Jıynda mádenıet nysanynyń dızaıny boıynsha almatylyq merdigerler ázirlegen úsh joba tanystyryldy. Onyń birin «PS Aksent» kompanııasy usynǵanymen, sáýletshilerdiń jumysy komıssııa músheleriniń kóńilinen shyqqan joq.
«Kórermen mádenıet oshaǵyna kirgennen-aq klassıkalyq, ıaǵnı ǵasyrlardan beri qalyptasqan stıldi sezinýi tıis. Al sizder daıyndap ákelgen joba zamanaýı úlgide ǵana jasalǵan. Ári bolashaq teatrdyń maketi óńirimizde salynyp jatqan ózge nysandardan esh erekshelenbeıdi», dedi Qumar Irgebaıuly.
Qalǵan eki joba boıynsha da birqatar syndar aıtyldy. Alqaly bas qosýda joba ıeleri mádenıet oshaǵyn klassıkalyq stılde ázirlep, ishi , syrty altyn tústermen bezendirilýi qajet degen sheshim alyndy. Oblys ákiminiń orynbasary Rýslan Álishev ǵımaratty ulttyq naqyshta turǵyzýdy usyndy.
Soltústik Qazaqstan jylqyny alǵash qolǵa úıretken óńirlerdiń biri bolǵandyqtan, bezendirý kezinde jylqy músinin qosý jóninde oılar aıtyldy. Úlken sýburqaq ornatylyp, aınala jasyl jelekpen bezendiriledi.
Búginde ǵımarattyń irgetasyn qalaý jumystary bastalyp ketken. Oǵan elordalyq «DBK-engineering» kompanııasy jaýapty. Qajetti zamanaýı qondyrǵylarǵa tapsyrys berilip, Kanada jáne Eýropa elderinen jetkizilmek.
Bolashaq qazaq teatrynyń aýmaǵy 1,5 gektardy quraıdy. Qońyr kúzge taman paıdalanýǵa berý josparlanǵan.
