Elbasynyń aıtýynsha, saıası qarama-qaıshylyqtarǵa, sanksııalarǵa, saýda soǵystaryna qaramastan bastama aıasyndaǵy saýda aınalymy óse túsip, qazir 5 trln AQSh dollary nemese álemdik saýdanyń úshten birine jetken.
– Zamanaýı logıstıkanyń, memleketterdiń ózara túsinistiginiń arqasynda Ońtústik Shyǵys Azııadan shyǵatyn taýarlar soltústik Eýropa qalalaryna eki aptanyń ishinde jetetin boldy. Bul pragmatızmniń negizinde órkendeýge degen umtylys jatyr. Qazaqstan Eýrazııanyń ortalyǵynda qolaıly qonys tepken. Bizdiń elderimiz arqyly Eýropa men Azııany baılanystyratyn qurǵaqtaǵy eń qysqa jol ótedi. Osy tranzıttik áleýetti utymdy paıdalaný maqsatynda biz «Nurly jol» atty ulttyq baǵdarlamamyzdy «Bir beldeý, bir jolǵa» kiriktirdik, – dedi Elbasy.
Nursultan Nazarbaev, sondaı-aq sońǵy 10 jylda Qazaqstan ınfraqurylymǵa, kólik-logıstıka aktıvterine 30 mlrd AQSh dollar kóleminde ınvestısııa salǵandyǵyna da toqtaldy.
Qazaqstan tarapynan Qytaımen shekarada Qorǵas qurǵaq porty qurylyp, tranzıttik júkter kólemi artqan. Sondaı-aq, qazaqstandyq munaı-gaz jelileri arqyly da Azııadan Eýropaǵa tasymal kólemi artqan.
Elbasy sóziniń sońynda Qytaı Halyq Respýblıkasynyń qurylýynyń 70 jyldyǵymen quttyqtady. Forým baǵdarlamasyna saı Nursultan Nazarbaevtyń QHR tóraǵasymen ekijaqty kezdesýi josparlanǵan. Halyqaralyq jıynǵa qyryqqa jýyq memlekettiń prezıdentteri men premer-mınıstrleri qatysýda. Forým jeksenbi kúni qorytyndylanady.
