. Biraq portýgaldar olar­dyń bulaısha tutqıyldan jamyrap shyǵa kelýlerine endi jol bermedi. Munyń ornyna olar Pe­ter Cheh qorǵaǵan qaqpany qur­saýlanǵan qorshaýǵa alyp aldy. Osy tusta golkıperge birneshe ret sheberligin kórsetýge týra keldi. Alaıda, 79 mınýtta Krıshtıaný Ronaldý urǵan dopqa onyń da qarsy qoıar amaly qalmady. Shabýylshynyń sol qaptaldan jyldam jetken dopty basymen urý arqyly qalaı tamasha etip túsirgenin kórermen kópshilik óz kózderimen kórdi ǵoı dep oılaımyz. Al Bılektiń shákirtteri bu­dan keıin qanshama ret qarsy jo­ryq uıymdastyrýǵa umtyl­ǵan­darymen, ol oılaryn júzege asy­ra almady. Jalpy, olar bú­kil oıyn boıyna bir ret te qaq­pa­ǵa týralap soqqy jasaı alǵan joq.

Matchtan soń. Portýgalııa qu­­ramasynyń bas bapkeri Paolý Bentý eń aldymen: «Bizdiń maq­satymyz Ispanııany ne Fran­sııa­ny utý», degendi aıtty. «Bul oıyn Gollandııamen aıqastan bi­raz ózgesheleý boldy, – dedi bu­dan ary. – Bizdi chehtardyń alǵash­qy 20-25 mınýt teń dá­re­jede shaıqasqannan keıin birjo­la qor­ǵanysqa ketkeni tań qal­dyrǵan joq. Olardy biz soǵan májbúr ettik. Al úzilisten keıin tamasha fýtbol kórsettik. Sol jeńis ákeldi». Chehııa qurama­sy­nyń bas jattyqtyrýshysy Mıhal Bılek óte kúshti qarsy­las­tyń tap kel­­genin birden moıyndady. «Bul komandamen kúresý­diń qıynǵa soǵatynyn bildik», – dedi ol. Sodan soń burynnan qalyptasqan ádep erejesi boıynsha búgingi qarsylastaryna budan ári de tabysqa jete berýdi tiledi.

Serik PIRNAZAR,

«Egemen Qazaqstan».

Oılar, pikirler, kózqarastar

Dık ADVOKAT,

Reseı quramasynyń burynǵy bas jattyqtyrýshysy:

– Jurt barlyq kinány maǵan aýdara salǵysy keledi. Biraq shyndyqtyń betine týra qaraıyq. Biz Chehııamen tamasha match ótkizdik, Polshany birinshi taımda tyrp etkizbedik. Grekterdi de talqandaýǵa tıis edik. Biraq buǵan qol jetpeı, úsh oıynnan keıin týrnırden shyǵyp qaldyq. Biz juldyzdarsyz komanda edik. Eýropaǵa barǵan orys jigitteri ylǵı zapasta otyrady. Osyǵan qaramastan, biz keremet komanda jasaı bildik. Shamasy, qorǵanyp jatyp alǵan grekterdiń shebin buzyp shyǵýǵa olardyń sheberlikteri jetpese kerek…

Ýeın RÝNI,

Anglııa quramasynyń shabýylshysy:

– Bizdi ıtalıandarmen ótetin kúrdeli match kútip tur. Oǵan qaramaı, aqyryna deıin shaıqasamyz. Maǵan bizdiń qazirgi qurama osyǵan deıin ózim oınaǵandardyń ishindegi eń uıymshyly sııaqty kórinedi. Biz óz kúshimizge senimdimiz, eń mańyzdysynyń ózi de sol.

Alen BOGOSSIаN,

Fransııa quramasy bas jattyqtyrýshysynyń kómekshisi:

– Biz shvedterdi jeńip, toptan birinshi bolyp shyǵýǵa tıis edik. О́kinishke qaraı, oǵan qol jetpedi. Endi ol týraly oılap jatýǵa ýaqyt joq. Ispandarmen oıynǵa daıyndalýymyz kerek. Biz olardyń oıyndaryn tún jarymy aýǵansha taldap shyqtyq. Bul komandany toqtatý ońaı emes. Al biz sony jasaımyz.

Ignasıo ABATE,

Italııa quramasynyń qorǵaýshysy:

– Qazir Anglııa oıynshylarynyń kóńil-kúıleri jaqsy. Olarǵa Rýnı qosyldy. Alaıda, biz de sorly emespiz. Sondyqtan erteńgi kezdesýde aǵylshyndarǵa óz oıynymyzdy tańýymyz kerek. Olardyń qaptaldardan jyldam órbıtin óte qaýipti qarsy shabýylyna tosqaýyl qoımaı bolmaıdy. Bul bizdiń qolymyzdan keledi.