Qaladaǵy Y.Altynsarın atyndaǵy №65 mektep-gımnazııanyń bazasynda ornalasqan 31-evakýasııalyq jınaý pýnktinde jer silkiný kezindegi is-qımyldardy tekserý úshin praktıkalyq jattyǵý ótti.
Atalǵan oqý-jattyǵý jıynyna 1600-ǵa jýyq adam qatysty. Aıta keterligi, búginde shaharda 57 evakýasııalyq pýnkt uıymdastyrylǵan. Solardyń biri osy atalǵan bilim ordasynda ornalasqan 31-evakýasııalyq jınaý pýnkti.
«Evakýasııalyq jınaý oryndary kópqabatty úıler men halyq tyǵyz ornalasqan eldimekenderde ornalasqan. Seısmıkalyq qaýipsizdik máselelerin eskere kele, jınaý pýnkt retinde mektepter tańdap alyndy. Zilzala, tabıǵı jáne taǵy da basqa apattar kezinde qaýipsiz aımaqqa jınalǵan adamdar ashyq lagerge kóshiriledi. Qalada 5000 turǵynǵa arnalǵan arnaıy oryn qarastyrylǵan», dedi Shymkent qalasynyń Tótenshe jaǵdaılar departamenti bastyǵynyń orynbasary Erǵalı Bahaev.
Bul retki sharaǵa 33 mekeme qyzmetkerleri men 50 mekteptiń basshylary qatysyp, praktıkalyq jumystar kezinde apatty jaǵdaıda qaýipsiz aımaqqa qalaı barý kerek ekenin tájirıbe júzinde túsindirdi.
