Dástúrge saı birinshi bolyp balalar qashyqtyǵynyń qatysýshylary júgirdi. Saǵat 7:30-da 10-14 jastaǵy 1000-ǵa jýyq jas atlet eń júırik ataǵyna talasty. Uldar arasynan Domınık Bolovınsev, al qyzdar arasynan Rıma Grankına jeńimpaz atandy.
Saǵat 8:10-da Respýblıka alańynda Almaty qalasynyń ákimi Baýyrjan Baıbek pen «Almaty marafonynyń» negizin qalaýshy jáne Ǵalymjan Esenov marafon (42 km) jáne jartylaı marafon (21 km), sonymen birge komandalyq Ekıden estafetasyn ashty. Mundaı komandalardyń sany bıyl 113-ke jetti, bul da bir rekord bolyp otyr.
Sportshylardyń sany eń kóp 10 km qashyqtyq jarysyna qatysýshylar 8.25-te júgire bastap, olarǵa skandınavııalyq júris áýesqoılary ilesti.
Negizgi (42 km) qashyqtyqqa Tashkent qalasynan kelgen Zıkrıllo Mamatkýlov 2:28:34 nátıjesimen absolıýtti jeńimpaz atandy. Al, qyzdar arasynan _Máskeý qalasynan kelgen Aleksandra Kalanova eń úzdik nátıje kórsetti (2:42:44). Bıyl jalpy júlde qory 2 940 000 teńge qurap, ony 42 jáne 21 km qashyqtyqtarǵa júgirgen erler men áıelder arasynan kóshbasshylar úshtigi bólip aldy.
«Bıyl biz segizinshi «Almaty marafonyn» ótkizdik. Jyl saıyn áýesqoılardyń sany artyp, álemniń túkpir-túkpirinen adamdar Almatyǵa ádeıi osy shara úshin kelip jatyr. Bul joly sórege shyqqandardyń sany byltyrǵa qaraǵanda 3 myń adamǵa artyq boldy. Shara naǵyz sporttyq merekege aınala bastady. Jol qashyqtyǵynda júgirýshilerdi jankúıerler qoldap, al biz qatysýshylardy sergitý úshin mýzykalyq pýnktterdi ashtyq, olarda barabanshylar, syrnaıshylar, orkestr, tipten fýtbol jankúıerleri óner kórsetti. Led-ekrandarda jankúıerlerdiń qoldaý sózderi jazylǵan beınerolıkter men fotosýretter kórsetildi. Jyl saıyn qalada marafonnyń aýqymy artyp keledi», -dedi «Almaty marafonynyń» dırektory Saltanat Qazybaeva.
«Almaty marafony» birinshi jyldan bastap aldyna qaıyrymdylyq maqsattaryn qoıyp keledi. Bıyl sórelik jarnadan túsken qarajattyń bir bóligi balalarǵa arnalǵan úsh mekemede sporttyq alańdardy turǵyzýǵa jumsalmaq.
