Shyǵarmashylyǵy kóp janrly bolǵanymen, sýretshi aýyl taqyrybyn, tabıǵat peızajdaryn jyrlaǵanda talant qýaty tasqyndaı túsetindeı. Onyń qalamyndaǵy aıryqsha baǵalanǵan shoqtyǵy bıik týyndylar osy taqyryptarǵa tán. Aýyl kórinisiniń lırıkalyq peızajy men tabıǵattyń sheksiz sulýlyǵy ómirge ásemdik syılaıdy. Á.Qasteev atyndaǵy óner mýzeıinde shymyldyǵyn túrgen «Meniń kórmem» atty jeke shyǵarmashylyq kórmesinde qylqalam sheberiniń ár jyldary jazylǵan 40-tan astam týyndysy usynylǵan.
«Sýretshi boıaý massasyn teńestirýge, kompozısııanyń barlyq elementterin yrǵaqty uıymdastyrýǵa, álemniń mánerliligin buzbaı, formalardyń ózindik áýenin jasaýǵa tyrysady. О́z avtoportretindegi ashyq bet álpeti men oıly kózderi sýretshiniń rýhanı ishki dúnıesin kórermenmen bóliskendeı. Al «Aýyldaǵy kúz» shyǵarmasynda joǵary qaraı órlegen qazdardyń qımyl-qozǵalys formalarynyń dál beınelenýi baıqalady. Sonymen qatar «Balalyq shaq týraly estelik», «Qurbylar» atty týyndylarynda aq kımeshektegi urshyq ıirip otyrǵan ájelerdiń beınelerinen sonaý balalyq shaqtyń esteligi men týǵan jerge degen saǵynysh lebi esedi. Sýretshi tabıǵat jaǵdaıynyń nıýanstaryn, syrǵyp bara jatqan sezimtal bir sáttik sulýlyqty náziktikpen qabyldap, lırıktiń kózimen kóredi», deıdi ónertanýshy Laýra Ábildaeva.
Almabaq ishinde adal eńbektiń jemisine kenelip otyrǵan aqsaqal beınesi, urshyq ıirgen qos áje, saǵyndyrǵan kúzgi baq kózge ystyq, kóńilge jyly ushyraıdy. Sýretshi seziminiń názik qylyn terbegen kenep betindegi myń san boıaýlar syrbaz ónerdiń sıqyryna qaraı tartady. Úmit pen kúdikke toly tynymsyz tirshilik alýan oılarmen arpalysqan adam kóńiliniń ishki yrǵaqtaryn tap basqandaı. Kórermendi ózine baýrap áketetin alyp qýat – keneptegi meıirim shýaǵy. Sezim jańbyryn sirkiretken saǵynysh esken sulbalar.
ALMATY
