Oblystyq máslıhattyń kezekti sessııasynda sóz alǵan QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentiniń basshysy Abzal Muhımov atqarylyp jatqan jumystar týraly baıandady. Jıynda sybaılas jemqorlyqqa qarsy is-qımyl týraly Ulttyq baıandama talqylandy.
- Turmystyq jemqorlyqty joıýdyń taǵy bir joly - memlekettik kórsetiletin qyzmetterdi elektrondyq formatqa kóshirý. 2018 jyly elektrondyq túrde kórsetý múmkindigi bola tura, qaǵaz túrinde kórsetilgen 196 myńnan astam qyzmettiń 99 paıyzy bilim, densaýlyq saqtaý jáne áleýmettik salaǵa tıesili bolyp otyr. Atalǵan salalarda turmystyq jemqorlyq kórinisteri jıi kezdesetindigin eskere otyryp, osy salalarda kórsetiletin memlekettik qyzmetterdi kezeń-kezeńimen 100 paıyz elektrondyq formatqa jetkizýdi usynamyz.
Qazirgi ýaqytta aýyl ákimdikteri men halyqpen tyǵyz jumys jasaıtyn jumyspen qamtý jáne áleýmettik baǵdarlamalar bólimderi ǵımarattarynyń kópshiligi eski ǵımarattar. Osy eski ǵımarattardy jańartyp, qurylys júrgizý barysynda «Open space» formatyna kóshirý maqsatynda qarjy bólý múmkindigin qarastyrýlaryńyzdy suraımyz. Sonymen qatar, halyqqa qolaıly jaǵdaı jasaý úshin oblystyq maslıhatta halyqtyń aryz-shaǵymy men tilekterin kedergisiz qaraıtyn front-ofıs ashýdy usynamyz. Front-ofıste azamattar halyq qalaýlylarymen kezdesip, tilek talaptaryn bildiretin ashyq alańǵa aınalady degen senimdemiz, - dedi ol.
Bıyl balalardy mektepke qabyldaý, tegin tasymaldaý, lagerge joldama berý, arnaıy bilim berý uıymdaryna qabyldaý, tehnıkalyq jáne kásiptik, orta bilimnen keıingi bilim berý uıymdaryna qujattar qabyldaý jáne t.b. bilim berý salasyndaǵy 12 qyzmet tolyq elektrondy formatqa kóshiriletin boldy. Bul maqsatqa jergilikti bıýdjetten 50 mln. teńgege jýyq qarjy bólý kózdelip otyr.
