– «90 jastaǵy Muqanov Igenkúl zár shyǵarý júıesiniń qıyndaýy men qýyǵynyń syzdap aýrýy mazalap, Ýrologııa ǵylymı ortalyǵyna kelgen bolatyn. Buǵan deıin pasıent emhanalyq jaǵdaıda emdelgen. Kóptegen aýrýhana dárigerleri naýqastyń jasyn, qosymsha aýrýlaryn eskerip, Ýrologııa ǵylymı ortalyǵyna jibergen. Mundaǵy bilikti dárigerler men professorlar qarııanyń qýyǵynda tas jınalyp qalǵanyn anyqtap, 16 sáýir kúni kúrdeli operasııa jasady. Operasııany andrologııa bóliminiń dárigeri Hahazov Iаkýb ekeýmiz jasadyq. 2 saǵatqa sozylǵan operasııa nátıjesinde naýqastyń qýyǵynan 6 tas alyndy. Kópshilikti qýyqtaǵy tastyń neden paıda bolatyny tolǵandyrady. Onyń kóptegen sebepteri bar, adenoma, qýyq moıynyń berishtenýi, prostata beziniń isigi, túrli úrpi jaraqattary áser etýi múmkin. Adam aǵzasynda zárdiń tejelýi sekildi qubylystar baıqalyp, beli men shaby, qýyq aımaǵy aýyrady. Mundaı jaǵdaıda dereý dárigerge qaralǵan jón. Úıde ózdigimen emdelý, tek qana aýrýdy asqyndyrady. «Aýrý – astan» demekshi, tamaqtaný tártibin qadaǵalap otyrý kerektigin biz halyqqa únemi eskertemiz», deıdi qarııanyń emdeýshi-dárigeri, ýrolog-androlog Álıjan Qojamjarov.
Ýrologııa ǵylymı ortalyǵynda tıisti em sharalaryn qabyldaǵan qarııanyń densaýlyǵy qazir birqalypty. «Qarty bar úıdiń qazynasy bar» demekshi, ata-ájelerimiz aman bolsyn. Biz olardyń jasaǵan jaqsylyǵyn umytpaımyz. Úlkenderge qurmet kórsetý – bizdiń basty paryzymyz», deıdi ortalyq mamandary.
