Ádilet mınıstri M. Beketaev baıandama barysynda, AHQO quqyqtyq qamtamasyz etý úshin Negizgi zańǵa ózgerister engizilgenin atap ótti. Konstıtýsııaǵa sáıkes Nur-Sultan qalasynda qarjy salasynda erekshe quqyqtyq rejım ornatyldy.
Sondaı-aq, Konstıtýsııalyq zań qabyldandy. Halyqaralyq qarjy ortalyǵy aýmaǵyndaǵy ınvestorlardyń qyzmeti aǵylshyn quqyǵymen retteledi. Resmı til - Aǵylshyn tili.
«Qarjy ortalyǵy aýmaǵynda táýelsiz sot jáne Halyqaralyq tórelik ortalyǵy quryldy, onda sot ádildigin aǵylshyn sýdıalary júzege asyrady», dedi M.Beketaev.
Mınıstrdiń aıtýynsha, atalǵan sharalardyń barlyǵy menshik quqyǵyn qorǵaýǵa jáne sot tóreligin tıimdi iske asyrýǵa kepildik beredi. Bul iri jobalardy iske asyrýdy qamtamasyz etetin sheteldik ınvestorlar úshin asa mańyzdy.
«Investısııalar ádil quqyqtyq qorǵaýǵa senimdilik bolǵan jaǵdaıda salynady. Mundaı senimdilik jyldar boıy qalyptasady, keıde ol úshin onjyldyqtar qajet. Bıznes úshin qajetti senimdilikti aǵylshyn quqyǵy, aǵylshyn tili jáne aǵylshyn soty beredi. О́ıtkeni álemdik bıznestiń 80 paıyzy aǵylshyn quqyǵyn tańdaıdy. Osy sebepten aǵylshyn quqyǵyna negizdelgen Gonkong jáne Dýbaı sııaqty qarjy ortalyqtary óz elderiniń ekonomıkalaryna iri ınvestısııalardy tabysty tartyp otyr», dedi mınıstr.
Sondaı-aq ol Qazaqstanǵa ınvestısııalar ǵana emes, ınvestısııalarmen qosa jańa tehnologııalar da qajet ekenin atap ótti.
«Qarjy ortalyǵy aýmaǵynda zııatkerlik menshikti halyqaralyq tirkeý boıynsha yńǵaıly servıs qamtamasyz etiledi. Aǵylshyn tilin erkin meńgergen jáne úzdik álemdik ýnıversıtetterde bilim alǵan halyqaralyq deńgeıdegi zańgerler daıarlandy», dedi M.Beketaev.
Mınıstrliktiń aqparatyna súıensek, halyqaralyq quqyq ústemdigi ındeksinde Qazaqstan 7 jyl ishinde 10 tarmaqqa ósim kórsetip, 126 eldiń ishinde 65-shi orynda tur.
