Mınıstrdiń aıtýynsha, Qazaqstan táýelsizdikke qol jetkizgennen keıin halyqaralyq kólik jelilerine qosylý úshin úlken kúsh jumsady. Birqatar salalyq baǵdarlamalar qabyldandy, jańa áleýmettik-ekonomıkalyq jaǵdaılarǵa jaýap beretin salanyń quqyqtyq negizi qalyptasty. Kólik qyzmetterin kórsetetin básekelestik orta quryldy.
«Sońǵy 10 jylda kólik salasyn damytýǵa shamamen 30 mlrd AQSh dollary jumsaldy. 2 myń shaqyrymnan astam temir jol salyndy, 6,3 myń shaqyrym avtomobıl joldary qaıta jańartyldy, Kaspııdegi porttyq qýat 26 mln tonnaǵa deıin ulǵaıtyldy, 15 áýejaıdyń ushý-qoný jolaqtary qaıta jańartyldy», dedi mınıstr.
Roman Sklıar eki eldiń saýda-ekonomıkalyq ózara is-qımylyn nyǵaıtatyn Qazaqstan men Qytaıdyń kólik-logıstıkalyq sektoryndaǵy tyǵyz áriptestik yntymaqtastyqty atap ótti.
Búginde Qytaımen shekarada kedergisiz saýdany damytý maqsatynda «Qorǵas – Shyǵys qaqpasy» Arnaıy ekonomıkalyq aımaǵyn qurý jumystary tolyǵymen aıaqtaldy. Qazir onda 79 qatysýshy tirkeldi jáne óndiris retke keltirilýde.
Arnaıy ekonomıkalyq aımaq ınfraqurylymyna ındýstrııalyq jáne logıstıkalyq aımaqtarmen qatar qurǵaq port kiredi. Ol eldiń shyǵysyndaǵy júkterdi shoǵyrlandyrý men dıstrıbýsııalaý úshin 2015 jyly iske qosylǵan bolatyn.
Teńiz tasymaldarynyń álemdik kóshbasshysy, COSCO Shipping qytaı kompanııasy jerústi transkontınentaldyq tasymaldarǵa qyzyǵýshylyq tanytty jáne qurǵaq portty damytýǵa belsene atsalysady. Sondaı-aq halyqaralyq basqarýshy retinde DP World (BAÁ) teńiz porttarynyń operatory tartyldy.
2014 jyly Lıanıýngan portynda Qytaı seriktesterimen birlesken logıstıkalyq termınal quryldy. Ol búgingi kúni Qazaqstanǵa nemese Qazaqstannan ótetin júk aǵyndaryn shoǵyrlandyrýdyń negizgi pýnkti.
«Qurǵaq port Qytaımen shekarada eki temir jol ótkelimen tehnologııalyq úılesimde. «Jetigen-Qorǵas» temir joly men «Batys Eýropa – Batys Qytaı» avtomagıstrali arqyly quzyretti iri kólik-logıstıkalyq operatorlardy tarta otyryp, Eýrazııalyq transkontınentaldyq tasymaldardy damytýdyń jańa kezeńin ashty», dep atap ótti mınıstr Roman Sklıar.
Aıta ketý kerek, 25-27 sáýir aralyǵynda Beıjińde ótetin «Bir beldeý, bir jol» ekinshi forýmyna 40-qa jýyq memleket jáne úkimet kóshbasshylary qatysady.
