Altyn medal súıinshisine – 100 myń dollar
Beısenbi, 28 maýsym 2012 7:09
Olımpııa oıyndary bir qyr astynda. Tórt jyl boıy daıyndyq, joldama ala alam ba dep kirpik aıqaspaǵan túnder, quramadaǵy oryn úshin talas… bári, bári artta qalyp barady. Sońǵy daıyndyq, san jyldar boıy ábden mashyqtanǵan ádis-aılalardy taǵy pysyqtaý, sosyn qysqa merzimdi demalys, sosyn London…
Beısenbi, 28 maýsym 2012 7:09
Olımpııa oıyndary bir qyr astynda. Tórt jyl boıy daıyndyq, joldama ala alam ba dep kirpik aıqaspaǵan túnder, quramadaǵy oryn úshin talas… bári, bári artta qalyp barady. Sońǵy daıyndyq, san jyldar boıy ábden mashyqtanǵan ádis-aılalardy taǵy pysyqtaý, sosyn qysqa merzimdi demalys, sosyn London…
Qazir London álemniń nazarynda. Onda sport tarıhynyń jańa paraqtary altyn áriptermen jazylady. Baǵy janǵan memleketter, Beıjińde sýǵa júzýden bir ózi segiz altyn oljalaǵan amerıkalyq Maıkl Felps, atqan oqtaı zaýlaıtyn, súıikti Iаmaıkasyna bir ózi úsh altyn syılaǵan qara marjan Ýseın Bolt sekildi jańa chempıondardyń ataǵy jer jahanǵa jaıylady. Jer tarpyǵan sáıgúlikterin dodaǵa qosqan Qazaqstannyń da kóńili kúpti.
Osyndaıda el muratyn bıik qoıatyn azamattar Londonnan qus qanatymen jetetin júrekjardy habarlarǵa súıinshilerin atap jatyr, Qazaqstan kúres federasııasynyń jıynynda federasııa prezıdenti, “QazTransGaz” kompanııasynyń prezıdenti Serik Sultanǵalı federasııa atynan Londonda altyn medal jeńip alǵan balýandarǵa 100 myń dollar syıaqy beriletindigin aıtty. Kúmis medalǵa 50 myń dollar, qola medalǵa 30 myń dollar taǵaıyndalǵan.
– Sizder elimizdiń mereıin asqaqtatý úshin ter tógip júrsińder, – dedi federasııa prezıdenti. – Buǵan deıin de qazaq sportynda mańdaıy jarqyraǵan juldyzdar kóp bolǵan. Londonnan keıin sol shoǵyrdyń molaıýyna bárimiz de tilektespiz. Olımpıada – kosmosqa ushqannan beter mańyzdy meje. Otanymyzdyń patrıoty retinde baıraǵymyzdy jelbiretip, ánuranymyzdy shyrqatar sátterińizge kýá bolǵymyz keledi.
Sózin osylaı tujyrǵan Serik Sultanǵalı Astanada taıaý jyldarda kúres saraıy salatyndyǵyn jetkizdi. Jobasyn koreı sáýletshileri jasaǵan. Aqordanyń kórnekti jerine oryn tebetin saraıdyń bar shyǵynyn “QazTransGaz” kompanııasy kóterip almaq. Álemdik úlgide salynyp jatqan Boks ortalyǵy bar. Endi onyń qataryna kúres saraıy qosylyp jatsa, tarıh sahnasyna attyń ústinde shyqqan jaýynger halyqtyń ulandary Olımp bıiginen áli talaı ret qol bulǵaıtyn bolady.
Jıynda erkin kúres quramasynyń bas bapkeri Altaı Tanabaev, grek-rım kúresi quramasynyń bas bapkeri Muratbek Qasymhanov jáne áıelder kúresi quramasynyń bas bapkeri Erjan Telaqynov shákirtteri jaıynda esep berip, bıik nátıjege jetýge daıyn ekendikterin baıandady.
Baqtııar TAIJAN,
“Egemen Qazaqstan”.
ALMATY.
