Teriskeıdiń aýa raıyna tózimdi ári ónimdi dándi daqyl túrine belgili teriskeılik seleksıoner-ǵalym Olga Gaastyń esimimen atalady.
Olga Semenovna – aýyl sharýashylyǵy ǵylymdarynyń kandıdaty. Agroónerkásip kesheninde tynymsyz eńbek etkenine 60 jyl. Osy merzim aralyǵynda bıdaıdyń jańa jeti surpyn shyǵarýǵa atsalysty.
«Eńbek jolymdy bastaǵan jyldary bıdaıdyń «Lıýtessens 35», «Ishımskaıa 100» suryptary tájirıbege engizildi. Qyzyljar óńirinde, ózge aımaqtarda da aýdandastyryldy», deıdi seleksıoner-ǵalym.
Zeınetke shyqsa da, súıikti isinen qol úzgen emes. Soltústik Qazaqstan aýyl sharýashylyǵy tájirıbe stansııasynyń ǵylymı keńesshisi, jastardyń tálimgeri. Ol jańa suryp «Semenovna» dep atalatynyn bilmepti. Kezdeısoq estipti. Kópjyldyq eńbeginiń baǵalanǵanyna qýanyshty. «Oral-Sibir» men «Omskaıa 38» suryptaryn seleksııalaý nátıjesinde paıda bolypty.
Aýyl sharýashylyǵy basqarmasynyń bólim jetekshisi Dáýren Shaqanovtyń aıtýynsha, jańa suryp qýańshylyqqa, ósimdik aýrýlaryna, tatqa shydamdy. Tez pisedi. Shyǵymdylyǵy joǵary. Bıdaıdyń jańa túri memlekettik saraptamaǵa jiberilip, 3 jyldaı óńirimizdiń 6 aýdanynda synalatyn bolady. Bıyl 400 myń gektar alqapqa egiledi.
Soltústik Qazaqstan oblysy
