Premer-Mınıstrdiń birinshi orynbasary – qarjy mınıstri Ə. Smaıylov, Syrtqy ister mınıstri B. Atamqulov, Ádilet mınıstri M. Beketaev, óńirlerdiń ákimderi ınvestısııalar tartý jónindegi jumysty jetildirýdiń jańa tásilderi týraly baıandady. Máseleni qaraý barysynda «Astana» halyqaralyq qarjy ortalyǵynyń basqarýshysy Q. Kelimbetov, Qazaqstannyń sheteldik ınvestorlar keńesi qaýymdastyǵynyń basqarma tóraǵasy A. Preımanıs sóz sóıledi.
«Tuńǵysh Prezıdent – Elbasy Nursultan Nazarbaev ekonomıka ósiminiń turaqty qarqynyn qamtamasyz etý mindetin qoıdy, bul negizgi kapıtalǵa JIО́ 30% deńgeıine deıin ınvestısııalar kólemin ulǵaıtýdy talap etedi. Tikeleı sheteldik ınvestısııalar negizgi draıverge aınalýy tıis», dedi A. Mamın. 2018 jyldyń qorytyndysy boıynsha Qazaqstanǵa tikeleı sheteldik ınvestısııalardyń jalpy aǵyny 15,8% ósip, $22,4 mlrd qurady.
Investısııalyq ahýaldy odan ári jaqsartý jáne ınvestısııalar tartý jumystaryn jetildirý maqsatynda Úkimet jańa tásilderdi qabyldady. Premer-Mınıstrdiń tóraǵalyǵymen Investısııalar tartý máseleleri jónindegi úılestirý keńesi quryldy. Investısııalar tartý máselesi boıynsha barlyq jaýapty sheshimder Úılestirý keńesiniń qaraýyna shyǵarylatyn bolady. Keńestiń birinshi otyrysy bıyl mamyr aıynda ótedi.
Investısııalyq jobalardy iske asyrýǵa jáne ınvestorlardyń quqyqtaryn qorǵaýǵa qatysty máselelerdi sheshý úshin ınvestısııalyq ombýdsmen fýnksııalary Premer-Mınıstrge júkteldi.
«Astana» halyqaralyq qarjy ortalyǵy, óz kezeginde, ınvestısııalar tartýdyń aımaqtyq ortalyǵyna aınalýy tıis. AHQO qyzmetin qamtamasyz etý úshin erekshe quqyqtyq rejım belgilengen: Konstıtýsııalyq zań qabyldanǵan, ınvestorlardyń qyzmeti aǵylshyn quqyǵymen retteledi. Búginde ınvestorlarǵa qolaıly jaǵdaılar qarastyrylǵan: táýelsiz retteý, sot pen Halyqaralyq arbıtrajdyq ortalyq jumysy álemdik standarttarǵa saı keledi jáne sheteldik ınvestorlardyń quqyqtyq jaılylyǵyn qamtamasyz etedi; táýelsiz qorlardyń álemdik basqarýshy kompanııalaryn tartýǵa jaǵdaılar jasalǵan.
Investısııalar aǵymyn arttyrý úshin AHQO alańynda ınvestorlarmen jumys júrgizetin biryńǵaı ekojúıe qurylady, bul júıege barlyq damý ınstıtýttary kiretin bolady jáne «bir tereze» qaǵıdasy aıasynda jumys jasaıdy.
«Sheteldik ınvestısııalardy tartý ekonomıkanyń damýyna jol ashyp, halyqtyń turmys sapasyna qatysty máseleni sheshýge, jańa jumys oryndaryn ashýǵa jáne áleýmettik máselelerdi sheshýge múmkindik beretinin naqty túsinýimiz kerek. Ákimdikter ınvestorlarmen jumystardy ózgertip, ınvestısııalar tartýdyń jańa algortımine qosylýy qajet», dedi Premer-Mınıstr A. Mamın.
