Kezdesýde ekijaqty yntymaqtastyqtyń ózekti máseleleri talqylandy. Atap aıtqanda, saýda-ekonomıkalyq saladaǵy, ınvestısııalyq yntymaqtastyqtaǵy, ónerkásiptik kooperasııadaǵy, kólik-tranzıt salasyndaǵy, ǵarysh qyzmetindegi ózara is-qımyldy odan ári nyǵaıtý jáne arttyrý, shekara mańy yntymaqtastyǵyn jáne aımaqaralyq baılanystardy damytý máseleleri qaraldy.
«Eki el arasyndaǵy ashyq senimdi qatynastar Qazaqstannyń Tuńǵysh Prezıdenti – Elbasy Nursultan Nazarbaev pen Reseı Prezıdenti Vladımır Pýtınniń strategııalyq baǵdaryna súıene otyryp, barlyq salada qarqyndy damyp keledi», dedi Qazaqstan Premer-Mınıstri.
A.Mamın «Qazaqstan Prezıdenti Q.Toqaevtyń Máskeýge jýyrdaǵy resmı sapary jáne joǵary deńgeıde ótken kelissózder eki eldiń strategııalyq ózara is-qımylynyń odan ári damýyna qosymsha serpin bergenin» aıtyp, «birlesken belsendi jumysqa baǵyttalǵan, qol jetkizilgen ýaǵdalastyqtardyń mańyzyn, búgingi kezdesýdiń atalǵan ýaǵdalastyqtardy iske asyrýdyń tájirıbelik qadamdaryn talqylaýdyń jaqsy múmkindigi» ekenin jetkizdi.
Reseı Úkimetiniń Tóraǵasy D.Medvedev Qazaqstan Premer-Mınıstriniń Máskeýge saparynyń birqatar strategııalyq mindetti talqylap, sheshýdegi, tek ekijaqty formatta emes, sondaı-aq EAEO aıasynda kún tártibinde turǵan aýqymdy baǵdarlamalardy iske asyrýdaǵy mańyzyn atap ótti.
Qazaqstan Úkimetiniń ınvestısııalar tartý boıynsha qabyldaǵan jańa sharalary turǵysynan eki el arasyndaǵy ınvestısııalyq yntymaqtastyqty odan ári ulǵaıtý jóninde pikir almasyldy.
«Jańa tásilder ınvestorlar úshin, sonyń ishinde reseılik seriktester úshin barynsha qolaıly jaǵdaılar jasaıdy», degen A.Mamın, «Astana» halyqaralyq qarjy ortalyǵynyń EAEO aıasynda qarjylyq birlesý úshin, sheteldik ınvestısııalardy tartyp, Eýrazııa aımaǵynyń kapıtal naryqtaryn damytyp, ilgeriletýge úlken perspektıvalary bar ekenin jetkizdi.
Taraptar saýda-ekonomıka salasyndaǵy ózara is-qımyldy keńeıtýdegi Yntymaqtastyq jónindegi úkimetaralyq komıssııanyń rólin atap ótti. ÚAK kezekti otyrysy bıyl maýsym aıynda Qazaqstanda ótedi dep josparlanǵan.
A.Mamınnniń Reseıge jumys sapary aıasynda Qazaqstan Úkimetiniń basshysy men Reseı Úkimeti basshysynyń qatysýymen «KamAZ» kólik jabdyqtary markasy úshin tehnıka jáne onyń quramdastaryn óndirý jobasyn iske asyrý boıynsha yntymaqtastyq týraly kelisimge qol qoıyldy. Kelisimge Reseı О́nerkásip jáne saýda mınıstriniń orynbasary A.Morozov, Qazaqstan Indýstrııa jáne ınfraqurylymdyq damý vıse-mınıstri A.Erjanov, «KamAZ» AAQ bas dırektory S.Kogogın, Qazaqstan avtobıznes qaýymdastyǵynyń prezıdenti A.Lavrentev, «BRK-Lızıng» AQ basqarma tóraǵasy N.Baıbazarov, «Tobol kz» JShS basqarýshy dırektory D.Shúkijanova qol qoıdy.
