«Meniń Otanymnyń memlekettik tili» taqyrybynda ótken olımpıadaǵa Almaty qalasyndaǵy joǵary oqý oryndarynda bilim alatyn stýdentter qatysyp, baq synasty.
Sharany uıymdastyrýshy Qyzdar ýnıversıtetiniń Qazaq til biliminiń teorııasy men ádistemesi kafedrasynyń meńgerýshisi Tynyshtyq Ermekovanyń málimetine súıener bolsaq, qatysýshylardyń barlyǵy ózge ult ókilderi.
– Qazaq tiline shorqaq stýdentterdi iriktep alýymyz beker emes. Osy arqyly olardyń qazaq tili boıynsha tanymdyq qabiletin damytyp, memlekettik tildi meńgerýine yqpal etýdi kózdeımiz. Olımpıada óskeleń urpaqty eljandy hám ulttyq qundylyqtar negizinde tárbıe berýde zor úles qosady dep senemiz, deıdi Tynyshtyq Ermekova.
Jarystyń ashylý rásiminde Qazaq fılologııasy jáne álem tilderi fakýltetiniń dekany Janar Qıynova sóz sóılep, bilim dodasy ýnıversıtet qabyrǵasynda tuńǵysh ret uıymdastyrylyp otyrǵanyn atap ótip, top múshelerine sáttilik tiledi. Sonymen qatar joǵary oqý oryndary stýdentteri arasynda «Qazaq tili» páninen ótken olımpıadanyń bıylǵy jeńimpazy, fakýltet stýdenti Kamelıa Karpovıch te óz tilegin arnady.
– Kókirek kózimen túısine bilgen janǵa til – dostyqtyń kilti, yntymaqtyń uıytqysy, yrys-berekeniń nyshany. Birligi bekem, tirligi tatý Qazaq elinde 130-dan astam ult pen ulys ókili «bir jaǵadan – bas, bir jeńnen – qol shyǵaryp», ómir súrýde. Meniń oıymsha, osy elde turǵan árbir azamat qazaq tiline zor qurmet kórsetýi tıis. Jáne ony kúndelikti qarym-qatynasta qoldaný qajet. Qajet emes, solaı bolýy tıis jáne óz qatarlastarymdy osyǵan shaqyramyn, dep atap ótti Qyzdar ýnıversıtetiniń stýdenti.
Qazaq tilin tereń meńgergen, sózge sheshen, tanymy bıik 7 toptyń músheleri tórt kezeń boıynsha synǵa tústi. Qatysýshylar «Sálem – sózdiń anasy» atty alǵashqy aınalymda ózderin tanystyrdy. Onda stýdentterdiń sóıleý mánerine basymdyq berildi. «Bilekti birdi jyǵar, bilimdi myńdy jyǵar» atty ekinshi kezeńde saıyskerler ár uıashyqta jasyrylǵan leksıkalyq, grammatıkalyq suraqtarǵa jaýap berip, praktıkalyq tapsyrmalardy oryndap, bilim deńgeılerin sarapqa saldy. Al úshinshi týrda stýdentterdiń ıntellektýaldyq áleýeti baǵamdaldy. Al «Qazaq tili» páninen teorııalyq bilimderi men tanymdyq deńgeılerin anyqtaý maqsatynda arnaıy daıarlanǵan taqyryptar toptamasynyń ishinen tańdalǵan taqyryp boıynsha esse baıqaýy «Ushqyr qalam» atty sońǵy kezeńde uıymdastyryldy. Usynylǵan taqyryptardyń deni týǵan jer, «Rýhanı jańǵyrý» baǵdarlamasyndaǵy basym baǵyttar men ulttyq salt-dástúrdi qaýzaıdy. Atap aıtqanda olardyń qatarynda «Qazaq eli, qazaq tili – máńgilik!», «El bolashaǵy – bilimdi urpaq», «Memlekettik til – meniń tilim», «Rýhanı jańǵyrý ózińnen bastalady», «Abaı poezııasy – adamzattyń asyl qazynasy», «Latyn álipbıi – táýelsizdiktiń jetistigi», «Qazaq dástúrin qasterleý – paryz», «Yrys aldy – yntymaq» jáne «Meniń ýnıversıtetim» taqyryptary bar.
Saıys barysynda stýdentterdiń bilim men ónerine Almaty qalasy Memlekettik tilderdi damytý ınstıtýtynyń dırektory Bıjomart Qapalbek, Abaı atyndaǵy Qazaq ulttyq pedagogıkalyq ýnıversıtetiniń Phd doktory Gúlmıra Karımova jáne Qyzdar ýnıversıtetiniń «Nur Otan» partııasynyń «Ulaǵat» bastaýysh uıymynyń tóraǵasynyń orynbasary Álibı Nesipbaev qazylyq jasady.
Tartysty ótken olımpıada qorytyndysy boıynsha Abaı atyndaǵy Qazaq ulttyq pedagogıkalyq ýnıversıtetiniń «Abaı» toby ózgelerden oq boıy ozyp shyǵyp, jeńimpaz atandy. Qazaq ulttyq qyzdar pedagogıkalyq ýnıversıtetiniń stýdentterinen quralǵan «Izgilik» toby men S. Demırel atyndaǵy ýnıversıtettiń «Sýperstrat» komandasy teń túsip, birinshi oryndy ózara bólisti. Ekinshi orynǵa Azamattyq Avıasııa akademııasynyń «Ushqyshtar» jáne Halyqaralyq aqparattyq tehnologııalar ýnıversıtetiniń «Suńqar» komandalary ıe boldy. Halyqaralyq bıznes ýnıversıtetiniń «International polıglottar» toby men Halyqaralyq aqparattyq tehnologııalar ýnıversıtetiniń «Alǵyr» toby úshinshi oryndy qanjyǵasyna baılady.
Jeńimpazdarǵa arnaıy dıplomdar men baǵaly syılyqtar tabystaldy.
