«Azııa birinshiligi óte sátti ótti jáne joǵary deńgeıde uıymdastyrylǵan. Bul men qatysqan alǵashqy iri jarystardyń biri. Dúbirli dodada elimizge altyn júlde syılap, Ánuranymyzdy shyrqatqanymyz úshin qýanyshtymyn. Qurlyq básekesinde barlyq kezdesýlerim de ońaı bolǵan joq. Ásirese, fınalǵa joldama beretin beldesýde óte talantty Iran balýanyn jeńdim. Osy kezdesýim kópke deıin umytylmasy haq. Al fınalǵa ótken soń, jankúıerlerdi jerge qaratpaı, qol sozym jerdegi altynnan kóz jazyp qalmaý úshin barymdy saldym. Bul jeńisimdi bapkerlerim men maǵan jankúıer bolǵan barsha qazaq eline arnaımyn. Endigi maqsat – óz elimizde ótetin álem chempıonatynda kók týymyzdy kóterý», - deıdi 20 jasynda top jarǵan Nurqoja Qaıpanov.
Al Azııa oıyndarynyń aqtyq synynda súrinip, bıylǵy qurlyq chempıonatynda qarsylas shydatpaǵan Danııar Qaısanov eń negizgi qarsylasynyń jarystan syrt qalǵanyn aıtady.
«Meniń salmaǵymda 16 balýan kúresti. Barlyǵyn da jaqsy bilemin. Al ózim úshin eń aýyr kezdesý mońǵol sportshysyna qarsy ótti. Ol jaqynda Mońǵolııa chempıony atanǵan jáne Azııa chempıonatynda top jarǵan balýan. Dese de, óz tájirıbem men sheberligim arqasynda jeńiske jettim. Aıtpaqshy, meniń eń azýly qarsylasym, Reseıdiń eki dúrkin chempıony Adam Batyrov jaraqatyna baılanysty kilemge shyqqan joq. Ol búginde Bahreın atynan synǵa túsip júr. Bul medal meniń ári qaraı úzdiksiz daıyndalyp, álem chempıonatynda sátti óner kórsetýime serpin beredi. Sondaı-aq, aldaǵy Olımpıada oıyndaryna joldama alý maqsaty birinshi orynda tur. Endi bir aptadaı demalys alyp, jattyǵý jumystaryna qaıta kirisemin. Mamyr aıynyń aıaǵynda Italııada reıtıngilik jarys ótedi. Sol básekege qatysamyn», - deıdi Qaısanov.
Eske sala keteıik, erkin kúresten Qazaqstan quramasy Áset Serikbaev jattyqtyrady.
