Qazaqstan • 22 Sáýir, 2019

Joldyń jaıy alańdatady

1066 ret

kórsetildi

3 mın

oqý úshin

Respýblıkalyq mańyzy bar joldardyń tez tozýyna salmaǵy shamadan tys aýyr júkterdi tasıtyn avtokólikterdiń kóptigi sebep. Bul týraly Ortalyq kommýnıkasııalar qyzmetinde ótken brıfıngte sóz boldy.

Erkejan AITQAZY

– Aýyr salmaqty júkterdi tasymaldaý qarqyndylyǵy jol jamylǵysynyń buzylýyna, joldyń shógýine, oıylýyna, plastıkalyq deformasııalardyń paıda bolýyna jáne avtomobıl jolynyń merziminen buryn tozýyna, tipti túbegeıli buzylýyna áser etedi, – dedi «QazAvtoJol» UK» AQ Basqarma tóraǵasynyń orynbasary Arman Júsipov. Onyń aıtýynsha, aýyr júk tasıtyn kólikterdiń basym kópshiligi kenishterden ınertti materıaldardy shamadan tys artyp alatyn qytaılyq kólikter ekeni anyqtalǵan.

− Kóliktik baqylaý júrgizý kezinde kóptegen tasymaldaýshylardyń taýar-kólik júk qujaty bolmaı shyǵady. Mysaly, 2018 jyly 5 700 tasymaldaýshy ákimshilik jaýapkershilikke tartylyp, 188 mln teńge aıyppul salyndy. Jaýapkershilikten qashý úshin júk jóneltýshiler (kenish ıeleri) ınertti júkter tıegende taýar-kólik júk qujatyn kórsetpeıdi. Qazir baqylaýdy 3 stasıonarlyq kólikti baqylaý beketi, 48 jyljymaly beket júzege asyrady. Budan bólek jalpy paıdalanymdaǵy avtomobıl joldaryna 12 arnaıy avtomattandyrylǵan ólsheý quraldary ornatyldy. 2018 jyly 12 515 kólik quraly tekserilip, 4384 zań buzýshylyq anyqtaldy. Olarǵa 321 mln teńge aıyppul salyndy», – dedi Indýstrııa jáne ınfraqurylymdyq damý mınıstrligi Kólik komıtetiniń tóraǵasy Samat Gılımov.

«Qazjol ǴZI» AQ prezıdenti Baǵdat Teltaevtyń aıtýynsha, elimizdegi negizgi joldar 10 tonnalyq salmaqqa jobalanǵan. «Respýblıkalyq jáne jalpy paıdalanýǵa berilgen jergilikti joldardyń sany shamamen 100 myń shaqyrym deıtin bolsaq, sonyń úshten eki bóligi (67 paıyzy) 10 tonna jáne odan da tómen bilik kúshine eseptelip salynǵan. Eger jolǵa osy normadan artyq kúsh túsetin bolsa, onda erte buzylýy yqtımal. Eger bir ǵana bilik 15 tonna júkpen ótetin bolsa, onda bir ǵana biliktiń jolǵa túsiretin salmaǵy alty avtokólikke teń. Elbasynyń tapsyrmasymen qanshama mıllıard teńgeni joldyń sapasyn kóterýge jumsadyq. Eger osy joldaǵy avtokólikterdiń biligine túsetin kúsh normaǵa saı ekenin qadaǵalamasaq, aldaǵy ýaqytta qoldanystaǵy joldardan aıyrylyp qalýymyz múmkin», – dedi ol.

B.Teltaev sondaı-aq jaqynda ǵana Qaraǵandy oblysynda asfaltqa batyp qalǵan kamazdardyń jaıyna qatysty ótkir syn aıtyp, bul máselege qatysty sharalardy zań aıasynda qatańdatý qajettigin eskertti.

«QazAvtoJol» UK» AQ Basqarma tóraǵasynyń orynbasary A.Júsipovtiń aıtýynsha, bıyl 1190 shaqyrym jolǵa ortasha jóndeý jumystary júrgizilip, paıdalanýǵa beriledi. Onyń 480 shaqyrymy resaıklıng tehnologııasy boıynsha, 250-i joldyń kedir-budyrly bederin óńdeý, 48 shaqyrymy mıkrosıýrfeısıng tehnologııasy boıynsha, 412-sine jolǵa sement beton jabyndyny jańartý jáne jasartý jumystary júrgiziledi dep josparlanýda. Kútip-ustaý jumystarymen

22 myń shaqyrymnan astam avtojol jelisi qamtylady. Kúrdeli jáne ortasha jóndeý jumystaryna – 54,4 mlrd teńge, aǵymdaǵy jóndeý jumystary men kútip ustaýǵa – 26,1 mlrd teńge bólingen.